រាជធានីភ្នំពេញ ៖ មហាជននៅលើបណ្តាញសង្គមកំពុងតែសម្តែងនូវការចាប់អារម្មណ៍យ៉ាងខ្លាំងទៅលើរឿងហួសចិត្តមួយ ក្រោយពីឃើញមន្ត្រីម្នាក់ដែលមានឋានៈជា «អនុប្រធាននាយកដ្ឋាន» បានថតជាប់រថយន្តស៊េរីទំនើបមួយគ្រឿង មានតម្លៃរាប់ម៉ឺនដុល្លារ យកទៅបង្ហោះ និងរិះគន់នៅក្នុងគ្រុបហ្វេសប៊ុកមួយ ហើយដាក់សម្តីឈឺៗថា «ម្ចាស់ឡានចរិតថោ.ក មិនថ្លៃដូចឡានសោះ»។
រឿងរ៉ាវខាងលើនេះ ផ្ទុះឡើងដោយសារតែរូបភាពមួយសន្លឹកបង្ហោះនៅក្នុងគ្រុប «ក្រុមប្រាប់ផ្លូវប៉ូលិសចាប់» ហើយត្រូវមហាជនចែករំលែកយ៉ាងផុសផុល និងដៀលកប់ៗមាត់ទៅកាន់ម្ចាស់រថយន្តនៅក្នុងរូបនោះផងដែរ។
ប្រភពរូបភាព គឺត្រូវបានថត និងបង្ហោះដោយគណនីហ្វេសប៊ុកមួយមានឈ្មោះ «ខៀវ សុងច័ន្ទសុធា» ហើយលោកបានរៀបរាប់ទាំងស្រុងថា «សូមម្ចាស់ឡានថ្ងៃក្រោយកែទម្លាប់ផង ផ្លូវគេត្រូវបត់ឆ្វេង គាត់ទៅត្រង់មកឈប់ផ្លូវគេត្រូវបត់ឆ្វេង ស៊ីផ្លេហើយមិនគេចទៀត ឡានថ្លៃផង សូមម្ចាស់ឡានចរិ.តអោយថ្លៃដូចឡានផងណា អាថោ.ក»។
ក្រោយការបង្ហោះមិនទាន់បានប៉ុន្មានផង គណនីហ្វេសប៊ុកឈ្មោះ ខៀវ សុងច័ន្ទសុធា ដដែល បានចូលទៅខមមិនប្រាប់មហាជនថា «មានគេឆាតមកប្រាប់ខ្ញុំថា លុបរូបជាប់ស្លាកលេខឡានគេទៅ ប្រយ័ត្នគេប្តឹង តែខ្ញុំសូមផ្តាំទៅវិញថា សូមប្តឹងខ្ញុំចុះ បើខ្ញុំធ្វើខុសច្បាប់ ខ្ញុំបាទ វរសេនីយ៍ឯក ខៀវ សុងច័ន្ទសុធា អត្តលេខ59795 ជាអនុប្រធាននាយកដ្ឋាន»។
បន្ថែមលើនេះ គណនីហ្វេសប៊ុកខាងលើ បានសួរយោបល់ពីមហាជនវិញថា «បើគេស្នើឱ្យលុប តើគាត់គួរលុបចេញដែរឬទេ? ប៉ុន្តែបើតាមជំហររបស់គាត់ គឺមិនលុបទេ ទោះត្រូវគេប្តឹងក៏ដោយ!»។ ការអះអាងបែបនេះ ទទួលបានការគាំទ្រយ៉ាងពេញទំហឹងពីមហាជន ដែលភាគច្រើនពួកគាត់ពិតជាមិនពេញចិត្តយ៉ាងខ្លាំងជាមួយនឹងអ្នកបើកបររបៀបអត់ចូលសាលាម៉ាកៗហ្នឹង។
អ្នកដែលជួបរឿងបែបនេះដោយផ្ទាល់ច្រើនដងច្រើនសារ ក៏បានចែករំលែកថា «ស៊ីផ្លេមិនគេចនៅធម្មតាទេ បើខ្ញុំវិញ ស៊ីផ្លេដាក់ហើយ មិនត្រឹមតែមិនគេចចេញ ថែមទាំងងាកមកជេរប.ញ្ចោរខ្ញុំថែម»។
ជាក់ស្តែងម្ចាស់គណនីមួយឈ្មោះថា Reaksmey Imm បានរៀបរាប់ថា «ថ្ងៃមុននៅស្តុប PTTជិតស្តុប Nokia ចាស់ ខ្ញុំជួបម្ដងដែរ ស៊ីផ្លេទៅមុខតិចហើយ ស្រាប់តែជាន់ហ្វ្រាំងវិញ ខ្ញុំក៏ស៊ីផ្លេម្ដងទៀត អត់ចង់ទៅមុខសោះ ទាល់តែដាក់ម៉ាចាស់ដៃ ផ្អើលអស់អ្នកជិតខាងបានព្រមទៅ»។
មួយករណីទៀត បងស្រី រក្សា ដែលទើបជួបហេតុការណ៍ក្តៅៗ ក៏បានថ្លែងប្រាប់ឱ្យដឹងដែរថា «នៅព្រឹកថ្ងៃទី៥ ខែមករានេះ បងស្រីបានឃើញផ្ទាល់ភ្នែក អ្នកបើកបរម្នាក់មិនស្គាល់គន្លងឡាន ឬម៉ូតូ ហើយមិនមើលភ្លើងចរាចរណ៍ បែរជាឈប់នៅគន្លងបត់ឆ្វេង ហើយឆ្លៀតប្រមា.ថម្ចាស់រថយន្តថែមទៀត»។
បងស្រី រក្សា បានបញ្ជាក់ថា «មិនមែនតែឡានទំនើបទេ ដែលឈប់ខុសគន្លងរំខានដល់គេឯងបែបនេះ សូម្បីតែម៉ូតូមួយចំនួន ក៏តែងតែបើកបរខុសដូចគ្នាដែរ»។ គាត់បន្តថា «គាត់ជួបផ្ទាល់ភ្នែកនៅស្តុបទួលពង្រ ដោយមានអ្នកមីងម្នាក់ត្រូវទៅមុខត្រង់ទេ ប៉ុន្តែបែរជាមកឈប់នៅគន្លងដែលគេត្រូវបត់ឆ្វេង នៅពេលដែលភ្លើងបៃតងសម្រាប់បត់ឆ្វេងមកដល់ គាត់បែរជាឈប់មិនទៅណា។ ដល់ពេលឡាននៅពីក្រោយដែលត្រូវបត់ឆ្វេង តាមភ្លើងសញ្ញាពណ៌ខៀវសម្រាប់បត់ឆ្វេង ស៊ីផ្លេសុំផ្លូវ បែរជាម្ចាស់ម៉ូតូងាកទៅក្រោយ ហើយស្អីបន្ទោសទៅម្ចាស់ឡានវិញ ដោយពោលទាំងកំហឹងទៅម្ចាស់ឡានថា «ម៉េចមិនមើលប៉ូលិសចរាចរណ៍»។
គាត់បន្តថា «ហើយបន្តជេរម្ចាស់ឡានផាច់ៗតែម្តង និយាយទៅហួសចិត្តតែម្តង។ ដូច្នេះនេះបង្ហាញថា បងប្អូនដែលបញ្ជាចង្កូតឡាន ឬម៉ូតូមួយចំនួន មិនបានចេះដឹងច្បាស់អំពីគន្លង និងភ្លើងសញ្ញាចរាចរណ៍ឡើយ ទោះបីជាគាត់ឈប់ម៉ូតូ ឬឡានបាំងគេឯង ដែលមានអាទិភាពត្រូវឆ្លងភ្លើងស្តុប ក៏គាត់គិតថាគាត់ត្រូវ ទាំងដែលគាត់កំពុងធ្វើខុស បំពានសិទ្ធិ និងគន្លងរបស់គេ»។
ដោយឡែកជុំវិញរឿងឈប់ខុសគន្លងនេះដែរ បងប្រុសម្នាក់ក៏បានចែករំលែកករណីមួយបែបទៀតថា «អ្នកបើកបរមួយចំនួនធំ ត្រូវបត់ឆ្វេងទេ តែមិនព្រមឈប់បន្តកន្ទុយជាជួរក្នុងគន្លងអ្នកបត់ឆ្វេងទេ បែរជារុលទៅឈប់នៅលើគន្លងដែលគេត្រូវទៅមុខត្រង់ ធ្វើអោយស្ទះគេ ស្ទះឯង ហើយខ្លះទៀត ដោយសារផ្លូវត្រង់ជាប់ស្តុបក្រហម មានឡានបាំងមុខ បែរជាស៊ីញ៉ូងាកឆ្វេង ស៊ីផ្លេកៀរគេកៀរឯង យ៉ាងទទឹងទិសអោយតែបានទៅមុន»។
ចុះ តើលោកអ្នកវិញ ធ្លាប់ជួបហេតុការណ៍ទាំងនេះដែរឬទេ? បងប្អូនមានយោបល់យ៉ាងណាដែរ?
អត្ថបទដោយ ៖ អោម ចែតច័ន្ទណារ៉ា
ចែករំលែកព័តមាននេះ