ទីក្រុងកៀវ៖ ថ្ងៃនេះ អ៊ុយក្រែនពន្លះរុស្ស៊ីមួយអស់ដៃដោយបញ្ជូនដ្រូនហោះងងឹតមេឃទៅវាយប្រហារទីតាំងផលិតថាមពល និងតំបន់ឧស្សាហកម្ម។ នេះបើយោងតាមការប្រកាសឱ្យដឹងពីអាជ្ញាធររុស្ស៊ីដើម្បីពិពណ៌នាអំពីការបើកយុទ្ធនាការកាន់តែក្ដៅគគុកនៃការវាយប្រហាររបស់អ៊ុយក្រែនទៅលើហេដ្ឋារចនាសម្ព័ន្ធរបស់រុស្ស៊ី។ តំបន់សារ៉ាតូស (Saratov) (ដែលស្ថិតនៅតាមមាត់ទន្លេវ៉ុលហ្កា (Volga) និងដែលសម្បូររោងចក្រចម្រាញ់ប្រេងឆៅ) ឥឡូវនេះឧស្សាហ៍រងការវាយប្រហារពីសំណាក់ដ្រូនរបស់អ៊ុយក្រែន។
អភិបាលតំបន់នេះបង្ហោះសារនៅលើតេឡេក្រាមថាហេដ្ឋារចនាសម្ព័ន្ធស៊ីវិលរងការខូចខាតដោយសារការវាយប្រហារលើកនេះ។ ក្រឡេកទៅមើលតំបន់គីរ៉ូស (Kirov) ដែលស្ថិតនៅភាគឦសានទីក្រុងម៉ូស្គូ និងស្ថិតនៅចម្ងាយ១៣០០គីឡូម៉ែត្រពីអ៊ុយក្រែន អភិបាលតំបន់នេះ លោកអាឡិចសាន់ដឺ សូកូឡូស (Alexander Sokolov) ថ្លែងថាដ្រូនរបស់អ៊ុយក្រែនបានវាយប្រហារទីតាំងមួយនៅស្រុកអ៊ូហ្ស៊ូមស្គី (Urzhumsky)។
អភិបាលនៃគណៈអភិបាលតំបន់រ៉ូស្តូស (Rostov), វ៉ូរ៉ូណេស (Voronezh) និងបែលហ្គោរ៉ូត (Belgorod) ដែលស្ថិតនៅជាប់នឹងព្រំដែនប្រទេសអ៊ុយក្រែនសុទ្ធតែនិយាយដូចៗគ្នាថារងការវាយប្រហារពីអ៊ុយក្រែន។ នៅបែលហ្គោរ៉ូត ជនស៊ីវិលបីនាក់រងរបួស។ នៅតំបន់គ្រីមៀដែលធ្លាប់ជាទឹកដីរបស់អ៊ុយក្រែន ហើយឥឡូវនេះត្រូវរុស្ស៊ីគ្រប់គ្រងនោះ អភិបាលតំបន់នេះថ្លែងថាអាជ្ញាធរបានអំពាវនាវឱ្យរឹតត្បិតការលក់សាំង។ លោកមិនបានបញ្ជាក់ថាដោយសារមូលហេតុអ្វីទេ។ ប៉ុន្តែគេកត់សម្គាល់ថាជាច្រើនខែកន្លងទៅនេះ អ៊ុយក្រែនតែងតែវាយប្រហារទីតាំងផលិតឥន្ធនៈនៅភាគនិរតីប្រទេសរុស្ស៊ីដែលស្ថិតនៅកៀកនឹងតំបន់គ្រីមៀ៕ ប្រភព៖ Reuters
ចែករំលែកព័តមាននេះ