រាជធានីភ្នំពេញ ៖ យោងតាមផេកក្រសួងការពារជាតិ បានប្រកាស នារសៀលថ្ងៃទី១៦ ខែតុលានេះថា ៖ លោកជំទាវ ឧត្តមសេនីយ៍ឯក ម៉ាលី…
រាជធានីភ្នំពេញ ៖ យោងតាមផេកក្រសួងការពារជាតិ បានប្រកាស នារសៀលថ្ងៃទី១៦ ខែតុលានេះថា ៖ លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានឱ្យដឹងថា នៅរសៀលថ្ងៃទី១៦ ខែតុលា ឆ្នាំ២០២៥ នេះ ក្រុមការងារសម្របសម្រួលចម្រុះ (JCTF) កម្ពុជា-ថៃ បានរៀបចំកិច្ចប្រជុំលើកទី ៣ តាមប្រព័ន្ធ Video Conference (VTC) ។
ក្នុងនោះដែរ ក្រសួងការពារជាតិបានបន្តថា ក្រុមការងារសម្របសម្រួលចម្រុះ (JCTF) កម្ពុជា-ថៃ លើការងារដោះមីនមនុស្សធម៌ នៃប្រទេសទាំងពីរ បានរៀបចំកិច្ចប្រជុំលើកទី៣ តាមប្រព័ន្ធ VTC ដើម្បីបន្តពិភាក្សាលើខ្លឹមសារដែលនៅសេសសល់មួយចំនួន នៃសេចក្ដីព្រាងនិយាមនីតិវិធីប្រតិបត្តិ (SOP) របស់ក្រុមការងារសម្របសម្រួលចម្រុះ (JCTF) បន្ទាប់ពីកិច្ចប្រជុំលើកទី២ របស់ក្រុមការងារ JCTF កាលពីថ្ងៃទី៩ ខែតុលា ឆ្នាំ២០២៥ ។
និយាមនីតិវិធីប្រតិបត្តិ (SOP)នេះ ត្រូវបានរៀបចំ និងតាក់តែង ឡើងយ៉ាងម៉ត់ចត់ ជាមួយស្មារតីគោរពតាមគោលការណ៍ការពារអធិបតេយ្យ និងបូរណភាពទឹកដីដោយម៉ឺងម៉ាត់ ព្រមទាំងឈរលើស្មារតីគោរពគ្នាទៅវិញទៅមកក្នុងនាមប្រទេសជិតខាង ៕
ចែករំលែកព័តមាននេះ