ទីក្រុងប៉ារីស៖ នៅទីបំផុត នាយករដ្ឋមន្ត្រីបារាំង លោកសេបាត្យៀង ឡឺគ័រនូ (Sébastien Lecornu) ដែលពីមុននេះប្រុងលាលែងពីតំណែង ប៉ុន្តែឥឡូវនេះលោកទទួលបានសំឡេងគាំទ្រគ្រប់គ្រាន់ពីសភាដើម្បីកាន់តំណែងជាបន្តទៀត។ រដ្ឋសភាបោះឆ្នោតរក្សាតំណែងលោកឡឺគ័រនូដើម្បីទុកឱកាសឱ្យលោកធ្វើកិច្ចការដ៏ធំ១។…
ទីក្រុងប៉ារីស៖ នៅទីបំផុត នាយករដ្ឋមន្ត្រីបារាំង លោកសេបាត្យៀង ឡឺគ័រនូ (Sébastien Lecornu) ដែលពីមុននេះប្រុងលាលែងពីតំណែង ប៉ុន្តែឥឡូវនេះលោកទទួលបានសំឡេងគាំទ្រគ្រប់គ្រាន់ពីសភាដើម្បីកាន់តំណែងជាបន្តទៀត។ រដ្ឋសភាបោះឆ្នោតរក្សាតំណែងលោកឡឺគ័រនូដើម្បីទុកឱកាសឱ្យលោកធ្វើកិច្ចការដ៏ធំ១។ នោះគឺការបញ្ចុះបញ្ចូលបណ្ដាគណបក្សនានានៅក្នុងរដ្ឋាភិបាលចម្រុះជាមួយគ្នា និងគណបក្សក្រៅរដ្ឋាភិបាលដើម្បីគាំទ្រគម្រោងចំណាយថវិកាជាតិឆ្នាំ២០២៦។
នៅពេលលោកឡឺគ័រនូអាចកាន់តំណែងជាបន្តទៀតបែបនេះក៏អាចជួយសម្រាលបន្ទុករបស់លោកម៉ាក្រុងខ្លះៗដែរ។ កាលពីមុននេះមានសេណារីយោធំៗ២សម្រាប់លោកម៉ាក្រុង។ ទី១លោកត្រូវជ្រើសរើសនាយករដ្ឋមន្ត្រីថ្មី និងទី២លោកត្រូវរំលាយសភាដើម្បីរៀងចំការបោះឆ្នោតជ្រើសតាំងអ្នកតំណាងរាស្ត្រឡើងវិញ។ មានក្រុមខ្លះចង់ទាមទារឱ្យលោកម៉ាក្រុងចុះចេញពីតំណែងតែម្ដង។ ប៉ុន្តែបញ្ហាអស់ទាំងនេះលែងជាការអំពល់ទុក្ខសម្រាប់លោកតទៅទៀតហើយ។
គិតទាំងលើកនេះទៀត លោកឡឺគ័រនូធ្លាប់ហែលឆ្លងការកោះប្រជុំសភាដើម្បីបោះឆ្នោតដកសេចក្ដីទុកចិត្តទៅលើរូបលោកចំនួនពីរដងរួចមកហើយ។ ម្ដងស្នើឡើងដោយគណបក្សឆ្វេងនិយមជ្រុលរបស់បារាំងដែលជាអ្នកប្រឆាំងនឹងនយោបាយរបស់លោកម៉ាក្រុងយ៉ាងដាច់ក្បាលដាច់កន្ទុយ និងម្ដងទៀតស្នើឡើងដោយគណបក្សសមាជជាតិរបស់លោកស្រីម៉ារីន ឡឺពែន (Marine Le Pen) និងសម្ព័ន្ធមិត្តរបស់លោកស្រី។
ទោះបីលោកឡឺគ័រនូអាចឆ្លងកាត់ឧបសគ្គទាំងនេះ ប៉ុន្តែមិនមែនមានន័យថាលោករួចចាកផុតទុក្ខទាំងស្រុងទេ។ ដើម្បីទទួលបានការគាំទ្រដ៏ពេញលេញពីសភា លោកត្រូវថ្លឹងថ្លែងទៅលើកម្មវិធីនយោបាយរបស់លោកម៉ាក្រុងដ៏ធំមួយ ប៉ុន្តែដ៏មិនសូវទទួលបានការគាំទ្រ នោះគឺការដំឡើងអាយុចូលនិវត្ត។ សព្វថ្ងៃនេះ ច្បាប់នៅប្រទេសបារាំងកំណត់អាយុចូលនិវត្ត៦២ឆ្នាំ។ ប៉ុន្តែលោកម៉ាក្រុងចង់ដំឡើងដល់អាយុ៦៤ឆ្នាំចាំចូលនិវត្ត៕
ចែករំលែកព័តមាននេះ