ទីក្រុងវ៉ាស៊ីនតោន៖ គិតទៅ ចាប់តាំងពីអាមេរិកបិទដំណើរការរដ្ឋាភិបាលដំបូងកាលពីដើមខែតុលារហូតមកដល់ពេលនេះមានរយៈពេលកន្លះខែហើយ។ កាលពីមុននេះ រដ្ឋមន្ត្រីក្រសួងរតនាគារអាមេរិកថ្លែងថាការបិទដំណើរការធ្វើឱ្យប្រទេសជាតិខាតបង់ថវិកា១៥ពាន់លានដុល្លារក្នុងមួយថ្ងៃៗ។ ប៉ុន្តែក្រោយមក មន្ត្រីជាន់ខ្ពស់អាមេរិកសូមកែតម្រូវតួលេខនេះឡើងវិញថាខាតបង់១៥ពាន់លានដុល្លារក្នុងមួយសប្ដាហ៍។ ដូច្នេះរយៈពេលជាង២សប្ដាហ៍កន្លងទៅនេះអាចខាតអស់យ៉ាងតិច៣០ពាន់លានដុល្លារ។
រដ្ឋមន្ត្រីក្រសួងរតនាគារ លោកស្កត់បឺសឹន (Scott Bessent) និយាយខុសពីរដងពាក់ព័ន្ធនឹងតួលេខខាតបង់នេះ។ ទន្ទឹមនឹងនោះ លោកសូមអំពាវនាវឱ្យក្រុមប្រជាធិបតេយ្យដើរតួជាអ្នកវីរបុរសស្នេហាជាតិរួមដៃគ្នាជាមួយក្រុមសាធារណរដ្ឋដើម្បីបិទបញ្ចប់ការបិទដំណើរការរដ្ឋាភិបាល។ មន្ត្រីម្នាក់របស់ក្រសួងរតនាគារដែលស្នើសុំមិនបញ្ចេញឈ្មោះប្រាប់ថាតួលេខ១៥ពាន់លានដុល្លារក្នុងមួយសប្ដាហ៍នោះដោយយោងទៅលើរបាយការណ៍របស់ទីប្រឹក្សាសេតវិមានទទួលបន្ទុកខាងក្រុមប្រឹក្សាសេដ្ឋកិច្ច។
លោកស្កត់បឺសឹនថ្លែងនៅក្នុងសន្និសីទសាព័ត៌មានថាការបិទដំណើរការរដ្ឋាភិបាលចាប់ផ្ដើមធ្វើឱ្យសេដ្ឋកិច្ចរបស់អាមេរិកអស់ឥទ្ធិពលជាបណ្ដើរៗហើយ។ សកម្មភាពវិនិយោគនៅក្នុងសេដ្ឋកិច្ចអាមេរិក (រួមទាំងការវិនិយោគលើវិស័យបញ្ញាសិប្បនិម្មិត) មានស្ថិរភាពជាធម្មតា។ ប៉ុន្តែលោកបឺសឹនយល់ថាបើបន្តបិទរដ្ឋាភិបាលបែបនេះទៀតអាចនឹងធ្វើឱ្យសេដ្ឋកិច្ចជាតិដើរធាក់ថយជាមិនខាន។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ