Asian Cup ៖ គ្រូជម្រើសជាតិប៉ាឡេស្ទីនថា កីឡាករពិបាកផ្តោតអារម្មណ៍លើការប្រកួត
ប៉ាឡេស្ទីន ៖ ក្រុមបាល់ទាត់ជម្រើសជាតិប៉ាឡេស្ទីន នឹងបង្ហាញខ្លួននៅក្នុងការប្រកួតពានរង្វាន់
ប៉ាឡេស្ទីន ៖ ក្រុមបាល់ទាត់ជម្រើសជាតិប៉ាឡេស្ទីន នឹងបង្ហាញខ្លួននៅក្នុងការប្រកួតពានរង្វាន់
ប៉ាឡេស្ទីន ៖ ក្រុមបាល់ទាត់ជម្រើសជាតិប៉ាឡេស្ទីន នឹងបង្ហាញខ្លួននៅក្នុងការប្រកួតពានរង្វាន់ AFC Asian Cup ឆ្នាំ ២០២៣ ទល់នឹងក្រុមជម្រើសជាតិអ៊ីរ៉ង់ នាថ្ងៃទី១៤ ខែមករា ឆាប់ៗខាងមុខនេះ។ ប៉ុន្តែទោះយ៉ាងណារហូតមកទល់នឹងពេលនេះ កីឡាករប៉ាឡេស្ទីនកំពុងជួបការលំបាកលើការផ្តោតអារម្មណ៍ជុំវិញស្ថានភាពដ៏អាក្រក់ ដែលជាលទ្ធផលនៃជម្លោះនៅតំបន់ហ្គាហ្សា។
ប៉ាឡេស្ទីនមានការប្រកួតចំនួន ៣ នៅវគ្គសន្សំពិន្ទុក្នុងពូល C រួមមានជាមួយនឹងអ៊ីរ៉ង់ អារ៉ាប់រួម និង ហុងកុង នៅក្នុងការប្រកួតពានរង្វាន់ AFC Asian Cup ឆ្នាំ ២០២៣ ដែលប្រព្រឹត្តទៅចាប់ពីថ្ងៃទី១២ ខែមករា រហូតដល់ថ្ងៃទី១០ ខែកុម្ភៈ ឆ្នាំ២០២៤ ដែលកាតាធ្វើជាម្ចាស់ផ្ទះ។ ប៉ាឡេស្ទីនត្រូវជួបអ៊ីរ៉ង់នៅថ្ងៃទី១៤ មករា ហើយបន្តជួបអារ៉ាប់រួម នៅថ្ងៃ១៨ មករា មុនពេលជួបហុងកុង នៅថ្ងៃទី២៣ មករា ដែលជាជំនួបបិទវគ្គចែកពូល។
ក្រុមប៉ាឡេស្ទីនបានមកដល់មូលដ្ឋានហ្វឹកហ្វឺនរបស់ខ្លួនរួចហើយ ប៉ុន្តែសមាជិកទាំងអស់ជួបការលំបាកលើការបែងចែកការផ្តោតអារម្មណ៍រវាងបាល់ទាត់ និងស្ថានភាពជម្លោះ ដែលពួកគេកំពុងតែប្រឈមមុខចាប់តាំងពីថ្ងៃទី៧ ខែតុលា ឆ្នាំ២០២៣ កន្លងមក។ លោក Makram Daboub គ្រូបង្វឹកក្រុមជម្រើសជាតិប៉ាឡេស្ទីនបានប្រាប់ទីភ្នាក់ងារសារព័ត៌មាន AFP ពីអារ៉ាប៊ីសាអូឌីត ដែលជាកន្លែងកីឡាករលោកកំពុងហ្វឹកហាត់ថា «មនុស្សគ្រប់គ្នាត្រូវបានស្អិតជាប់ជាមួយនឹងព័ត៌មានមុន និងក្រោយពេលហ្វឹកហាត់លើឡានក្រុង ឬនៅក្នុងសណ្ឋាគារ»។
ចាប់តាំងពីថ្ងៃទី៧ ខែតុលា ឆ្នាំ២០២៣ កន្លងមក សកម្មភាពបាល់ទាត់នៅហ្គាហ្សា (Gaza) និងវ៉ែសបែង (West Bank) ត្រូវបានផ្អាកទាំងស្រុង។ កីឡាករមួយចំនួនមិនអាចបំភ្លេចគ្រួសាពួកគេបានទេ អារម្មណ៍ពួកគេជាប់នៅហ្គាហ្សា ហើយមិនដឹងថា ពេលណាពួកគេនឹងបែងចែកអារម្មណ៍បានទេ។
ទីភ្នាក់ងារសារព័ត៌មានផ្លូវការនៃអាជ្ញាធរប៉ាឡេស្ទីនសរសេរថា «អ្នកគាំទ្រប៉ាឡេស្ទីនកំពុងពឹងផ្អែកលើក្រុមជម្រើសជាតិ ដើម្បីសម្រេចបានលទ្ធផលល្អក្នុងការប្រកួតនៅ Asian Cup បើទោះបីជាមានស្ថានភាពលំបាកដែលប្រជាជនរបស់យើងកំពុងជួបប្រទះដោយសារការឈ្លានពានរបស់អ៊ីស្រាអែល ដែលនាំឱ្យមានការផ្អាកការប្រកួតយ៉ាងណាក៏ដោយ»។
មនុស្សជាច្រើននាក់ផ្សេងទៀត ត្រូវបានបង្ខំឱ្យភៀសខ្លួនចេញពីកន្លែងជម្លោះ និងស្វែងរកទីសុវត្ថិភាព។ វាច្បាស់ណាស់ថា ការផ្តោតអារម្មណ៍របស់កីឡាករទាមទារខ្លាំងសម្រាប់ការប្រកួត ខណៈដែលពានរង្វាន់ Asian Cup ទាមទារប្រភេទនៃការរៀបចំផ្សេងគ្នា។ បើតាមរបាយការណ៍អង្គការសហប្រជាជាតិ (UN) បានបង្ហាញថា ប្រជាជនប៉ាឡេស្ទីនប្រមាណ ៨៥% នៃតំបន់ហ្គាហ្សាត្រូវបានផ្លាស់ទីលំនៅ ដូច្នេះនឹងពិបាកខ្លាំងសម្រាប់កីឡាករទាំងអស់ផ្តោតអារម្មណ៍ នៅពេលការប្រកួតទល់នឹងអ៊ីរ៉ង់ នៅថ្ងៃទី១៤ ខែមករា ខាងមុខនេះ។
ប្រធានសមាគមកីឡាបាល់ទាត់ប៉ាឡេស្ទីន លោក Jibril Rajub បានលើកឡើងអំពីមនោសញ្ចេតនាទាំងនេះ ដោយថ្លែងនៅក្នុងសេចក្តីថ្លែងការណ៍មួយថា ជម្លោះបានជះឥទ្ធិពលលើចលនាកីឡា និងយុវជន។ អ្នកមានទេពកោសល្យវ័យក្មេងជាច្រើននាក់បានមើលឃើញថា អាជីពកីឡាពួកគេត្រូវបានបាត់បង់ ហើយត្រូវបង្ខំឱ្យគេចចេញពីស្ថានភាពដ៏អាក្រក់ ហើយផ្លាស់ទីទៅកន្លែងមានសុវត្ថិភាព។
មេដឹកនាំប៉ាឡេស្ទីនបានចោទប្រកាន់កងកម្លាំងអ៊ីស្រាអែលថា កំណត់គោលដៅក្លិបកីឡាប៉ាឡេស្ទីន ដែលនេះគឺជាការរំលោភលើធម្មនុញ្ញអូឡាំពិក។ លោកបានចង្អុលទៅបញ្ហានៅកីឡដ្ឋានបាល់ទាត់ Yarmouk នៅហ្គាហ្សា ដែលទាហានអ៊ីស្រាអែលប្រែក្លាយទីនោះទៅជាកន្លែងឃុំឃាំង ការរំលោភបំពាន និងការសួរចម្លើយ៕ (ប្រភព ៖ Inside The Games)
ចែករំលែកព័តមាននេះ