ទីក្រុងតេអេរ៉ង់៖ អ៊ីរ៉ង់ត្រៀមខ្លួនជាបណ្ដើរៗហើយដើម្បីទប់ទល់នឹងលទ្ធភាពនៃការវាយប្រហារពីសំណាក់អាមេរិកទៅលើទឹកដីរបស់ខ្លួន។ ចំណាត់ការនេះធ្វើឡើងបន្ទាប់ពីលោកត្រាំព្រមានថាអ៊ីរ៉ង់ត្រូវតែចូលតុចរចាដើម្បីឱ្យមានកិច្ចព្រមព្រៀងនុយក្លេអ៊ែរ។ លោកទុកពេលឱ្យអ៊ីរ៉ង់២អាទិត្យ។ បើការចរចាគ្មានលទ្ធផលទេ លោកនឹងប្រើធម៌ក្ដៅ។ ជាបឋម លោកគំរាមដំឡើងពន្ធលើទៅទំនិញរបស់អ៊ីរ៉ង់។ ចំណាត់ការបន្ទាប់ លោកព្រមានទម្លាក់គ្រាប់បែកទៅលើទីតាំងនុយក្លេអ៊ែររបស់អ៊ីរ៉ង់។
ទស្សនាវដ្ដីញូស្វីក (Nesweek) ចុះផ្សាយថាអ៊ីរ៉ង់ចាប់ផ្ដើមបំពាក់ក្បាលគ្រាប់មីស៊ីលនៅលើជើងទម្របាញ់មីស៊ីល និងរ៉ុកកែតជាបណ្ដើរៗដើម្បីត្រៀមវាយបកវិញបើសិនអាមេរិកទម្លាក់គ្រាប់បែកដូចការអះអាងរបស់លោកត្រាំមែន។ បញ្ហាតានតឹងរវាងអ៊ីរ៉ង់ និងអាមេរិកចាប់ផ្ដើមឡើងកម្ដៅកាន់តែខ្លាំងឡើងៗចាប់តាំងពីលោកត្រាំស្បថចូលកាន់តំណែងនៅអាណត្តិទី២។
អ៊ីរ៉ង់យល់ថាការដែលអាមេរិកបន្តដាក់សម្ពាធជាអតិបរមាដោយទណ្ឌកម្មសេដ្ឋកិច្ចផង និងកម្លាំងយោធាផងមានន័យស្មើនឹងការដុតបញ្ឆេះស្ថានការណ៍ឱ្យក្ដៅគគុក។ អ៊ីរ៉ង់បញ្ជាក់ថាមូលហេតុហ្នឹងហើយដែលខ្លួនមិនអាចចរចាគ្នាដោយផ្ទាល់ជាមួយអាមេរិកបានទេព្រោះវាជាការមិនទុកចិត្តគ្នា ជាលក្ខណៈ «ចាប់ដៃផង និងជាន់ជើងផង»។ សង្គ្រាមប្រហែលជាអាចនឹងកើតមានដោយជៀសមិនរួចទេបើសិនភាគីទាំងសងខាងមិនព្រមបន្ធូរដៃ ហើយនៅតែសង្គ្រឺតធ្មេញដាក់គ្នាដូចសព្វថ្ងៃនេះ។
សារព័ត៌មានរបស់រដ្ឋាភិបាលអ៊ីរ៉ង់ឈ្មោះតេអេរ៉ង់ ថាមស៍ (Tehran Times) ចុះផ្សាយនៅលើបណ្ដាញអ៊ិចថាអ៊ីរ៉ង់បានបំពាក់ក្បាលគ្រាប់មីស៊ីលនៅលើជើងទម្ររួចហើយនៅតាមទីក្រុងតូចធំទាំងអស់។ កាសែតនេះបានចេញសេចក្ដីព្រមានដោយម៉ឺងម៉ាត់ថាបើសិនអាមេរិកពិតជាវាយប្រហារអ៊ីរ៉ង់មែន ពួកគេ និងសម្ព័ន្ធមិត្តរបស់ពួកគេត្រូវតែតែបង់នូវតម្លៃដ៏ខ្ពស់បំផុត។ អគ្គសេនាធិការកងទ័ពអ៊ីរ៉ង់ក៏ចេញសេចក្ដីព្រមានផងដែរថាខ្លួនត្រៀមឆ្លើយតបដោយម៉ឺងម៉ាត់ចំពោះការវាយប្រហារណាមួយ។
នៅក្នុងបទសម្ភាសជាមួយអឹនប៊ីស៊ី (NBC) លោកត្រាំព្រមានថាបើអ៊ីរ៉ង់មិនព្រមចូលតុចរចាគ្នាទេ លោកនឹងបញ្ជាឱ្យទម្លាក់គ្រាប់បែកដ៏ខ្លាំងក្លាបំផុតដែលមិនធ្លាប់មានពីមុនមក។ ក្រោយមក លោកប្រាប់អ្នកសារព័ត៌មានថាលោកមិនចង់ធ្វើបែបនេះ។ អ្វីដែលលោកចង់បានគឺកិច្ចព្រមព្រៀងនុយក្លេអ៊ែរដើម្បីទប់ស្កាត់មិនឱ្យអ៊ីរ៉ង់ផលិតអាវុធប្រល័យលោកនេះតែប៉ុណ្ណោះ។
ការព្រមានរបស់ត្រាំបន្ទាប់ពីលោកផ្ញើលិខិតជូនអគ្គមគ្គុទ្ទេសក៍អ៊ីរ៉ង់ លោកអាចារ្យអាយ៉ាតូឡា អាលី ខាមេនី (Ayatollah Ali Khamenei) ដើម្បីជំរុញឱ្យថ្នាក់ដឹកនាំអ៊ីរ៉ង់រូបនេះចរចាគ្នាដោយផ្ទាល់។ ជាកិច្ចឆ្លើយតប អ៊ីរ៉ង់ប្រកាសច្រានចោលសំណើនេះ។ អ៊ីរ៉ង់ថាឈប់ជឿអាមេរិកទៀតហើយ។ កាលពីឆ្នាំ២០១៥ ចុះហត្ថលេខាជាមួយគ្នារួចហើយ (ជំនាន់អូបាម៉ា) នៅពេលត្រាំឡើងកាន់អំណាចកាលពី ដើមឆ្នាំ២០១៧ គាត់ដើរចេញពីកិច្ចព្រមព្រៀងនោះវិញ ហើយដាក់ទណ្ឌកម្មសេដ្ឋកិច្ចអ៊ីរ៉ង់ជាថ្មី។
កាសែតដឹតេឡេក្រាហ្វរបស់អង់គ្លេស (The Telegraph) ចុះផ្សាយថាបើអាមេរិកពិតជាវាយប្រហារអ៊ីរ៉ង់មែន អ៊ីរ៉ង់អាចនឹងវាយបកវិញទៅលើមូលដ្ឋានទ័ពជើងទឹករបស់អាមេរិក និងអង់គ្លេសនៅមហាសមុទ្រឥណ្ឌា។ មន្ត្រីជាន់ខ្ពស់យោធាអ៊ីរ៉ង់បង្ហើបឱ្យដឹងថាបើអាមេរិកពិតជាវាយប្រហារមែន អ៊ីរ៉ង់មិនខ្វល់ថាអាមេរិក ឬអង់គ្លេសទេ ត្រូវតែវាយប្រហារឱ្យណាណីម្ដង។ ថ្មីៗនេះ អាមេរិកក៏ចាប់ផ្ដើមបង្កើនវត្តមានយោធារបស់ខ្លួននៅមូលដ្ឋានទ័ពជើងទឹកឌីហ្គោ ហ្កាសៀផងដែរ (Diego Garcia)៕
ចែករំលែកព័តមាននេះ