ខេត្តសៀមរាប ៖ កាលពីថ្ងៃទី០៣ មករា បន្ទាប់ពីមានបងប្អូនក្រុមបងប្អូនរ៉ឺម៉ក់កង់បី, ម៉ូតូឥណ្ឌា និងរថយន្តតាក់ស៊ីដឹកភ្ញៀវនៅព្រលានយន្តហោះអន្តរជាតិសៀមរាបអង្គរប្រមាណ១០០នាក់បានប្រមូលផ្ដុំគ្នាតវ៉ានៅមុខសាលាខេត្ត ។ ក្រោយមក គណៈអភិបាលខេត្ត…
ខេត្តសៀមរាប ៖ កាលពីថ្ងៃទី០៣ មករា បន្ទាប់ពីមានបងប្អូនក្រុមបងប្អូនរ៉ឺម៉ក់កង់បី, ម៉ូតូឥណ្ឌា និងរថយន្តតាក់ស៊ីដឹកភ្ញៀវនៅព្រលានយន្តហោះអន្តរជាតិសៀមរាបអង្គរប្រមាណ១០០នាក់បានប្រមូលផ្ដុំគ្នាតវ៉ានៅមុខសាលាខេត្ត ។
ក្រោយមក គណៈអភិបាលខេត្ត ដឹកនាំដោយលោក លី សំរិទ្ធ អភិបាលរងខេត្ត តំណាងដ៏ខ្ពសង់ខ្ពស់ លោកប្រាក់ សោភ័ណ អភិបាលខេត្តសៀមរាប បានធ្វើការជួបពិភាក្សាជាមួយក្រុមហ៊ុនអាកាសយានដ្ឋានអន្តរជាតិសៀមរាប-អង្គរ (AIAI) រួចមកហើយ ។
ក្នុងនោះដែរ លោកលី សំរិទ្ធ អភិបាលរងខេត្ត ក៏បានជួបសំណេះសំណាល និងដោះស្រាយនូវទុក្ខកង្វល់របស់បងប្អូនប្រកបអាជីវកម្មដឹកភ្ញៀវទេសចរ មានរថយន្ត តាក់ស៊ី ,រ៉ឺម៉កកង់បី និងម៉ូតូកង់បីឥណ្ឌា ប្រមាណជា១០០នាក់នៅសាលាខេត្តសៀមរាប ដោយមានការចូល រួមពីនាយករងរដ្ឋបាល អភិបាលស្រុកសូទ្រនិគម និង នាយក នាយករងទីចាត់ការចំណុះសាលាខេត្តផងដែរ ។
លោក លី សំរិទ្ធ ក៏បានទទួលស្វាគមន៍ដល់បងប្អូនក្នុងលក្ខណៈមហាគ្រួសារខ្មែរតែមួយ ដោយបានគូសបញ្ជាក់ថា ក្នុងនាមជាអាជ្ញាធរខេត្ត និងជាអាណាព្យាបាលរបស់បងប្អូន នៅពេលជួបទុក្ខលំបាក គឺត្រូវតែធ្វើការដោះស្រាយជូនបងប្អូនជានិច្ច ។ លោកអភិបាលរងខេត្ត ក៏សូមឱ្យបងប្អូនដែលជាតំណាងអ្នកដឹកភ្ញៀវទេសចរណ៍ ដើម្បីលើកជាសំណើសំណូមពរដែលមកបងប្អូនចង់បានចំពោះមុខនេះ ដើម្បីឱ្យរដ្ឋបាលខេត្ត លើកយកនូវសំណើសំណូមពរទាំងនោះ ដាក់ជូនទៅរាជរដ្ឋាភិបាល ធ្វើការដោះស្រាយជូនបងប្អូន ដោយអាជ្ញាធរខេត្តមិនមានសិទ្ធិសម្រេចនោះឡើយ គឺមានតែរាជរដ្ឋាភិបាល និងក្រុមហ៊ុននោះទេ ។
លោកអភិបាលរងខេត្ត ក៏បានបញ្ជាក់ទៀតថា ជាលទ្ធផលនៃកិច្ចប្រជុំពិភាក្សារវាងរដ្ឋបាលខេត្តសៀមរាប និងក្រុមហ៊ុនអាកាសយានដ្ឋានអន្តរជាតិសៀមរាបអង្គរ (AIAI) គឺរួមគ្នាបន្តពិនិត្យ និងពិភាក្សាលើតម្លៃសេវារថយន្តដឹកភ្ញៀវចេញ-ចូលអាកាសយានដ្ឋានអន្តរជាតិសៀមរាបអង្គរ ដើម្បីរកដំណោះស្រាយសមស្របសម្រាប់សម្រួល និងកាត់បន្ថយលើការចំណាយនៃសេវាប្រើប្រាស់ផ្លូវ និងចំណត។
រដ្ឋបាលខេត្តស្នើឱ្យក្រុមហ៊ុនអាកាសយានដ្ឋានអន្តរជាតិសៀមរាបអង្គរ(AIAI) ពិចារណាលើការយកថ្លៃសេវាចំពោះការចតនៅចំណតអាកាសយានដ្ឋានអន្តរជាតិសៀមរាបអង្គរ ក្នុងរយៈពេល១៥នាទីគួរពុំគិតថ្លៃ ដើម្បីលើកទឹកចិត្ត និងសម្រួលជូនដល់អ្នកដឹកភ្ញៀវចេញចូលអាកាសយានដ្ឋានអន្តរជាតិសៀមរាបអង្គរផងដែរ។ ជាមួយគ្នានេះ អាជ្ញាធរខេត្ត ស្នើឱ្យមានការពិចារណាលើការបន្ធូរបន្ថយក្នុងកម្រិតណា មួយសមស្របដែលអាចដោះស្រាយបញ្ហានេះរួមគ្នាបាន ។
ក្នុងនោះដែរ តំណាងបងប្អូនប្រកបអាជីវកម្មដឹកភ្ញៀវទេសចរក៏បានលើកឡើងនូវសំណើ និងសំណូមពរមួយចំនួនដោយផ្តោតទៅលើកម្រៃសេវាផ្លូវ និងចំណតនៅព្រលានតម្លៃខ្ពស់,សុំឱ្យធ្វើចំណតរថយន្តនៅក្រៅព្រលាន សម្រាប់រងចាំដឹកភ្ញៀវចេញពីព្រលាន និងពេលចេញពីចំណតរងចាំចូលទៅដឹកភ្ញៀវកុំឱ្យគិតថ្លៃម្តងទៀត, សំណូមពរសុំបញ្ឈប់ការជួលម៉ូតូ កង់ឱ្យភ្ញៀវបរទេសចរជឹះ ដែលធ្វើឱ្យបាត់ចំណូលរបស់បងប្អូនរ៉ឺម៉កកង់បី និងម៉ូតូឥណ្ឌា និងករណីទីចំណតនៅទីប្រជុំជនក្នុងក្រុង មិនទាន់បានរៀបរយនៅឡើយ ។
មានប្រសាសន៍នោះដែរ លោក លី សំរិទ្ធ ក៏បានលើកឡើងផងដែរថា រាល់សំណើនិងសំណូមពរដែលបងប្អូនបានលើកឡើងនាពេលនេះ លោកនឹងរាយការណ៍ជូនទៅថ្នាក់ជាតិជាពិសេសសម្តេចបវរធិប តី ហ៊ុន ម៉ាណែត នាយករដ្ឋមន្ត្រីកម្ពុជា ជួយរកដំណោះស្រាយ ដើម្បីដាក់ប្រជុំនៅថ្ងៃទី៤ មករា ឆ្នាំ២០២៤ នេះ ដើម្បីធ្វើការសម្រេច ។
លោកអភិបាលរងខេត្តក៏បន្ថែមថា ក្នុងពេលមានវិបត្តិជំងឺកូវីដ បងប្អូនយើងត្រូវបាត់បង់ការងារ និង ចំណូលប្រចាំថ្ងៃ និងក្រោយវិបត្តិជំងឺកូវីដមានភាពធូរស្រាល ធ្វើឱ្យបងប្អូនប្រកបអាជីព អ្នកដឹកភ្ញៀវទេស ចរណ៍ បានមានក្តីសង្ឃឹមឡើងវិញ ។ នៅពេលអាកាសយានដ្ឋានអន្តរជាតិសៀមរាប-អង្គរ បានបើកដំណើរការបងប្អូនគិតថាក្នុងការចេញ ចូលព្រលានយន្តហោះថ្មីនេះ គេយកកម្រៃដូចអាកាសយានដ្ឋានចាស់តែផ្ទុយស្រឡះពីការស្រមៃរបស់បងប្អូនទៅវិញ ។
ក្នុងនោះដែរ លោកអភិបាលរងខេត្ត ក៏បានធ្វើការណែនាំដល់បងប្អូនសូមរក្សានូវសណ្តាប់ធ្នាប់សង្គម និង បញ្ឈប់នូវការផ្សព្វផ្សាយអ្វីដែលមិនផ្តល់ផលប្រយោជន៍ដល់ជាតិ ហើយរាល់ការផ្សព្វផ្សាយទៅតាមបណ្តាញសង្គមនោះ ដូចជាការវាយបំបែកឆ្នាំងបាយរបស់ខ្លួនទេ ។ ដូច្នេះ បើមានបញ្ហាអ្វីកើតឡើងនោះ សូមបងប្អូនធ្វើសំណើរ ឬសំណូមពរដល់អាជ្ញាធរខេត្ត ដើម្បីធ្វើការដោះស្រាយជូនបងប្អូន ព្រោះទុក្ខកង្វល់របស់បងប្អូនក៏ដូចជាទុក្ខលំបាក របស់អាជ្ញាធរផងដែរ ។
គួរបញ្ជាក់ថា ព្រលានយន្តហោះអន្ដរជាតិសៀមរាបអង្គរ វិនិយោគដោយក្រុមហ៊ុន Angkor International Airport Investment (Cambodia) Co.,Ltd (AIAI) ក្រោមទុនវិនិយោគប្រមាណ១១០០លានដុល្លារអាមេរិក ដែលជាការវិនិយោគ BOT (សាងសង់ ដំណើរការ និងផ្ទេរមកវិញ) ក្នុងរយៈពេល ៥៥ឆ្នាំ។
្រលាននេះចាប់ផ្តើមសាងសង់នៅខែមីនា ឆ្នាំ២០២០ ជាព្រលានលំដាប់ថ្នាក់ 4E ដែលអាចទទួលយន្តហោះខ្នាតធំៗ អាចចុះចតបានផងដែរ។ យោងតាមការជូន ដំណឹងរបស់ក្រុមហ៊ុនវិនិយោគព្រលានយន្តហោះរបស់ចិន ការយកសេវារថយន្ត បើកកាត់ផ្លូវកៅស៊ូទៅព្រលានយន្តហោះសៀមរាបអង្គរ (SIA) នឹងចាប់ផ្តើមអនុវត្តន៍ពីថ្ងៃទី១ ខែមករា ឆ្នាំ ២០២៤តទៅ។
សេវាទាំងនោះបែង ចែកជា៤ផ្នែក តាមប្រភេទរថយន្ត ដែលតម្លៃសម្រាប់រថយន្តលក្ខណៈគ្រួសារ និងរថយន្ត ដឹកទំនិញធុនតូច តម្លៃ៣ដុល្លារ, រថយន្តដឹកអ្នកដំណើរក្រោម១៩កៅអី និងរថយន្តដឹកទំនិញក្រោម៩តោន តម្លៃ៦ ដុល្លារ, រថយន្តដឹកអ្នកដំណើរចាប់ពី២០កៅអីឡើង និងរថយន្តដឹកទំនិញចាប់ពី ៩ដល់១០តោន តម្លៃ៩ដុល្លារ និងរថយន្តដឹកទំនិញទម្ងន់ពី១០ទៅ២០តោន តម្លៃ១២ដុល្លារ។ តម្លៃនេះមិនរាប់បញ្ចូលពីថេរវេលាដែលចូលចតក្នុងចំណោតរបស់ព្រលានយន្តហោះឡើយ។
ទោះជាយ៉ាងនេះក្តីពលរដ្ឋក៏ដូចជាអ្នកដឹកភ្ញៀវទេសចរនៅក្នុងខេត្តសៀមរាបកំពុងរង់ចាំស្ដាប់នូវដំណោះស្រាយរបស់អាជ្ញាធរខេត្តសៀមរាប ដែលបានយកសំណើរបស់ពួកគាត់ទៅក្រុមហ៊ុនចិនក៏ដូចជាថ្នាក់ដឹកនាំផងដែរ៕
ចែករំលែកព័តមាននេះ