ខេត្តកំពង់ចាម ៖ ក្រុមគ្រួសារនៃសមាជិកគណបក្សប្រជាជនកម្ពុជាស្រុកព្រៃឈរមួយចំនួនក្នុងរដូវវស្សានេះ កំពុងជួបការខ្វះខាតក្នុងជីវភាពរស់នៅប្រចាំថ្ងៃចំនួន៤០០គ្រួសារមកពី១៥ឃុំទូទាំងស្រុកព្រៃឈរ ខេត្តកំពង់ចាម ទទួលបានការជួយឧបត្ថម្ភអំណោយជាគ្រឿងឧបភោគ បរិភោគ និងសម្ភារប្រើប្រាស់។ គឺជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងលោកជំទាវ ផ្តល់តាមរយៈលោកហាស់ វ៉ារី ទីប្រឹក្សាផ្ទាល់ និងជាតំណាងសម្តេចតេជោ ហ៊ុន សែន និងជាអនុប្រធានគណៈពង្រឹងមូលដ្ឋានស្រុកព្រៃឈរ។ ពិធីចែកអំណោយនេះបានធ្វើឡើងនាព្រឹកថ្ងៃទី២៣ ឧសភា ២០១១ ក្នុងបរិវេណវត្តត្រពាំងរាំង ភូមិត្រពាំងរាំង ឃុំសូរ្យសែន ស្រុកព្រៃឈរ ខេត្តកំពង់ចាម។
បន្ទាប់ពីសុន្ទរកថាស្វាគមន៍ និងរបាយការណ៍របស់លោកស្រី សាវឿន ប្រធានគណៈកម្មាធិការបក្សស្រុកព្រៃឈរឱ្យដឹងពីស្ថានភាពសន្តិសុខ និងការអភិវឌ្ឍជាទូទៅនាពេលកន្លងមករបស់ស្រុករួចមក លោកហាស់ វ៉ារី បានមានប្រសាសន៍សំណេះសំណាលដោយបានវាយតម្លៃចំពោះលទ្ធផលការងារដែលសមាជិកបក្សនៅទូទាំងស្រុករួមគ្នាខិតខំប្រឹងប្រែងសម្រេចបាន ក្នុងគោលបំណងបម្រើផលប្រយោជន៍ប្រជាពលរដ្ឋស្របតាមគោលនយោបាយរបស់គណបក្សប្រជាជនកម្ពុជា និងយុទ្ធសាស្ត្រចតុកោណដំណាក់កាលទី២របស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ។ លោកទីប្រឹក្សាថ្លែងថា ក្នុងជំនួបសំណេះសំណាលនាពេលនេះ គឺក្នុងគោលបំណងស្វែងយល់ពីការអនុវត្តការងាររបស់សមាជិក សមាជិកាគណបក្សក្នុងមូលដ្ឋាន ដែលបានរួមគ្នាអភិវឌ្ឍន៍មូលដ្ឋាននៅទូទាំងស្រុក រួមទាំងការពង្រឹងលើកកម្ពស់ស្មារតីទទួលខុសត្រូវក្នុងការបំពេញភារកិច្ច និងបង្កើននូវជីវភាពរស់នៅរបស់សមាជិកបក្សបានកាន់តែប្រសើរឡើង។
លោកបានសំណូមពរដល់សមាជិកបក្សក្នុងមូលដ្ឋានទាំងអស់ សូមបង្កើនការសាមគ្គីភាពផ្ទៃក្នុងឱ្យបានល្អ និងរួមគ្នាលើកកម្ពស់ស្មារតីបំពេញភារកិច្ចបម្រើផលប្រយោជន៍ប្រជាពលរដ្ឋប្រកបដោយភាពទទួលខុសត្រូវខ្ពស់ ពិសេសរក្សាឱ្យបាននូវសន្តិសុខ សុវត្ថិភាពសណ្តាប់ធ្នាប់តាមគោលនយោបាយភូមិ-ឃុំមានសុវត្ថិភាព៥យ៉ាង និងទទួលបានទំនុកចិត្តពីប្រជាពលរដ្ឋ។ លោកទីប្រឹក្សាបានលើកទឹកចិត្តដល់ប្រជាពលរដ្ឋទាំងអស់ឱ្យជំរុញការងារបង្កបង្កើនផលស្រូវឆ្នាំនេះឱ្យអស់លទ្ធភាពដែលមាន ដើម្បីលើកកម្ពស់ជីវភាពរស់នៅប្រចាំថ្ងៃក្នុងគ្រួសារនីមួយៗបានកាន់តែប្រសើរឡើងថែមទៀត។ ជាបន្ទាប់មកទៀត លោកបានចែកជូនអំណោយដល់សមាជិកបក្សដែលជួបការខ្វះខាតក្នុងជីវភាពរស់នៅមានចំនួន៤០០គ្រួសារ ដែលក្នុងមួយគ្រួសារៗទទួលបានអង្ករ ទឹកត្រី ទឹកស៊ីអ៊ីវ កាទឹក ឆ្នាំងបាយ ឆ្នាំងសម្ល អំបិល ចានបាយ កាធុនជ័រ ស្លាបព្រា សារុង ខោអាវ១កញ្ចប់ និងនំ១ប្រអប់។ សម្រាប់ចាស់ៗសារុង១ និងនំ១ប្រអប់ ឧបត្ថម្ភទុរគតជនក្នុងឃុំរកាកោងទី១ និងទី២ ចំនួន១០លានរៀល។ ទុរគតជនក្នុងស្រុកព្រៃឈរចំនួន៥លានរៀល ប្រគេនបច្ច័យព្រះសង្ឃវត្តជំពូសោភាចំនួន២លាន៥សែនរៀល វត្តថ្មីចំនួន១លានរៀល ប្រគេនព្រះសង្ឃ៧អង្គ ក្នុង១អង្គទេយ្យវត្ថុ១កញ្ចប់ និងបច្ច័យ២ម៉ឺនរៀល ឧបត្ថម្ភមេឃុំ១៥នាក់មកពី១៥ឃុំ ក្នុងម្នាក់ៗថវិកាចំនួន២០ម៉ឺនរៀល និងកម្លាំងការពារចំនួន៤សែនរៀលផងដែរ៕
ចែករំលែកព័តមាននេះ