ខេត្តព្រះវិហារ ៖ យ៉ាងហោចណាស់ ក្របីរបស់អ្នកភូមិចំនួន១៥ក្បាល ត្រូវបានអាជ្ញាធរស្រុកឆែបដឹកនាំកម្លាំងគណៈបញ្ជាការឯកភាពស្រុក ចុះអន្តរាគមន៍ជួយសង្គ្រោះទាំងយប់ តែ៣ក្បាលទៀតត្រូវងាប់បន្ទាប់ពីហ្វូងក្របីទាំងនេះបានជាប់នៅក្នុងប្រឡាយដែលមានតែភក់កប់យ៉ាងជ្រៅជាច្រើនថ្ងៃពុំអាចឡើងរួច ។ អភិបាលស្រុកឆែប លោក…
ខេត្តព្រះវិហារ ៖ យ៉ាងហោចណាស់ ក្របីរបស់អ្នកភូមិចំនួន១៥ក្បាល ត្រូវបានអាជ្ញាធរស្រុកឆែបដឹកនាំកម្លាំងគណៈបញ្ជាការឯកភាពស្រុក ចុះអន្តរាគមន៍ជួយសង្គ្រោះទាំងយប់ តែ៣ក្បាលទៀតត្រូវងាប់បន្ទាប់ពីហ្វូងក្របីទាំងនេះបានជាប់នៅក្នុងប្រឡាយដែលមានតែភក់កប់យ៉ាងជ្រៅជាច្រើនថ្ងៃពុំអាចឡើងរួច ។
អភិបាលស្រុកឆែប លោក ឃិត សុធារ៉ា បានថ្លែងឱ្យដឹងនៅព្រឹកថ្ងៃទី២ ខែមេសា ឆ្នាំ២០២៥ ថា ការឈានទៅជួយសង្គ្រោះហ្វូងក្របីទាំងនេះ គឺក្រោយពីលោកបានទទួលព័ត៌មានពីអ្នកភូមិនៅព្រលប់ថ្ងៃទី១ ខែមេសា ឆ្នាំ២០២៥ ថា នៅចំណុចការដ្ឋានទី៣ ខាងកើតស្នាក់ការឧទ្យានតេជោសែនឫស្សីត្រឹប ក្នុងភូមិសាស្ត្រឃុំឆែប២ គេឃើញក្របីមួយហ្វូងបានធ្លាក់ក្នុងប្រឡាយភក់ ហើយក្របីទាំងនេះមិនអាចឡើងរួច និងឃើញងាប់អស់៣ក្បាលថែមទៀតផង ។
លោកអភិបាលស្រុកបានបញ្ជាក់ថា បន្ទាប់ពីទទួលបានព័ត៌មាននេះភ្លាម លោកក៏បានណែនាំទៅលោក កៅ រីម អភិបាលរងស្រុក ដើម្បីដឹកនាំកម្លាំងគណៈបញ្ជាការឯកភាពស្រុក ចុះទៅជួយអន្តរាគមន៍សង្គ្រោះហ្វូងក្របីទាំងនោះទាំងយប់ ប៉ុន្តែដោយសារស្ថានភាពប្រឡាយភក់ជ្រៅមិនអាចប្រើកម្លាំងមនុស្ស ដើម្បីទាញ ឬក៏ប្រើគ្រឿងចក្រអេស្កាវ៉ាទ័របានទេ លោកក៏បានណែនាំឱ្យជួលរថយន្តសន្ទូច ដើម្បីស្ទូចក្របីចេញពីប្រឡាយភក់នោះ ។
លោក ឃិត សុធារ៉ា បានបញ្ជាក់ថា ជាលទ្ធផល សង្គ្រោះបានក្របីចំនួន១៥ក្បាល ឯក្របី៣ក្បាលទៀតបានងាប់ ។ តាមការសន្និដ្ឋានហ្វូងក្របីទាំងនេះ បានធ្លាក់ចូលប្រឡាយភក់នេះ ប្រហែល៣ថ្ងៃមកហើយ ដូចនេះ បើមិនសង្គ្រោះបានទាន់ពេលវេលាទេ ក្របីទាំងនោះអាចនឹងងាប់ទាំងអស់ ។ សំណាងដែរ ដែលត្រូវបានគេដឹងក្រោយមក ខណៈក្របីទាំងនោះរង់ចាំសេចក្ដីស្លាប់ក្នុងប្រឡាយដ៏ជ្រៅនេះ ៕
ចែករំលែកព័តមាននេះ