ខេត្តសៀមរាប ៖ កាលពីថ្មីៗនេះ ផ្ទុះការចាប់អារម្មណ៍យ៉ាងខ្លាំងទៅលើម៉ាក់យាយម្នាក់ ច្រៀងបទចម្រៀងយុវវ័យ ហើយកំពុងតែអង្រួនចិត្តមហាជនម្តងហើយម្តងទៀត តាមរយៈការបកស្រាយចម្រៀងដ៏ពេញនិយមដែលជាបទល្បីរបស់តារាប្រចាំព្រះរាជាណាចក្រកម្ពុជា។
ជាការពិតណាស់ ក្រោយមានការផ្ទុះបាន២បទ ដូចជាបទ «បងកុំបែកឆ្វេង» ជាបទរបស់កញ្ញា តន់ ចាន់សីមា និងបទ «សង្សារលេងៗ ស្រលាញ់មែនទែន» ជាបទរបស់អ្នកនាង ឱក សុគន្ធកញ្ញានោះ ពេលនេះម៉ាក់យាយសុំថែមប៉ុន្មានបទទៀត ហើយក្នុងនោះបទផ្ទុះ គឺជាបទយុវវ័យដដែល គឺបទ «ពិន្ទុ១០០» ដែលគេស្គាល់ថា ជាបទរបស់កំពូលតារាចម្រៀងអ្នកនាង មាស សុខសោភា។ ពោលគឺអាយុគ្រាន់ជាតួរលេង សំខាន់ម៉ាក់យាយអាចធ្វើការបកស្រាយបានដោយរលូន រហូតមានការសំណូមពរជាហូរហែផងដែរ ។ ក្នុងនោះផងដែរ ម៉ាក់យាយក៏បានច្រៀងប៉ុន្មានបទបន្ថែមទៀត ទាំងបុរាណ និងសម័យ ដូចជាបទ «បឹងហ្គាវ៉ាន់សូឡូ» បទ «អោយអូនអស់ចិត្ត» និងបទ «មិនស្រលាញ់មិនបាន»នោះ។
គួរបញ្ជាក់ដែរថា ម៉ាក់យាយឆ្នាំនេះ គឺមានវ័យ៧២ឆ្នាំមកហើយ ប៉ុន្តែនៅតែអាចបកស្រាយចម្រៀងបាន មិនថាបុរាណ ឬក៏សម័យនោះឡើយ ហើយម៉ាក់យាយបច្ចុប្បន្ន កំពុងរស់នៅខេត្តសៀមរាប។
ទន្ទឹមនឹងគ្នានេះដែរ នៅក្នុងបណ្តាញសង្គមយក្ស Tik Tok ដែលម្ចាស់អាក់ខោនឈ្មោះ «ស៊ូស៊ី» បានបង្ហោះវីដេអូដែលលោកយាយជាច្រើនបទ ហើយមានទាំងបទពីដើម និងសម័យ ធ្វើឲ្យមានការកោតសរសើរ និងជូនពរលោកយាយពេញៗមាត់តែម្តង ក្រោយលោកបកស្រាយទៅមានការចាប់ចិត្តច្រើន ក៏ដូចជាការសំណូមជាច្រើនផងដែរ ។ បន្ទាប់ពីឃើញវីដេអូលោកយាយច្រៀងលេងកម្សាន្តអារម្មណ៍បែបនេះ ក៏មានបងប្អូន និងអ្នកនៅលើបណ្តាញសង្គមជាច្រើននាក់ យកវីដេអូលោកយាយផុសបន្ត និងបានសរសេរថា «នេះហើយពេលដែលខ្ញុំចាស់ទៅ» ។
ចំណែកអ្នកខ្លះទៀតថា «លោកយាយច្រៀងពិតជាពីរោះ ក្មេង១៨សុំចាញ់ហើយ» ។ លើសពីនេះទៀត ក៏មានមតិលើកឡើងថា «នេះហើយម៉ាក់យាយដែលខ្ញុំប្រាថ្នា» និងអ្នកខ្លះបន្តទៀតថា «បើស្តាប់នឹងត្រចៀកទៅដូចសំឡេង១៨ តែបើកភ្នែកមើល តាមពិតម៉ាក់យាយសោះ»។
បន្ថែមពីនេះទៀត អ្នកនៅបណ្តាញសង្គមក៏បានសរសើរលោកយាយដែរថា «ចំពោះខ្ញុំផ្ទាល់ពិតជារំភើបណាស់ ពេលដែលឃើញម្តាយឪពុកគាត់សប្បាយចិត្ត មានសុខភាពល្អមាំមួន។ ម៉ាក់យាយ សប្បាយៗ ម៉ាក់យាយសុខភាពល្អ បន្តជាម្លប់ដល់កូនចៅ» ។
គួរបញ្ជាក់ផងដែរថា សូមសុំខន្តីអភ័យទោសផងដែរ ប្រសិនបើមានកន្លែងណាលើសលួសពុំសមគួរ ដោយនេះអាចជាការកម្សាន្តជាលក្ខណៈគ្រួសារតែប៉ុណ្ណោះ ហើយគ្រាន់តែជាការបង្ហោះលេងចែកចាយ ទុកគ្រាន់ជាកម្សាន្តអារម្មណ៍ពីក្រុមគ្រួសារប៉ុណ្ណោះ។
គួររំលឹកថា ៖ ផ្ទុះពេញបណ្តាញសង្គម ក្រោយម៉ាក់យាយរូបស្រស់ បកស្រាយបទយុវវ័យឡើងអេម ៕ អត្ថបទដោយ ៖ លីហួ គីមឆាយ
ចែករំលែកព័តមាននេះ