- ភ្នំពេញ
រាជធានីភ្នំពេញ ៖ ជាទូទៅយើងដឹងពីគ្រោះថ្នាក់បង្កដោយគ្រឿងស្រវឹង ពោល គឺកើតចេញស្រា ។ ពេលនេះទៀត ក្រសួងព័ត៌មាន និងក្រសួងសុខាភិបាលបានចេញផ្សាយជាលាយលក្ខណ៍នូវគ្រោះថ្នាក់ និងផលប៉ះពាល់កើតចេញពីគ្រឿងស្រវឹង…
រាជធានីភ្នំពេញ ៖ ជាទូទៅយើងដឹងពីគ្រោះថ្នាក់បង្កដោយគ្រឿងស្រវឹង ពោល គឺកើតចេញស្រា ។ ពេលនេះទៀត ក្រសួងព័ត៌មាន និងក្រសួងសុខាភិបាលបានចេញផ្សាយជាលាយលក្ខណ៍នូវគ្រោះថ្នាក់ និងផលប៉ះពាល់កើតចេញពីគ្រឿងស្រវឹង ឬស្រា ។
ក្នុងលិខិតចំហរ ផ្ញើទៅកាន់អង្គភាពប្រព័ន្ធផ្សព្វផ្សាយ ក្រុមហ៊ុនផលិត ចែកចាយនាំចូល និងក្រុមហ៊ុនផ្តល់សេវាផ្សាយពាណិជ្ជកម្មគ្រឿងស្រវឹងទាំងអស់ កាលពីថ្ងៃទី៩ ខែមករា ឆ្នាំ២០២៤ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានលើកឡើងថា បច្ចុប្បន្នក្រសួងព័ត៌មានបានសង្កេតឃើញមានការផ្សាយពាណិជ្ជកម្ម ផលិតផលគ្រឿងស្រវឹង តាមរយៈស្ថានីយវិទ្យុ ទូរទស្សន៍ និងប្រព័ន្ធផ្សព្វផ្សាយគ្រប់ប្រភេទយ៉ាងគគ្រឹកគគ្រេង មានផ្តល់រង្វាន់ផ្សងសំណាងយ៉ាងច្រើនសន្ធឹកសន្ធាប់ និងបានធ្វើបទសម្ភាសជាមួយអ្នកត្រូវរង្វាន់ដោយប្រើសកម្មភាពជំរុញ លើកទឹកចិត្ត និងប្រើរូបភាព ដើម្បីអូសទាញឱ្យប្រជាពលរដ្ឋជាពិសេសក្នុងស្រទាប់យុវជនឈ្លក់វង្វេងសេពគ្រឿងស្រវឹងប្រកបដោយគ្រោះថ្នាក់ ដើម្បីផ្សងយករង្វាន់ធ្វើឱ្យប៉ះពាល់ដល់អនាគតយុវជនកម្ពុជាដែលជាទំពាំងស្នងឬស្សី ។
មួយវិញទៀត លោករដ្ឋមន្ត្រីព័ត៌មាន ក៏បានលើកឡើងពីផលប៉ះពាល់ដល់សង្គមមួយផ្នែក កើតចេញពីការទទួលទានគ្រឿងស្រវឹង ដោយខ្វះការទទួលខុសត្រូវ ដូចជាគ្រោះថ្នាក់ចរាចរណ៍ អំពើហិ.ង្សាក្នុងគ្រួសារ សង្គម និងប៉ះពាល់សុខភាពជាដើម ។ នៅថ្ងៃទី៩ ខែមករា ឆ្នាំ២០២៤ ក្រសួងសុខាភិបាលក៏បានចេញផ្សាយនូវសេចក្តីប្រកាសព័ត៌មានស្តីពីផលប៉ះពាល់សុខភាពពីការប្រើប្រាស់គ្រឿងស្រវឹង ។ នោះ គឺការប្រើប្រាស់គ្រឿងស្រវឹងផ្តល់ផលវិបាកយ៉ាងធ្ងន់ធ្ងរដល់សុខភាព សេដ្ឋកិច្ច និងសង្គម ជាពិសេសសមាជិកគ្រួសារ មិត្តភក្តិរួមការងារ និងអ្នកដទៃផងដែរ ។
តាមក្រសួងសុខាភិបាល ជាតិអាល់កុល ក្នុងផលិតផលគ្រឿងស្រវឹង ប៉ះពាល់ដល់សុខភាពអ្នកប្រើប្រាស់ភ្លាមៗ និងរយៈពេលយូរ ។ ក្នុងរយៈពេលតែ២ ទៅ៣នាទីតែប៉ុណ្ណោះ ជាតិអាល់កុល អាចជ្រាបចូលដល់ខួរក្បាល ហើយអាចបង្ករោគសញ្ញាទៅតាមកំហាប់ជាតិអាល់កុល ការចាប់ផ្តើមនិយាយច្រើន ចលនាអន់ថយ គំហើញថយចុះ និងក្អួតចង្អោរ ឬបាត់បង់ស្មារតី ហើយការទទួលទានគ្រឿងស្រវឹងច្រើនពេក អាចបង្កឱ្យសន្ល.ប់ ប្រឈមនឹងជំងឺឆ្លងដូចជា ជំងឺអេដស៍ និងជំងឺផ្សេងៗទៀត ។
ក្រសួងសុខាភិបាល ក៏បានលើកបង្ហាញថា គ្រឿងស្រវឹង ក៏បង្កឱ្យមានផលប៉ះពាល់រយៈពេលវែងដូចជា ជំងឺក្រិនថ្លើម ខូចថ្លើម ជំងឺមហារីក ដូចជា មហារីកមាត់ បំពង់ក បំពង់អាហារ ថ្លើម ពោះវៀនធំ សុដន់។ល ។ ជំងឺមហារីកឈាម ប្រព័ន្ធភាពស៊ាំចុះខ្សោយ ងាយធ្លាក់ខ្លួនឈឺដោយសារការបង្ករោគ បញ្ហាសុខភាពផ្លូវចិត្ត ជំងឺថប់បារម្ភ ជំងឺធ្លាក់ទឹកចិត្ត មានជំងឺវង្វេងពេលឈានចូលវ័យចំណាស់ ក្លាយជាបុគ្គលញៀ.នគ្រឿងស្រវឹង អសមត្ថភាពផ្លូ.វភេ.ទ ជំងឺបេះដូង និងសរសៃឈាម ជំងឺសរសៃឈាមខួរក្បាល ( ស្ទះ ឬបែកសរសៃឈាមខួរក្បាល ) ជំងឺខ្សោយសាច់ដុំ និងឆ្អឹងទារកមានការលូតលាស់មិនប្រក្រតី នៅក្នុងផ្ទៃស្ត្រីប្រើប្រាស់គ្រឿងស្រវឹង អំឡុងពេលមានផ្ទៃពោះ និងជំងឺមិនឆ្លងផ្សេងៗទៀតដូចជា លើសជាតិអាស៊ីត លើសសម្ពាធឈាម លើសជាតិខ្លាញ់ក្នុងឈាម លើសជាតិស្ករ (ជំងឺទឹកនោមផ្អែម) អាចវិវត្តទៅរកផលវិបាក ធ្ងន់ធ្ងរ និងស្លា.ប់មុនអាយុ។ល។
លើសពីនេះទៀត ក្រសួងសុខាភិបាល ក៏បានប្រកាសថា គ្រឿងស្រវឹង ក៏អាចបណ្តាលឱ្យយុវវ័យឈានទៅរកការប្រើប្រាស់គ្រឿងញៀ.ន និងថ្នាំជក់ ដែលប្រាសបាកពីសីលធម៌សង្គម ។ ទន្ទឹមនឹងនេះដែរ គ្រឿងស្រវឹង បង្កឱ្យមានផលប៉ះពាល់ដូចជាអំពើហិ.ង្សាការប្រព្រឹត្តបទឧក្រិ.ដ្ឋ ជម្លោះបុគ្គលការចំណាយថវិកា ទៅលើការទិញគ្រឿងស្រវឹង ការព្យាបាលសុខភាព គ្រោះថ្នាក់ចរាចរណ៍ និងការខាតបង់ផ្សេងៗ។
តាមរយៈការលើកឡើងពីផលប៉ះពាល់ ដែលបង្កដោយគ្រឿងស្រវឹងខាងលើនេះ សូមសាធារណជនទាំងអស់ ពិសេសយុវវ័យ ត្រូវចៀសវាងពីការប្រើប្រាស់គ្រឿងស្រវឹង ។ ចំពោះអ្នកមិនធ្លាប់ប្រើប្រាស់គ្រឿងស្រវឹង សូមកុំសាកល្បង។ ចំណែកអ្នកកំពុងប្រើប្រាស់គ្រឿងស្រវឹង សូមកាត់បន្ថយឱ្យបានជាអតិបរមា ដើម្បីសុខភាពរបស់អ្នក និង មនុស្សជាទីស្រឡាញ់របស់អ្នក ។ សូមកុំប្រើប្រាស់គ្រឿងស្រវឹង ហើយបើកបរ ឬនៅពេលកំពុងបើកបរ ឬកំពុងបញ្ជាគ្រឿងម៉ាស៊ីនផ្សេងៗ ពេលកំពុងមានផ្ទៃពោះ និងបំបៅដោះកូន ឬអ្នកមានបញ្ហាសុខភាពផ្សេងៗ ។
អង្គការសុខភាពពិភពលោក បានបង្ហាញភស្តុតាងថ្មីៗ នេះថា មិនមានកម្រិតសុវត្ថិភាពនៃការប្រើប្រាស់គ្រឿងស្រវឹងនោះទេ ហើយគ្រប់ផលិតផលគ្រឿងស្រវឹងសុទ្ធតែបង្កផលប៉ះពាល់ដល់សុខភាព។ ចំណែកអាជ្ញាធរមូលដ្ឋាន គ្រួសារ សាលារៀន និងសហគមន៍ សូមចូលរួមបង្កើតបរិយាកាស កាត់បន្ថយនូវការប្រើប្រាស់គ្រឿងស្រវឹង ដូចជា អប់រំផ្សព្វផ្សាយឱ្យបានទូលំទូលាយ និងលើកទឹកចិត្តគាំទ្រអ្នកប្រើ ប្រាស់ គ្រឿងស្រវឹងឱ្យលះបង់ការប្រើប្រាស់គ្រឿងស្រវឹង ។
ស្ថាប័នផ្សេងទៀត ក៏សូមចូលរួមជួយគាំទ្រ និងទប់ស្កាត់ការប្រើប្រាស់ផលិតផលគ្រឿងស្រវឹង តាមរយៈការឆ្លើយតបពហុវិស័យ ដោយផ្តោតលើការរៀបចំលិខិតបដ្ឋាន គតិយុត្តពាក់ព័ន្ធផ្សេងៗក្នុងការជំរុញការផ្លាស់ប្តូរឥរិយាបថបុគ្គល គ្រួសារ សហគមន៍ ឱ្យជ្រើសរើសទម្លាប់រស់នៅ ដោយគ្មានផលិតផលគ្រឿងស្រវឹង ។ ក្នុងនោះ អាជ្ញាធរដែនដី ក៏ត្រូវសហការគ្រប់គ្រងការដាក់ ស្លាកប៉ាន់ណូផ្សព្វផ្សាយ អំពីផលប៉ះពាល់សុខភាពពីការប្រើប្រាស់គ្រឿងស្រវឹង ។
សំខាន់ជាងគេបំផុត គឺបុគ្គលផ្ទាល់ខ្លួនម្នាក់ៗពិសេសអ្នកផឹកស្រាទាំងអស់ ត្រូវភ្ញាក់ខ្លួនឯងតែម្តង ។ សូមកុំយកលុយទៅទិញជំងឺ ។ ផឹកស៊ី សប្បាយតែមួយភ្លេតទេ ។ តែផ្ទុយទៅវិញ ពេលស្វាងស្រាមានរឿងជាច្រើនកើតឡើង ហើយរឿងខ្លះនឹកស្មានមិនដល់ នាំឱ្យបុគ្គលអ្នកផឹកស្រានោះ នឹកខ្មាសខ្លួនឯង និងស្តាយក្រោយថែមទៀតផង។ រឿងនេះ មានតែអ្នកផឹកទេ ទើបយល់អារម្មណ៍ក្រោយស្រវឹង ។
ដូច្នេះដើម្បីកុំឱ្យស្តាយក្រោយ គឺងាយស្រួលបំផុត គឺកុំផឹកស្រា នៅថ្ងៃនេះ នោះនៅថ្ងៃស្អែក អ្នកមិនស្តាយក្រោយ អ្នកមិនឈឺក្បាល អ្នកមិនខកការងារឡើយ៕
ចែករំលែកព័តមាននេះ