គិតត្រឹមរសៀលថ្ងៃនេះ មិនទាន់មានសញ្ញារញ្ជួយដីនៅកម្ពុជាទេ
រាជធានីភ្នំពេញ ៖ លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់អ្នកសារព័ត៌មានថា គិតត្រឹមម៉ោង៤រសៀលថ្ងៃទី២៨ មីនា ២០២៥នេះ…
រាជធានីភ្នំពេញ ៖ លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់អ្នកសារព័ត៌មានថា គិតត្រឹមម៉ោង៤រសៀលថ្ងៃទី២៨ មីនា ២០២៥នេះ យើងនៅមិនទាន់មានរបាយការណ៍បញ្ជាក់ថា មានការរញ្ជួយដីនៅកម្ពុជាទេ ។ ប៉ុន្តែ បើយោងតាមសញ្ញាផែនទីបង្ហាញពីប្រទេសកើតហេតុរញ្ជួយដី អាចមានហានិភ័យប៉ះពាល់ដល់ខេត្តខ្លះ នៃប្រទេសកម្ពុជា ដែលនៅជាប់ព្រំដែន ។
ទោះជាយ៉ាងណា អ្នកនាំពាក្យ ក៏បានបញ្ជាក់ផងដែរថា មន្ត្រីជំនាញ បាននិងកំពុងតាមដានយ៉ាងយកចិត្តទុកដាក់ ហើយបើមានសញ្ញារញ្ជួយដី នឹងជូនដំណឹងទៅកាន់សាធារណជន ជាបន្តបន្ទាប់ ។
សូមបញ្ជាក់ថា ទីក្រុងបាងកក មានការរញ្ជួយដីកម្រិត៧,៤ រិចទ័រ រហូតដល់ធ្វើអោយមនុស្សរត់ចេញពីអគារ នៅរសៀលថ្ងៃទី២៨ ខែមីនានេះ ខណៈការរកស៊ីមួយចំនួនបានបិទបណ្តោះអាសន្ន ។ ប្រទេសមីយ៉ាន់ម៉ា ក៏កំពុងតែទទួលរងរញ្ជួយដីដ៏ខ្លាំងផងដែរ ប៉ុន្តែទោះបីជាយ៉ាងក៏ដោយ គេមិនទាន់មានរបាយការណ៍អំពីការខូចខាត និងគ្រោះថ្នាក់ចំពោះមនុស្សនៅឡើយទេ ។
នារសៀលថ្ងៃដដែលនេះ អភិបាលរាជធានីភ្នំពេញ លោក ឃួង ស្រេង បានបញ្ជាឲ្យគ្រប់អភិបាលខណ្ឌទាំង១៤ ត្រូវចុះពិនិត្យតាមដានដោយយកចិត្តទុកដាក់ចំពោះក្រុមប្រជាពលរដ្ឋ ដែលកំពុងរស់នៅក្នុងអាគារខ្ពស់ៗ និងអគារចាស់ៗ ក្រោយមានគ្រោះរញ្ជួយដីកំពុងតែវាយប្រហារនៅថៃ ដើម្បីការពារសុវត្ថិភាពពួកគាត់ ខ្លាចជួបគ្រោះថ្នាក់ជាយថាហេតុណាមួយកើតឡើង ៕
ចែករំលែកព័តមាននេះ