ខេត្តកំពង់ធំ ៖ នៅរសៀលថ្ងៃទី២៣ ឧសភា ឆ្នាំ២០១១ លោកហាប់ អូម៉ាលី អនុរដ្ឋលេខាធិការក្រសួងអភិវឌ្ឍន៍ជនបទ និងជាប្រធានក្រុមការងារចុះជួយឃុំបឹង ស្រុកបារាយណ៍ និងលោកយ៉ាញ់ សុមិត្រ ទីប្រឹក្សា លោកងួន ញ៉ិល អនុប្រធានទី១ រដ្ឋសភា បានចុះសំណេះសំណាល និងប្រគល់បង្គន់អនាម័យចំនួន២២ ជូនដល់ប្រជាពលរដ្ឋនៅឃុំបឹង ស្រុកបារាយណ៍។
លោកហាប់ អូម៉ាលី បានថ្លែងថា អនាម័យគឺជាកត្ដាសំខាន់ និងចាំបាច់បំផុតសម្រាប់ប្រជាជនកម្ពុជាទូទៅ មិនថានៅទីប្រជុំជន ឬជនបទឡើយ។ អនាម័យល្អ គឺជាប្រការមិនអាចខ្វះបានសម្រាប់ការអភិវឌ្ឍ និងកាត់បន្ថយភាពក្រីក្រនៅកម្ពុជា។ រាជរដ្ឋាភិបាលកម្ពុជាក្រោមកិច្ចដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ដ្រី បានចាត់ទុកអនាម័យ គឺជាបញ្ហាចម្បងរបស់រាជរដ្ឋាភិបាល ដែលបានកំណត់យ៉ាងច្បាស់នៅក្នុងយុទ្ធសាស្ដ្រចតុកោណដំណាក់កាលទី២។
ក្នុងការជំរុញ និងលើកកម្ពស់វិស័យសុខុមាលភាពជូនប្រជាជន រាជរដ្ឋាភិបាលបានប្រគល់ភារកិច្ចជូនដល់ស្ថាប័នទាំងអស់ ជាពិសេសក្រសួងសុខាភិបាល និងក្រសួងអភិវឌ្ឍន៍ជនបទដែលត្រូវដើរតួនាទីសំខាន់ក្នុងការជំរុញលើកកម្ពស់ និងផ្ដល់សេវាថែទាំសុខភាព និងអនាម័យជូនដល់ប្រជាជនទូទៅ ដោយមិនគិតពីនិន្នាការនយោបាយ ឋានៈ សាសនា និងពណ៌សម្បុរឡើយ គឺធ្វើយ៉ាងណាផ្ដល់សេវាកម្មផ្នែកសុខភាព ទឹក និងអនាម័យល្អជូនដល់ប្រជាជនឱ្យស្របតាមគោលនយោបាយរបស់រាជរដ្ឋាភិបាលដែលកំណត់ថា ប្រជាជនទាំងអស់ត្រូវមានសុខភាពល្អ។ ក្រសួងអភិវឌ្ឍន៍ជនបទដែលជាសេនាធិការឱ្យរាជរដ្ឋាភិបាល បានដាក់ចេញនូវគោលដៅរបស់ខ្លួនធ្វើយ៉ាងណាបង្កើនអត្រាប្រើប្រាស់ទឹកស្អាតជូនប្រជាជននៅជនបទឱ្យកើនដល់៥០,៤ភាគរយ នៅឆ្នាំ២០១៥ និងមានកម្រិតអនាម័យសមរម្យឱ្យបាន៣០ភាគរយ នៅឆ្នាំ២០១៥ ។
លោកហាប់ អូមា៉លី បានថ្លែងទៀតថា ក្នុងការចូលរួមចំណែកជាមួយរាជរដ្ឋាភិបាល ក៏បានធ្វើទំនាក់ទំនងជាមួយសប្បុរសជននានាទាំងក្នុង និងក្រៅប្រទេស ដើម្បីចូលរួមចំណែកជួយដល់កម្ពុជា ឱ្យសម្រេចគោលដៅដែលបានកំណត់ក្នុងយុទ្ធសាស្ដ្រចតុកោណ និងគោលនយោបាយនានាក្នុងការចូលរួមកាត់បន្ថយភាពក្រីក្រនៅកម្ពុជា ក្នុងនោះតាមរយៈលោក ZAYNE និងលោក ALESSANDRO មានសប្បុរសជនមួយចំនួននៅប្រទេសអូស្ដ្រាលីបានជួយកសាងបង្គន់អនាម័យមួយចំនួនជូនដល់ប្រជាជននៅកម្ពុជា ចាប់តាំងពីចុងឆ្នាំ២០១០ រហូតមកទល់ដើមឆ្នាំ២០១១ នេះមានបង្គន់ អនាម័យចំនួន៥៦បានសាងសង់រួចហើយនៅក្នុងខេត្ដកំពង់ធំ កំពង់ចាម កណ្ដាល និងរាជធានីភ្នំពេញ៕
ចែករំលែកព័តមាននេះ