«មួយថៃ» នឹងត្រូវដាក់បញ្ចូលក្នុងសមយុទ្ធយោធាពហុជាតិពស់វែកមាសឆ្នាំ ២០២៤
ថៃ ៖ លោក Sutin Klungsang រដ្ឋមន្ត្រីក្រសួងការពារជាតិថៃ កាលពីពេលថ្មីៗនេះ បានប្រកាសថា
ថៃ ៖ លោក Sutin Klungsang រដ្ឋមន្ត្រីក្រសួងការពារជាតិថៃ កាលពីពេលថ្មីៗនេះ បានប្រកាសថា សិល្បៈក្បាច់គុនមួយថៃ (Muay Thai) នឹងត្រូវផ្សព្វផ្សាយអំឡុងពេលការធ្វើសមយុទ្ធយោធាពហុជាតិដ៏ធំ «ពស់វែកមាសប្រចាំឆ្នាំ ២០២៤» នាពេលខាងមុខ។ នេះបើយោងតាមការចេញផ្សាយពីសារព័ត៌មានថៃ The Nation។
ព្រឹត្តិការណ៍សមយុទ្ធយោធាពស់វែកមាសឆ្នាំ ២០២៤ គ្រោងប្រព្រឹត្តទៅចាប់ពីថ្ងៃទី២៧ ខែកុម្ភៈ រហូតដល់ថ្ងៃទី១០ ខែមីនា នៅទូទាំងទីតាំងផ្សេងៗក្នុងប្រទេសថៃរួមមាន ខេត្តលុបបុរី ចន្ទបុរី ស្រះកែវ និង រ៉ាយ៉ុង។ លោក Jirayu Huangsub អ្នកនាំពាក្យក្រសួងការពារជាតិថៃបានថ្លែងថា លោក Sutin មានចំណាប់អារម្មណ៍បញ្ចូលការផ្លាស់ប្តូរវប្បធម៌ទៅក្នុងសមយុទ្ធយោធាដ៏សំខាន់នេះ ហើយមួយថៃនឹងស្ថិតក្នុងចំណោមសកម្មភាពនៃសមយុទ្ធពស់វែកមាសឆ្នាំ ២០២៤។ ប្រទេសថៃនឹងទទួលបានផលយ៉ាងច្រើនពីសមយុទ្ធយោធាប្រចាំឆ្នាំនៅឆ្នាំនេះ។
សមយុទ្ធពស់វែកមាស ដែលសហការឧបត្ថម្ភដោយកងយោធពលខេមរភូមិន្ទថៃ និងទីបញ្ជាការឥណ្ឌូប៉ាស៊ីហ្វិកសហរដ្ឋអាមេរិក នឹងត្រឡប់វិញនៅឆ្នាំ ២០២៤ ហើយជាលើកទី៤២ ដោយមានការចូលរួមពីប្រទេសចំនួន ៧ ក្នុងសមយុទ្ធសង្គ្រាមសំខាន់ៗ ដែលរួមមានម្ចាស់ផ្ទះថៃ សហរដ្ឋអាមេរិក សិង្ហបុរី ជប៉ុន ឥណ្ឌូនេស៊ី កូរ៉េខាងត្បូង និងម៉ាឡេស៊ី។ ទន្ទឹមនឹងនេះ ប្រទេសចិន អូស្ត្រាលី និងឥណ្ឌា នឹងចូលរួមក្នុងសមយុទ្ធជំនួយមនុស្សធម៌។
លោក Jirayu បញ្ជាក់ថា សមយុទ្ធពស់វែកមាសឆ្នាំ ២០២៤ ត្រូវបានរំពឹងថានឹងរួមបញ្ចូលនូវសកម្មភាពជាច្រើន រួមទាំងលំហាត់ហ្វឹកហ្វឺនលើទីលាន វគ្គបណ្តុះបណ្តាលស្តីពីសង្គ្រាមតាមអ៊ីនធឺណិត ជំនួយមនុស្សធម៌ និងការហ្វឹកហ្វឺនឆ្លើយតបនឹងគ្រោះមហន្តរាយ។ លោកក៏បានបន្ថែមថា នេះគឺជាលើកដំបូងក្នុងប្រវត្តិសាស្ត្រសមយុទ្ធពស់វែកមាស ដែលព្រឹត្តិការណ៍នៅឆ្នាំនេះ នឹងរួមបញ្ចូលសកម្មភាពទាក់ទងនឹងការយល់ដឹងអំពីដែនអវកាស និងប្រតិបត្តិការ៕
ចែករំលែកព័តមាននេះ