វៀតណាម ៖ វៀតណាម កំពុងស្នើសុំដោយទទូទឲ្យសហរដ្ឋអាមេរិកពិចារណាឡើងវិញនូវការសម្រេចចិត្តដែលអាចនាំទៅដល់ការហាមឃាត់ការនាំចូលអាហារសមុទ្ររបស់វៀតណាមមួយចំនួន ទៅកាន់ទីផ្សារអាមេរិកចាប់ពីឆ្នាំ២០២៦ ដែលនឹងជះផលអវិជ្ជមានធ្ងន់ធ្ងរដល់សេដ្ឋកិច្ចវៀតណាម ស្របពេលដែលវាបានរងផលប៉ះពាល់ស្រាប់ទៅហើយ បន្ទាប់ពីអាមេរិកកំណត់អត្រាពន្ធគយ២០% លើទំនិញរបស់វៀតណាម ដែលចាប់អនុវត្តពីថ្ងៃទី៧…
វៀតណាម ៖ វៀតណាម កំពុងស្នើសុំដោយទទូទឲ្យសហរដ្ឋអាមេរិកពិចារណាឡើងវិញនូវការសម្រេចចិត្តដែលអាចនាំទៅដល់ការហាមឃាត់ការនាំចូលអាហារសមុទ្ររបស់វៀតណាមមួយចំនួន ទៅកាន់ទីផ្សារអាមេរិកចាប់ពីឆ្នាំ២០២៦ ដែលនឹងជះផលអវិជ្ជមានធ្ងន់ធ្ងរដល់សេដ្ឋកិច្ចវៀតណាម ស្របពេលដែលវាបានរងផលប៉ះពាល់ស្រាប់ទៅហើយ បន្ទាប់ពីអាមេរិកកំណត់អត្រាពន្ធគយ២០% លើទំនិញរបស់វៀតណាម ដែលចាប់អនុវត្តពីថ្ងៃទី៧ ខែសីហា ឆ្នាំ២០២៥មក ។
នៅថ្ងៃទី១៥ ខែកញ្ញា ឆ្នាំ២០២៥ លោក Nguyen Hong Dien រដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម បានផ្ញើលិខិតមួយច្បាប់ជូន ទៅរដ្ឋមន្ត្រីក្រសួងពាណិជ្ជកម្មអាមេរិក ដើម្បីស្នើសុំ «ការពិចារណាឡើងវិញ» នូវសេចក្តីសម្រេចចិត្ត កាលពីខែសីហាដោយរដ្ឋបាលមហាសមុទ្រ និងបរិយាកាសជាតិអាមេរិក ហៅកាត់ថា (NOAA) នៃក្រសួងពាណិជ្ជកម្មសហរដ្ឋអាមេរិក ដែលបានកំណត់ថា វិធីសាស្ត្រនេសាទរបស់វៀតណាមមួយចំនួនដែលបង្កហានិភ័យដល់ថនិកសត្វសមុទ្រ ដោយយោងតាមច្បាប់ការពារថនិកសត្វសមុទ្រសហរដ្ឋអាមេរិក (MMPA)។
យោងតាមទិន្នន័យគយរបស់វៀតណាម សហរដ្ឋអាមេរិក គឺជាទីផ្សារអាហារសមុទ្រដ៏ធំបំផុតមួយរបស់វៀតណាម ដោយការនាំចេញ ចាប់ពីខែមករា ដល់ខែសីហា ឆ្នាំ២០២៥ បានកើនឡើង ៦.៩% បើធៀបនឹងឆ្នាំ២០២៤ ដែលមានតម្លៃដល់ទៅ១២០០លានដុល្លារ ដែលស្មើនឹង១៧.៣ ភាគរយនៃការនាំចេញអាហារសមុទ្រសរុបរបស់វៀតណាម ។
គួរកត់សម្គាល់ថា កាលពីខែសីហា រដ្ឋបាលមហាសមុទ្រ និងបរិយាកាសជាតិ បានជូនដំណឹងទៅក្រសួងកសិកម្មវៀតណាមថា វៀតណាមនឹងត្រូវបានហាមឃាត់មិនឲ្យនាំចេញត្រី និងគ្រឿងសមុទ្រសរុប១២ប្រភេទ ទៅកាន់សហរដ្ឋអាមេរិក ចាប់ពីថ្ងៃទី១ ខែមករា ឆ្នាំ២០២៦» ។
ការហាមឃាត់របស់អាមេរិកត្រូវបានរដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម អះអាងថា នឹងប៉ះពាល់ដល់ការនាំចេញអាហារសមុទ្រដ៏សំខាន់របស់វៀតណាម រួមមាន ត្រីធូណា ត្រី៤ប្រភេទផ្សេងទៀត រួមទាំង ក្ដាម និងមឹក ផងដែរ ។
លោកសង្ឃឹមថា អាមេរិកនឹងដកបំរាមនេះចេញ ដើម្បីបញ្ជៀសការរាំងស្ទះធ្ងន់ធ្ងរដល់ពាណិជ្ជកម្មទ្វេភាគី និងការពារជីវភាពរស់នៅរបស់ប្រជាជនវៀតណាមរាប់រយពាន់នាក់ ដែលជាអ្នកនេសាទ និងកម្មករក្នុងវិស័យនេសាទ» ។
សហរដ្ឋអាមេរិកដែលជាទីផ្សារនាំចេញដ៏ធំបំផុតរបស់វៀតណាម បានដាក់ពន្ធ២០ ភាគរយលើការនាំចេញរបស់វៀតណាម ចាប់ពីថ្ងៃទី៨ ខែសីហា ខណៈការដឹកជញ្ជូនបន្តតាមរយៈវៀតណាមពីប្រទេសទីបី ប្រឈមនឹងពន្ធ៤០ភាគរយ ។
យោងតាមទិន្នន័យគយវៀតណាម ការនាំចេញរបស់វៀតណាមទៅកាន់សហរដ្ឋអាមេរិកក្នុងខែសីហាបានធ្លាក់ចុះ២ភាគរយ បើធៀបនឹងខែកក្កដា មកនៅត្រឹម១៣.៩ ពាន់លានដុល្លារ។
គួររំលឹកថា កាលពីឆ្នាំ២០១៧ គណៈកម្មការអឺរ៉ុបក៏បានចេញ «ប័ណ្ណលឿង» ទៅកាន់វៀតណាម បន្ទាប់ពីចោទប្រកាន់ថា វៀតណាមមិនបានគ្របគ្រងឱ្យបានដិតដល់លើការងារប្រយុទ្ធប្រឆាំងនឹងការនេសាទខុសច្បាប់ ដែលនាំឲ្យមានការធ្លាក់ចុះនៃការនាំចេញអាហារសមុទ្ររបស់វៀតណាមទៅកាន់សហភាពអឺរ៉ុប ។
បញ្ហាខាងលើនេះ នៅមិនទាន់រាប់បញ្ចូល ដល់ការរកឃើញសារធាតុហាមឃាត់ កម្រិតបារ៉ត និងគុណភាពគ្រឿងវៀតណាមនៅឡើយនោះទេ៕
ចែករំលែកព័តមាននេះ