ខេត្តកណ្តាល ៖ អាជ្ញាធរស្រុកអង្គស្នួល ដឹកនាំដោយលោកនីម នីរ៉ាដេត កាលពីព្រឹកថ្ងៃទី២៥ ឧសភា បានចុះទៅប្រជុំដោះស្រាយជាមួយគណៈកម្មការអាចារ្យ និងព្រះសង្ឃវត្តកោះអណ្តែត បន្ទាប់ពីមានបណ្តឹងសុំអន្តរាគមន៍ឱ្យហាមឃាត់ឈ្មួញដែលប៉ុនប៉ងជីកដីលក់ និងបានអះអាងថា ដីនោះគឺជាដីវត្តសុទ្ធសាធមិនអាចឱ្យឈ្មួញជីកបានឡើយ ។
វត្តកោះអណ្តែតមានទីតាំងនៅជាប់មាត់ស្ទឹង ស្ថិតក្នុងឃុំក្រាំងម្កាក់ ស្រុកអង្គស្នួល។ គណៈកម្មការអាចារ្យ និងព្រះសង្ឃបានឱ្យដឹងថា ដីវត្តកោះអណ្តែតនេះមានទំហំជិត២១ហិកតា ប៉ុន្តែដោយសារតែគ្មានថវិកាសម្រាប់ធ្វើរបងព័ទ្ធដីទាំងអស់នោះ ទើបកន្លងមករបងដែលធ្វើបានត្រឹមតែព័ទ្ធកុំឱ្យគោចូលស៊ីដំណាំក្នុងវត្តប៉ុណ្ណោះ ហើយនៅសល់ដីខាងៗជាប់នឹងមាត់ស្ទឹងនៅទំនេរ ។ លុះនៅពេលថ្មីៗនេះ ក្រុមហ៊ុនយស សុគន្ធារី បានយកគ្រឿងចក្រទៅកាយដីនៅជិតផ្លូវនិងរបងវត្ត ទើបព្រះសង្ឃ និងគណៈកម្មការអាចារ្យ ប្តឹងសុំអន្តរាគមន៍ពីអាជ្ញាធរស្រុកឱ្យមកហាមឃាត់។ ប្រភពដដែលបានបន្តថា កន្លងមកដោយមានការបារម្ភពីការបាក់ដីចូលស្ទឹងនាំដល់ការបាក់របងវត្ត ព្រះសង្ឃបានជួលគេឱ្យដាំដើមឈើតាមមាត់ស្ទឹង ទើបគ្មានការបាក់ដី។ ម្យ៉ាងទៀតដីដែលក្រុមហ៊ុនដាក់គ្រឿងចក្រទៅកាយនោះ គឺជារនាំងដ៏សំខាន់សម្រាប់ការពារបរិវេណវត្តទាំងមូលមិនឱ្យបាក់ចូលស្ទឹង។
តាមប្រភពពីគណៈកម្មការអាចារ្យវត្តថា វត្តនេះកើតមានតាំងពីបរមបុរាណមក មិនតែប៉ុណ្ណោះក៏មានប្រជាពលរដ្ឋខ្លះមានដីនៅជាប់នោះបានបរិច្ចាគប្រគេនព្រះសង្ឃ និងមិនលក់ដូរឱ្យឈ្មួញជីកទេ ព្រោះខ្លាចបាក់ដល់ដីវត្ត ។ ដីនៅទីនោះជាប្រភេទដីខ្សាច់ដែលឈ្មួញណាឃើញហើយក៏ចង់ទៅជីកយកដែរ ដើម្បីតែផលចំណេញរបស់គេប៉ុណ្ណោះ ពួកគេមិនគិតពីការអន្តរាយដល់វត្តអារាមឡើយ ។ កន្លងមក ដោយសារគ្មានលទ្ធភាពអភិវឌ្ឍទីអារាម និងផ្លូវថ្នល់ ព្រះសង្ឃនិងគណៈកម្មការអាចារ្យបានអនុញ្ញាតឱ្យក្រុមហ៊ុនមួយរបស់លោកស៊ិន សំអាង ជីកយកដីវត្តមួយផ្នែកលក់ ព្រោះក្រុមហ៊ុននេះបានសន្យាថា កសាងសមិទ្ធផលក្នុងវត្ត និងធ្វើផ្លូវថ្នល់ជូនប្រជាពលរដ្ឋ ។ លុះពេលជីករួច ក្រុមហ៊ុននេះក៏រលាស់ខ្លួនដោយយកលេសថាក្ស័យធន ហើយមិនបានធ្វើអ្វីៗទៅតាមការសន្យារបស់ខ្លួនឡើយ។ ពេលនេះស្រាប់តែលេចចេញក្រុមហ៊ុនមួយទៀតមកដាក់គ្រឿងចក្រកាយទៀត ទើបមានការហាមឃាត់ ហើយការហាមឃាត់នេះ គឺទុកសម្រាប់តែវត្តប៉ុណ្ណោះ។ បើគ្មានការការពារទេ វត្ត នឹងត្រូវបាត់បង់ពីទីនោះ ព្រោះតែការបាក់ចូលទៅក្នុងស្ទឹងមិនខាន ។
ដោយឡែក តំណាងក្រុមហ៊ុនយស សុគន្ធារី បានឱ្យដឹងថា ការវិនិយោគនេះមានច្បាប់អនុញ្ញាតត្រឹមត្រូវនិងបង់ថវិកាជូនរដ្ឋក្នុងមួយឆ្នាំៗអស់មិនតិចឡើយ ពេលនេះក្រុមហ៊ុនជីកដី គឺធ្វើឡើងទៅតាមតែប្លង់ដែលច្បាប់បានអនុញ្ញាតប៉ុណ្ណោះ ។ ទោះបីជាបែបណា ព្រះសង្ឃនិងគណៈកម្មការអាចារ្យវត្តបាននិយាយថា ការវិនិយោគគ្មានការហាមឃាត់ទេ ប្រសិនបើរដ្ឋចង់បានដីនោះយកទៅធ្វើជាសាលារៀន មន្ទីរពេទ្យ ឬសំណង់អ្វីមួយសម្រាប់ជាផលប្រយោជន៍ប្រជាពលរដ្ឋ នោះគឺប្រាកដជាគ្មានការជំទាស់ឡើយ កុំឱ្យតែជីកយកអាចម៍ដីទៅលក់ ។
ទាក់ទិនទៅនឹងកិច្ចប្រជុំនោះអាជ្ញាធរស្រុកអង្គស្នួលមានទាំងមន្ត្រីការិយាល័យជំនាញសុរិយាដីផង មិនទាន់រកដំណោះស្រាយចេញរួចនៅឡើយទេ ។ គណៈកម្មការអាចារ្យ ប្រជាពលរដ្ឋ និងតំណាងក្រុមហ៊ុនបានដើរពិនិត្យមើលព្រំដែនវត្តចប់សព្វគ្រប់ហើយ ប៉ុន្តែពុំទាន់មានដំណោះស្រាយបែបណានៅឡើយ រង់ចាំការប្រជុំសម្រេចលើកក្រោយទៀត ។ ប្រជាពលរដ្ឋនិយាយថា ក្រុមហ៊ុននេះរកស៊ីជីកដីមាត់ស្ទឹងនោះយូរមកហើយ។ ពេលនេះអស់មួយកន្លែង ក៏បានដាក់គ្រឿងចក្រជីកដល់ដីវត្តទៀត។ ប៉ុន្តែទោះបីបែបណាខាងក្រុមហ៊ុននៅតែអះអាងថា ខ្លួនមានច្បាប់អនុញ្ញាតត្រឹមត្រូវ និងជីកតែលើដីដែលច្បាប់អនុញ្ញាតឱ្យប៉ុណ្ណោះ ៕
ចែករំលែកព័តមាននេះ