ខេត្តសៀមរាប ៖ ដូចដែលលោកអ្នកជ្រាបហើយថា កំហឹ.ងមហាជនជុំវិញករណីដែលបង្កឡើយដោយមន្ត្រីអាជ្ញាធរជាតិអប្សរា ពាក់ព័ន្ធហិ.ង្សាទៅលើក្មេងប្រុសលក់អណ្តើកមុខប្រាសាទអង្គរវត្តនោះ ត្រូវបានពន្លត់ឱ្យស្ងប់ស្ងាត់ទៅវិញត្រឹមព្រឹកថ្ងៃទី១៣ ខែមករា ឆ្នាំ២០២៤ បន្ទាប់មន្ត្រីទាំង២នាក់ ត្រូវបានសមត្ថកិច្ចវា.យខ្នោះ និងវាស់កម្ពស់បានសម្រេច។
តាមធម្មតា ក្រោយភ្លៀងមេឃតែងតែស្រឡះ ប៉ុន្តែសម្រាប់អាជ្ញាធរជាតិអប្សរា ដែលទើបរងព្រនង់ធំៗ២ ហើយផ្ទួនៗក្នុងថ្ងៃតែមួយពីមហាជន គឺ ១- រឿងប្រើហិ.ង្សា និង២- រឿងអន់ខ្សោយទៅលើចំណាត់ការ មិនទាន់បាត់ឈឺក្បាលស្រួលបួលផង ស្រាប់តែចូលដល់រឿងទី៣ ថ្មីមួយរឿងទៀតហើយ។
នេះបានហៅថា «យីអ៊ុនដាក់ អារក្សជាន់» ក្រោយពីរឿងទី១ ទី២ ទើបតែស្ងាប់ស្ងាត់មិនទាន់បានមួយដង្ហើមចង្រិតផង ស្រាប់តែផ្ទុះរឿងទី៣ ផ្តើមចេញពីមន្ត្រីស្រីនៃអាជ្ញាធរអប្សរាម្នាក់ទៀតមានឈ្មោះ យ៉ាន់ សុជាតា ដោយមន្ត្រីរូបនេះ បានបង្ហោះតាមហ្វេសប៊ុករបស់ខ្លួន ហើយប្រើពាក្យសម្តីបែបលើសប៊ីចេង ខ្វះការអប់រំ តបទៅកាន់មហាជនដែលរិះគន់លើករណីហិ.ង្សាខាងលើ ដោយពាក្យមួយឃ្លាថា «ដឹងជាកុមារត្រូវគ្រា.ប់អីហាស់ ក្បាលឡើងកញ្ចាស់ហើយនឹងណា កុមារៗនឹងអត់មានមើលមុខអាកុមារនឹងសោះ ចង់ចាស់ជាងមុខអាអ្នកតែស្ករ រិះគន់ និងអាណិតទៀត»។ ត្រង់ពាក្យ «កុមារត្រូវគ្រា.ប់អីហាស់ក្បាលឡើងកញ្ចាស់» គឺមន្ត្រីស្រីម្នាក់នេះ ចង់សំដៅលើកុមាររងគ្រោះ ដែលត្រូវមន្ត្រីអប្សរាទះកំផ្លៀង ដោយឡែកពាក្យ «អាអ្នកតែស្ករ» មន្ត្រីស្រីម្នាក់នេះ ចង់សំដៅទៅលើមហាជន។
ការចេញមុខមកការពារមិត្តរួមការងារទាំងទទឹងទិស ហើយប្រើពាក្យពេចនន៍ខ្វះក្រមសីលធម៌បែបនេះ ហាក់បីដូចជា យកសាំងទៅចាក់ ហើយកេសដែកកេះពីលើរងើកភ្លើងកំហឹ.ងរបស់មហាជនដែលទើបតែរលត់ឱ្យផ្ទុះឆេះឡើងវិញ រហូតពួកគាត់លើកឡើងថា «សម្តីសជាតិ មាឃាទ.សពូជ អនិច្ចាមន្ត្រីអប្សរា មន្ត្រីប្រុសចូលចិត្តប្រើហិ.ង្សា មន្ត្រីស្រីចូលចិត្តប្រើសម្តីបាតផ្សារ»។
ក្រោយផ្ទុះប្រតិកម្មយ៉ាងខ្លាំង មន្ត្រីអប្សរា យ៉ាន់ សុជាតា ក៏បានលុបសារចោលវិញ ប៉ុន្តែអ្វីៗបានហួសពេលទៅហើយ ព្រោះសារទាំងនោះ ត្រូវបានថតទុក និងបន្តចែករំលែកយ៉ាងផុសផុល ហើយមហាជនមួយចំនួនចោទជាសំណួរទៅកាន់អាជ្ញាធរជាតិអប្សរាថា បកស្រាយមើល នេះមែនទេ សម្តីបុគ្គលិក នេះមែនទេសម្តីអ្នកចេះដឹង ឬក៏បង់លុយចូល ឬក៏ចូលតាមខ្សែ វាដូចជាហួសហេតុពេកហើយ តើនៅសល់មន្ត្រីធុនៗហ្នឹងប៉ុន្មាននាក់ទៀត?
ជុំវិញក្រមសីលធម៌របស់មន្ត្រីនេះផងដែរ គេនៅចាំបានថា ការបំភ្លឺបកស្រាយរបស់អាជ្ញាធរអប្សរាកាលពីថ្ងទី១២ ខែមករា ឆ្នាំ២០២៤ នៅត្រង់ចំណុចទី២ និងចំណុចទី៣ ដែលបញ្ជាក់ថា «ថ្នាក់ដឹកនាំពាក់ព័ន្ធនៃអាជ្ញាធរជាតិអប្សរា ជានិច្ចកាលតែងតែបានណែនាំដល់មន្ត្រី បុគ្គលិក ភ្នាក់ងារ ពលករ និងឆ្មាំង នៃអាជ្ញាធរជាតិអប្សរា ឱ្យប្រកាន់ខ្ជាប់នូវក្រមសីលធម៌វិជ្ជាជីវៈ និងចៀសវាងឱ្យបានជាដាច់ខាតនូវការប្រើប្រាស់អំពើហិ.ង្សាក្នុងការដោះស្រាយបញ្ហានានា។
៣- អាជ្ញាធរជាតិអប្សរាមិនគាំទ្រ និងមិនអាចទទួលយកបានជាដាច់ខាត នូវរាល់ការប្រើប្រាស់ អំពើហិ.ង្សាក្នុងការអនុវត្តការងារ ដែលធ្វើឱ្យប៉ះពាល់ដល់វិន័យ សីលធម៌ និងគុណធម៌ ដែលមានជាធរមានក្នុងលក្ខន្តិកៈរបស់មន្ត្រីរាជការស៊ីវិល-បុគ្គលិកសាធារណៈ។
សូមបញ្ជាក់បន្ថែមថា យោងតាមការបំភ្លឺរបស់ស្នងការនគរបាលខេត្តសៀមរាប បានបញ្ជាក់ថា ក្មេងប្រុសលក់អណ្តើកដែលត្រូវបានមន្ត្រីអប្សរាទះកំផ្លៀង និងទាត់នោះ មិនមែនជាកុមារ គឺគេមានអាយុ១៩ឆ្នាំមកហើយ និងមានឈ្មោះថា «ណុល សំណាង»។ ហើយអណ្តើកដែលក្មេងប្រុសលក់នោះ គឺចាប់ពីក្នុងកសិន្ធអង្គរ ជាមួយគ្នីគ្នារបស់គេពីរនាក់ទៀត។
ដោយឡែកជុំវិញ វីដេអូមួយទៀត ដែលមានក្មេងលក់អណ្តើកចុះហែលឡើងក្នុងទឹកកសិដអង្គរ ដែលមហាជនរឿងឆ្ងល់នោះ ត្រូវបានស្នងការនគរបាលខេត្តសៀមរាប បញ្ជាក់ឱ្យដឹងដែរថា គឺជាម្នាក់ក្នុងចំណោមគ្នីគ្នា៣នាក់របស់យុវជន ណុល សំណាង គឺឈ្មោះ បាយ បីត អាយុ២២ឆ្នាំ។ ចំពោះមូលហេតុដែលយុវជនម្នាក់នេះ ហក់ចូលទឹក ព្រោះតែរត់គេចពីកម្លាំងសណ្តាប់ធ្នាប់របស់អាជ្ញាធរអប្សរា ដែលដេញចាប់ពួកគេ ក្រោយពីឃើញពួកគេលក់កូនអណ្តើក៥ក្បាលបានលុយ៥ម៉ឺនរៀលទៅអោយភ្ញៀវទេសចរនៅបរិវេណរានហាលអង្គរ។
គួររំលឹកថា ៖ ទីបំផុត ! មន្ត្រីអប្សរាប្រើហិ.ង្សាលើកុមារលក់អណ្តើកមុខអង្គរវត្តត្រូវសមត្ថកិច្ចឃាត់ខ្លួនហើយ ៕
អត្ថបទដោយ ៖ អោម ចែតច័ន្ទណារ៉ា
ចែករំលែកព័តមាននេះ