ផ្ទុះភ្នំភ្លើង! ឥណ្ឌូណេស៊ីប្រកាសអាសន្នកម្រិតខ្ពស់ និងជម្លៀសមនុស្សរាប់ម៉ឺននាក់
ឥណ្ឌូនេស៊ី ៖ ក្រោយពីបានបង្ហាញសញ្ញាគ្រោះថ្នាក់អស់ជាច្រើនសប្តាហ៍កន្លងមកនោះ ឈានមកដល់
ឥណ្ឌូនេស៊ី ៖ ក្រោយពីបានបង្ហាញសញ្ញាគ្រោះថ្នាក់អស់ជាច្រើនសប្តាហ៍កន្លងមកនោះ ឈានមកដល់ថ្ងៃទី១០ ខែមករា ឆ្នាំ២០២៤នេះភ្នំភ្លើង Lewotobi Laki-Laki ដ៏សកម្មនៅនៅលើដែនកោះ Flores ភាគខាងកើតប្រទេសឥណ្ឌូនេស៊ី បានផ្ទុះឡើងជំរុញឱ្យរដ្ឋាភិបាលចេញបញ្ជាឱ្យជម្លៀសប្រជាពលរដ្ឋដែលរស់នៅជុំវិញតំបន់នោះ ដោយប្រកាសអាសន្នកម្រិតខ្ពស់បំផុត។ នេះបើយោងតាមការផ្សាយរបស់សារព័ត៌មាន channelnewsasia នៅថ្ងៃនេះ។
មន្ត្រីក្នុងតំបន់បានប្រាប់ AFP នៅថ្ងៃពុធនេះថា «ប្រជាជនត្រូវបានជម្លៀសភ្លាមៗទៅកាន់ទីតាំងដែលស្ថិតក្នុងសុវត្ថិភាព ដើម្បីជៀសវាងគ្រោះថ្នាក់ដែលបង្ករដោយកម្អែពីភ្នំភ្លើង។ អាជ្ញាធរក្នុងតំបន់បានបង្កើតជម្រកបណ្តោះអាសន្នចំនួនពីរ ដែលបច្ចុប្បន្នកំពុងផ្ទុកមនុស្សប្រហែល ៥០០០នាក់។
ប្រធានមជ្ឈមណ្ឌលកាត់បន្ថយគ្រោះមហន្តរាយភ្នំភ្លើង និងភូគព្ភសាស្ត្រ (PVMBG) លោក Hendra Gunawan បាននិយាយនៅក្នុងសេចក្តីថ្លែងការណ៍មួយថា អ្នកស្រុកត្រូវបានគេណែនាំឱ្យប្រុងប្រយ័ត្នចំពោះទឹកជំនន់ដែលអាចកើតមាន នៅពេលដែលលំហូរភក់នៃភ្នំភ្លើងបានហូរចូលទៅក្នុងទន្លេ។ លោកបានបន្ថែមថា មនុស្សគួរតែពាក់ម៉ាស់ «ដើម្បីការពារគ្រោះថ្នាក់នៃផេះភ្នំភ្លើងដល់ប្រព័ន្ធដង្ហើម»។
កាលពីថ្ងៃអង្គារម្សិលមិញ អាជ្ញាធរឥណ្ឌូណេស៊ីក៏បានប្រកាសពីស្ថានភាពប្រកាសអាសន្ននៃភ្នំភ្លើងមួយទៀត គឺភ្នំភ្លើង Marapi ដែលស្ថិតនៅលើកោះស៊ូម៉ាត្រា ដល់កម្រិតខ្ពស់បំផុតទីពីរ និងបានដាក់តំបន់ហាមឃាត់ចម្ងាយ 4.5 គីឡូម៉ែត្រដែលជំរុញឱ្យមានជន្លៀស អ្នកស្រុកជាង ២០០០នាក់ទៅកាន់ទីជម្រកបណ្តោះអាសន្ន។
ទីភ្នាក់ងារព័ត៌មានរដ្ឋ Antara បានរាយការណ៍ថា ផេះភ្នំភ្លើងក៏បានបង្ខំឱ្យអាកាសយានដ្ឋាន Frans Seda ដែលមានចំងាយជាង 80 គីឡូម៉ែត្រត្រូវបិទចាប់តាំងពីថ្ងៃចន្ទ។
ប្រទេសដែនកោះប្រចាំតំបន់អាស៊ីអាគ្នេយ៍មួយនេះ ស្ថិតនៅលើក្រវ៉ាត់ភ្លើងប៉ាស៊ីហ្វិក ដែលជាតំបន់ដែលមានសកម្មភាពភ្នំភ្លើង និងរញ្ជួយដីខ្លាំង ដោយមានភ្នំភ្លើងសកម្មជិត១៣០។ កាលពីខែមុន បន្ទុះភ្នំភ្លើង Marapi នៅលើកោះស៊ូម៉ាត្រាបានសម្លាប់មនុស្ស ២៣នាក់៕ (ដោយ៖អោម ចែតច័ន្ទណារ៉ា)
ចែករំលែកព័តមាននេះ