រាជធានីភ្នំពេញ ៖ បន្ទាប់ពីបានឃើញការផ្សព្វផ្សាយមានករណីទំនាស់រវាងសិស្សនៅវិទ្យាល័យ ហ៊ុន សែន ប៊ុន រ៉ានី វត្តភ្នំ នៅលើបណ្ដាញសង្គមរួចមក សមត្ថកិច្ចបានធ្វើការស្រាវជ្រាវ និងកោះហៅភាគីពាក់ព័ន្ធចូលមកបំភ្លឺ និងដោះស្រាយ នេះបើយោងតាមក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ។
ពាក់ព័ន្ធករណីនេះ ក្រុមការងារព័ត៌មាន និងប្រតិកម្មរហ័ស បានអោយដឹងថា ករណីទំនាស់នេះ កើតឡើងកាលពីវេលាម៉ោង១៦និង៣០នាទីថ្ងៃទី០៨ ខែមករា ឆ្នាំ២០២៤ ។ ក្រោយកើតហេតុភ្លាមៗ លោកស្រីនាយិការរង នៃវិទ្យាល័យ ហ៊ុន សែន ប៊ុន រ៉ានី វត្តភ្នំ បានហៅសិស្សទាំង២ភាគី មកសាកសួរ និងធ្វើការអប់រំ ហើយធ្វើកិច្ចសន្យា បញ្ឈប់សកម្មភាពទាំងនេះ និងឲ្យអាណាព្យាបាលមកធានាយកទៅអប់រំបន្ត។ ប៉ុន្តែក្រោយមក ក៏មានការផុសវីដេអូ នៃទំនាស់របស់សិស្សស្រីសាលាវត្តភ្នំ នៅលើបណ្តាញសង្គម ហើយមូលហេតុ គឺដោយសារការនិយាយឌឺដងគ្នា តាមហ្វេសប៊ុក ។
ក្រុមការងារព័ត៌មាន និងប្រតិកម្មរហ័ស បន្តថា នៅព្រឹកថ្ងៃទី០៩ ខែមករា ឆ្នាំ២០២៤នេះ ទើបសមត្ថកិច្ច ធ្វើការស្រាវជ្រាវ និងកោះហៅភាគីពាក់ព័ន្ធទាំងអស់ មកសាកសួរ និងដោះស្រាយសម្របសម្រួល នៅប៉ុស្តិ៍នគរបាលរដ្ឋបាលស្រះចក ក្នុងខណ្ឌដូនពេញ ។
ក្រុមការងារព័ត៌មាន និងប្រតិកម្មរហ័ស អោយដឹងទៀតថា ក្នុងពេលនោះ ដោយមានការសំណូមពររបស់ភាគីទាំងពីរ គឺអាណាព្យាបាលជនរងគ្រោះ និងអាណាព្យាបាលជនបង្ក សម្រេចគ្នាថា មិនធ្វើការប្តឹងផ្តល់ទេ ណាមួយករណីនេះ មិនបង្ករបួសសា្នមដល់រាងកាយរបស់សិស្សណាម្នាក់នោះដែរ ហើយក្មេងបង្កនៅវ័យក្មេងនៅឡើយ ។ សមត្ថកិច្ច ក៏បានសុំគោលការណ៍ពីឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងអយ្យការអមសាលាដំបូងរាជធានីភ្នំពេញផងដែរ បានអនុញ្ញតឲ្យត្រឡប់ទៅផ្ទះវិញ ដោយមានការធានាពីអាណាព្យាបាល យកទៅអប់រំបន្ត ៕
ចែករំលែកព័តមាននេះ