រាជធានីភ្នំពេញ ៖ មន្ត្រីក្រសួងសុខាភិបាលបាននិយាយឱ្យដឹងកាលពីម្សិលមិញថា ការរាតត្បាតនៃជំងឺគ្រុនឈាមបានឈានដល់ការប្រកាសអាសន្ន ខណៈពេលដែលមានអ្នកជំងឺគ្រុនឈាមប្រមាណ៨៤៥នាក់កំពុងសម្រាកព្យាបាលតាមមន្ទីរពេទ្យ ក្នុងនោះ៨នាក់បានស្លា.ប់ ប្រៀបធៀបឆ្នាំ២០១០ អ្នកជំងឺមាន៧៣១នាក់ ក្នុងនោះស្លា.ប់ចំនួន៤នាក់
រាជធានីភ្នំពេញ ៖ មន្ត្រីក្រសួងសុខាភិបាលបាននិយាយឱ្យដឹងកាលពីម្សិលមិញថា ការរាតត្បាតនៃជំងឺគ្រុនឈាមបានឈានដល់ការប្រកាសអាសន្ន ខណៈពេលដែលមានអ្នកជំងឺគ្រុនឈាមប្រមាណ៨៤៥នាក់កំពុងសម្រាកព្យាបាលតាមមន្ទីរពេទ្យ ក្នុងនោះ៨នាក់បានស្លាប់ ប្រៀបធៀបឆ្នាំ២០១០ អ្នកជំងឺមាន៧៣១នាក់ ក្នុងនោះស្លាប់ចំនួន៤នាក់។
លោកវេជ្ជបណ្ឌិត ង៉ាន់ ច័ន្ទថា នាយករងមជ្ឈមណ្ឌលជាតិប្រយុទ្ធជំងឺគ្រុនចាញ់ និងជានាយកកម្មវិធីជាតិប្រយុទ្ធជំងឺគ្រុនឈាម បានឱ្យដឹងថា តាមតួលេខដែលទទួលបាន សំខាន់តួលេខអ្នកស្លាប់ដោយជំងឺគ្រុនឈាមគឺអាចនិយាយថា ជាពេលវេលាដែលយើងត្រូវប្រកាសអាសន្ន ហើយរួមគ្នាទប់ស្កាត់ឱ្យបានទាន់ពេលវេលា។ លោកបញ្ជាក់ថា ស្ថានភាពជំងឺគ្រុនឈាមក្នុងឆ្នាំ២០១១នេះមានទ្រង់ទ្រាយធំប្រហាក់ប្រហែលគ្នានឹងឆ្នាំ១៩៩៣ និងឆ្នាំ២០០៧ ដែលមានការប្រកាសអាសន្នផងដែរ។ ប៉ុន្តែលោកគិតថា ដោយសារមានការយកចិត្តទុកដាក់ និងណែនាំជាប្រចាំរបស់ថ្នាក់ដឹកនាំក្រសួងសុខាភិបាល និងមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ពិសេសកម្មវិធីជាតិប្រយុទ្ធនឹងជំងឺគ្រុនឈាម រួមទាំងកិច្ចសហការគ្នាល្អជាមួយមន្ទីរសុខាភិបាលទាំង២៤ខេត្ត-រាជធានី យើងអាចក្តាប់សភាពការណ៍បានទាន់ពេលវេលា ដើម្បីចាត់វិធានការទប់ស្កាត់។
លោកវេជ្ជបណ្ឌិត ង៉ាន់ ច័ន្ទថា មានប្រសាសន៍ថា ចាប់ពីអាទិត្យទី១ ដល់អាទិត្យទី៨ ឆ្នាំ២០១១ នេះ ស្ថានភាពនៃជំងឺគ្រុនឈាមមានលក្ខណៈជាប្រកាសអាសន្ន។ ប៉ុន្តែដោយកិច្ចសហការគ្នាល្អនោះ គឺធ្វើឱ្យសភាពការណ៍នៃជំងឺគ្រុនឈាមបានធូរស្រាលឡើងវិញនៅអាទិត្យទី៩ ឆ្នាំ២០១១។ លោកក៏បានធ្វើការកត់សម្គាល់ថា ចាប់ពីអាទិត្យទី១៨ ដល់អាទិត្យទី១៩ ស្ថានភាពបានធ្លាក់ចុះមកធ្ងន់ធ្ងរឡើងវិញដោយសារជារដូវភ្លៀងធ្លាក់ ដែលធ្វើឱ្យមានជម្រកមូសគ្រប់ទីកន្លែង បណ្តាលឱ្យដង់ស៊ីតេនៃជំងឺគ្រុនឈាមមានការកើនឡើងខ្ពស់តែម្តង។ ដូច្នេះហើយទើបក្នុងអាទិត្យទី២០នេះ អត្រានៃចំនួនអ្នកជំងឺដែលបានចូលមកសម្រាកនៅមន្ទីរពេទ្យមានរហូតដល់៨៤៥នាក់ ក្នុងនោះអ្នកស្លាប់៨នាក់ដែលជាអត្រាខ្ពស់ប្រៀបធៀបឆ្នាំ២០១០ ដែលអ្នកជំងឺមានចំនួន៧៣១នាក់ ក្នុងនោះអ្នកស្លាប់៤នាក់ប៉ុណ្ណោះ។ ដោយឡែកបើប្រៀបធៀបនឹងឆ្នាំ២០០៩ អ្នកជំងឺសម្រាកពេទ្យមានចំនួន១.៦៧៧នាក់ តែអ្នកស្លាប់មានតែ៤នាក់ដូចគ្នាឆ្នាំ២០១០ដែរ។ យោងតាមតួលេខឆ្នាំ២០១១នេះ គឺចំនួនអ្នកស្លាប់មានការកើនឡើងពាក់កណ្តាលបើប្រៀបធៀបឆ្នាំ២០០៩ និងឆ្នាំ២០១០ ដែលចំនួននេះធ្វើឱ្យមានការចាប់អារម្មណ៍ ឬអាចនិយាយថា ជាការប្រកាសអាសន្នសម្រាប់ជំងឺគ្រុនឈាមនៅកម្ពុជា។
លោកបញ្ជាក់ថា ការផ្ទុះឡើងនូវជំងឺគ្រុនឈាមនេះ គឺមិនមែនទ្រង់ទ្រាយធំ ឬទូទាំងប្រទេសនោះទេ គឺកើតឡើងក្នុងតំបន់មួយចំនួនសំខាន់តំបន់ដាច់ស្រយាលប៉ុណ្ណោះ។ ជាក់ស្តែងជំងឺគ្រុនឈាមកើតមាននៅឃុំមួយក្នុងស្រុកសន្ទុក ខេត្តកំពង់ធំ បណ្តាលឱ្យក្មេង២នាក់ស្លាប់។ ប្រឈមមុខស្ថានភាពនោះ ក្រសួងសុខាភិបាលបានបញ្ចុះមន្ត្រីជំនាញទៅកាន់តំបន់នោះ ដើម្បីធ្វើការអប់រំណែនាំដល់បងប្អូនប្រជាពលរដ្ឋអំពីការថែរក្សាអនាម័យ រួមទាំងការពិនិត្យ និងព្យាបាលជូនដល់អ្នកជំងឺដល់ទីកន្លែងតែម្តង។
ទោះបីជាយ៉ាងណាក៏ដោយ លោកវេជ្ជបណ្ឌិត ង៉ាន់ ច័ន្ទថា បានអះអាងថា ក្រសួងសុខាភិបាល និងមជ្ឈមណ្ឌលជាតិប្រយុទ្ធជំងឺគ្រុនចាញ់ ពិសេសកម្មវិធីជាតិប្រយុទ្ធជំងឺគ្រុនឈាម រួមជាមួយបណ្តាញសុខាភិបាលទូទាំងប្រទេសកំពុងតែសហការគ្នា ដើម្បីប្រយុទ្ធប្រឆាំង និងទប់ស្កាប់ការរីករាលដាលនៃជំងឺគ្រុនឈាមយ៉ាងសកម្មបំផុត។ ប៉ុន្តែដើម្បីទប់ស្កាត់គ្រោះថ្នាក់នៃជំងឺគ្រុនឈាមនេះ កត្តាសំខាន់បំផុតនោះ គឺប្រជាពលរដ្ឋតែម្តងដែលគាត់ត្រូវអនុវត្តតាមការណែនាំស្តីពីការថែរក្សាអនាម័យ និងកម្មវិធីដាក់ថ្នាំអាបែតក្នុងទឹកពាងជាប្រការសំខាន់បំផុត៕
ចែករំលែកព័តមាននេះ