អាកាសយានដ្ឋានអន្តរជាតិតេជោ ត្រូវបានមន្ត្រីកម្ពុជាបង្ហើបថាអាចនឹងទទួលជើងហោះហើរពីគោលដៅថ្មីពីរកន្លែងបន្ថែមលើគោលដៅដែលមានស្រាប់ ។ ជើងហោះហើរទី១ គឺមកពីរដ្ឋធានីអាប៊ូ ដាប៊ី ( Abu Dhabi) ប្រទេសអារ៉ាប់អេមីរ៉ាត់…
អាកាសយានដ្ឋានអន្តរជាតិតេជោ ត្រូវបានមន្ត្រីកម្ពុជាបង្ហើបថាអាចនឹងទទួលជើងហោះហើរពីគោលដៅថ្មីពីរកន្លែងបន្ថែមលើគោលដៅដែលមានស្រាប់ ។
ជើងហោះហើរទី១ គឺមកពីរដ្ឋធានីអាប៊ូ ដាប៊ី ( Abu Dhabi) ប្រទេសអារ៉ាប់អេមីរ៉ាត់ ដោយក្រុមហ៊ុន Etihad Airways ហើយជើងហោះហើរទីពីរ គឺមកពីរដ្ឋធានីអ៊ីស្តង់ប៊ុលប្រទេសទួរគី ដោយក្រុមហ៊ុនអាកាសចរណ៍ទួរគី ។
តាមការប្រកាសរបស់ក្រសួងទេសចរណ៍នៅក្នុងជំនួបជាមួយនឹងតំណាងក្រុមហ៊ុន Etihad Airways គឺគ្រោងនឹងហោះមកកាន់រាជធានីភ្នំពេញ នៅថ្ងៃទី០៣ ខែតុលា ហើយក្រុមហ៊ុន អាកាសចរណ៍ទួរគី គ្រោងហោះមកនៅថ្ងៃទី១២ ខែធ្នូ ឆ្នាំ២០២៥ ។
លោក ហួត ហាក់ រដ្ឋមន្ត្រីក្រសួងទេសចរណ៍ បានស្វាគមន៍ចំពោះព័ត៌មាននេះ ហើយបញ្ជាក់ថានេះជាជំហានប្រវត្តិសាស្ត្រសម្រាប់វិស័យទេសចរណ៍ និងអាកាសចរណ៍របស់កម្ពុជា ដោយសង្កត់ធ្ងន់ថា ការហោះហើរពីគោលដៅថ្មីមកកាន់ភ្នំពេញនឹងជំរុញការតភ្ជាប់ទាក់ទាញភ្ញៀវអន្តរជាតិកាន់តែច្រើន និងពង្រឹងទំនាក់ទំនងរវាងប្រជាជន និងប្រជាជន ។
លោករដ្ឋមន្ត្រីបានគូសបញ្ជាក់បន្ថែមថា អាកាសយានដ្ឋានអន្តរជាតិតេជោថ្មីឆ្លុះបញ្ចាំងពីចក្ខុវិស័យរបស់រាជរដ្ឋាភិបាលក្រោមសន្តិភាព ស្ថិរភាព និងការអភិវឌ្ឍរបស់ប្រទេស ។ ចាប់ពីខែមករាដល់ខែកក្កដា ឆ្នាំនេះកម្ពុជាមានក្រុមហ៊ុនអាកាសចរណ៍ក្នុងស្រុក និងអន្តរជាតិសរុបចំនួន៣១ ។ ក្រុមហ៊ុនទាំងនោះបានដំណើរការជើងហោះហើរចំនួន៣៧.៤៩២ជើង ជាមួយនឹងអ្នកដំណើរអន្តរជាតិចំនួន៤,០៨លាននាក់ ៕
ចែករំលែកព័តមាននេះ