ពិតជាមិនសរសើរមិនបាន ចំពោះទឹកចិត្តកូនសិស្សរូបនេះ ទោះបីជាខ្លួនកំពុងតែពើបប្រទះនូវជីវភាពលំបាកក៏ពិតមែន ប៉ុន្តែកូនសិស្សរូបនេះមិនខ្វះនូវទឹកចិត្តនោះឡើយ។ ជាក់ស្ដែងកាលពីពេលថ្មីៗនេះ កូនសិស្សម្នាក់បានអោយខ្ចៅ១ថង់ជូនដល់គ្រូបង្រៀនជា
ខេត្តត្បូងឃ្មុំ ៖ ពិតជាមិនសរសើរមិនបាន ចំពោះទឹកចិត្តកូនសិស្សរូបនេះ ទោះបីជាខ្លួនកំពុងតែពើបប្រទះនូវជីវភាពលំបាកក៏ពិតមែន ប៉ុន្តែកូនសិស្សរូបនេះមិនខ្វះនូវទឹកចិត្តនោះឡើយ។ ជាក់ស្ដែងកាលពីពេលថ្មីៗនេះ កូនសិស្សម្នាក់បានអោយខ្ចៅ១ថង់ជូនដល់គ្រូបង្រៀនជាឪពុកម្តាយទី២ ដែលខិតខំប្រឹងប្រែងបង្រៀនដល់ប្អូន ធ្វើឱ្យអ្នកគ្រូរំភើបស្ទើរតែស្រក់ទឹកភ្នែក ខណៈពេលសិស្សបានអោយដោយទឹកចិត្តមួយនេះ។
ជាការពិតណាស់ ខ្ចៅមួយថង់នេះ គឺមានបងប្អូនយើងចែករំលែកយ៉ាងច្រើន ក្រោយពេលអ្នកគ្រូបង្រៀនរបស់សិស្សដែលមានទឹកចិត្តល្អប្រពៃ បានធ្វើការលើកឡើងក្នុងបណ្តាញសង្គមថា «ពេលចេញលេង ក្មេងខ្លះចេញលេងខាងក្រៅថ្នាក់រៀន ក្មេងខ្លះទៀតអង្គុយលេងក្នុងថ្នាក់ ចម្លែកអីតែពិសិទ្ធ គាត់ដើរមកជិតខ្ញុំ ហើយក៏ដើរទៅតុវិញ រួចក៏ដើរម្ដងហើយម្ដងទៀតធ្វើឱ្យខ្ញុំឆ្ងល់ ក៏សួរថា «កូនមានរឿងអីចង់ប្រាប់អ្នកគ្រូ?»។ ពិសិទ្ធឆ្លើយថា «ខ្ញុំចង់សួរអ្នកគ្រូថា អ្នកគ្រូចេះហូបខ្ចៅទេ?» អ្នកគ្រូញញឹម ហើយឆ្លើយថា «អ្នកគ្រូចេះ ហើយក៏ចូលចិត្តទៀតផង»។
អ្នកគ្រូបង្រៀនខាងលើបង្ហោះទៀតថា «ពិសិដ្ឋញញឹមហើយរត់សំដៅតុរបស់គាត់វិញ រួចយកខ្ចៅ១ថង់មកហុចឱ្យខ្ញុំ បន្ទាប់មកពិសិដ្ឋនិយាយថា «ខ្ចៅនេះខ្ញុំរើសពីត្រពាំង ស្ងោរឆ្អិនហើយ អ្នកគ្រូហូបទៅ»។ ពិសិដ្ឋនិយាយទាំងទឹកមុខញញឹម ហើយសប្បាយរីករាយជាខ្លាំង។ អ្នកគ្រូទទួលខ្ចៅរបស់គាត់ ហើយស្រាយថង់មើលឃើញមានទាំងបន្លាក្រូចសម្រាប់ចាក់ ហើយខ្ញុំយកខ្ចៅមកចាក់ញ៉ាំ រួចខ្ញុំញញឹមដាក់គាត់វិញ។ អ្នកគ្រូនិយាយទៀតថា «ឆ្ងាញ់ណាស់កូន!»។ (គាត់មិនមែនជាកូនអ្នកមានទេ គាត់គឺជាកូនអ្នកមានជីវភាពទាល់លំបាក តែទឹកចិត្តគាត់មិនទាល់នោះទេ)»។
ពិតណាស់ ទឹកចិត្តបែបនេះកម្រមានណាស់ ទោះបីជាខ្លួនខ្វះខាតក៏ពិតមែន តែទឹកចិត្តមិនបានខ្វះខាតនោះឡើយ។ ប៉ុន្តែបើងាកមកមើលការសិក្សាវិញ ប្អូនពិសិដ្ឋ ដែលមានចិត្តល្អរូបនេះ ក៏មានការខិតប្រឹងប្រែងរៀនសូត្រ ចង់រៀនចេះចង់ដឹង ខណៈពេលជីវភាពរបស់ប្អូនមានការខ្វះខាតយ៉ាងខ្លាំង ដោយប្អូនមានអាយុ៩ឆ្នាំហើយ ទើបតែរៀនថ្នាក់ទី១តែប៉ុណ្ណោះ។
តាមរយៈបទសម្ភាសន៍ជាមួយសារព័ត៌មានកោះសន្តិភាព អ្នកគ្រូ អ៊ូ សុខលីអូន បានប្រាប់ឱ្យដឹងថា «អ្នកគ្រូពិតជាត្រេកអរណាស់ ពេលកូនសិស្សមានសន្ដានចិត្តល្អគួរជាទីរាប់អានដូច្នេះ»។
អ្នកគ្រូ សុខលីអូន ដែលជាគ្រូបង្រៀនកូនសិស្សនៅសាលាបឋមសិក្សមេម៉ៃ ស្ថិតក្នុងភូមិមេម៉ៃ ឃុំក្រែក ស្រុកពញាក្រែក ខេត្តត្បូងឃ្មុំ បានប្រាប់បន្តថា «កូនសិស្សដែលបានច្រកខ្ចៅអោយអ្នកគ្រូមួយថង់នេះ គាត់មានអាយុ៩ឆ្នាំហើយ ឈ្មោះថា «ពិសិដ្ឋ» គាត់ទើបតែរៀនថ្នាក់ទី១ប៉ុណ្ណោះ ដោយអាចថា នេះមកពីជីវភាពគ្រួសាររបស់គាត់មានការខ្វះខាតខ្លាំង ដោយឪពុកម្តាយគាត់ស៊ីឈ្នួលឱ្យគេ អាចថារកមួយថ្ងៃចាយមួយថ្ងៃ»។
អ្នកគ្រូ សុខ លីអូន បានបន្ថែមថា «ជួនកាល ពិសិដ្ឋ ទៅតាមឪពុកម្តាយធ្វើការក៏មាន ជួនកាលរើសកំប៉ុងតាមរោងការនៅក្នុងភូមិក៏មាន ដោយហេតុតែចង់រៀន ចង់ចេះដូចគេ ពោលគឺទឹកចិត្តល្អ ក៏ដូចជាការខិតខំប្រឹងរបស់ប្អូនរូបនេះ អាចធ្វើអោយរំភើបជំនួស ព្រោះតែការខិតខំប្រឹងប្រែង»។
ជាចុងក្រោយ អ្នកគ្រូពិតជាអរគុណខ្លាំងណាស់ ដោយអ្នកគ្រូសូមអោយបងប្អូនសប្បុរសជនជួយដល់គាត់ផង ដោយសារ ពិសិដ្ឋ មានទឹកចិត្តក្នុងការរៀនសូត្រ ប៉ុន្តែជីវភាពខ្វះខាតមករារាំងស្ទះផ្លូវដល់ប្អូន ចំពោះផ្លូវមួយនេះ៕
អត្ថបទដោយ ៖ លីហួ គីមឆាយ
ចែករំលែកព័តមាននេះ