រាជធានីភ្នំពេញ ៖ ជារឿងប្រវត្តិសាស្ត្រមួយហើយសម្រាប់ស្ថាប័នកំពូលរបស់ជាតិ គឺរដ្ឋសភា នឹងព្រឹទ្ធសភា គ្រោងនឹងធ្វើឡើងសមាជ នៅដើមខែមិថុនា ឆ្នាំ២០២៥ ខាងមុខនេះ ពោលគឺមានរយៈពេលប្រមាណជាង៥ខែ…
រាជធានីភ្នំពេញ ៖ ជារឿងប្រវត្តិសាស្ត្រមួយហើយសម្រាប់ស្ថាប័នកំពូលរបស់ជាតិ គឺរដ្ឋសភា នឹងព្រឹទ្ធសភា គ្រោងនឹងធ្វើឡើងសមាជ នៅដើមខែមិថុនា ឆ្នាំ២០២៥ ខាងមុខនេះ ពោលគឺមានរយៈពេលប្រមាណជាង៥ខែ ដែលសម្តេចតេជោ ហ៊ុន សែន បានមកដឹកនាំស្ថាប័នព្រឹទ្ធសភា ។
បើតាមអ្នកនាំពាក្យព្រឹទ្ធសភា ឯកឧត្តម ជា ធីរិទ្ធ បានឲ្យដឹងតាមប្រព័ន្ធតេឡេក្រាម នៅរសៀលថ្ងៃទី២៧ ខែមីនា ឆ្នាំ២០២៥ ថា គម្រោងសមាជរដ្ឋសភា និងព្រឹទ្ធសភា នឹងធ្វើឡើងនៅដើមខែមិថុនា ឆ្នាំ២០២៥ ខាងមុខនេះ ដោយផ្តោតលើប្រធានបទ ៣សំខាន់ៗ ដែលជាគោល ដៅយុទ្ធសាស្ត្ររបស់ជាតិដូចជា ៖ វិស័យកសិកម្ម, វិស័យសេដ្ឋកិច្ចក្រៅប្រព័ន្ធ និងប្រព័ន្ធគាំពារសង្គម ។
ឯកឧត្តមអ្នកនាំពាក្យ បានគូសបញ្ជាក់ថា ៖ “អីចឹងប្រធានបទទាំង៣នេះ នឹងក្លាយទៅជាប្រធាន បទដ៏សំខាន់ ក្នុងអង្គសមាជខាងមុខ។ ចំពោះសមាជរដ្ឋសភា និងព្រឹទ្ធសភានេះ គឺធ្វើឡើងទៅតាមរដ្ឋធម្មនុញ្ញរបស់កម្ពុជារបស់យើង មានចែងនៅក្នុងមាត្រា១១៦ថ្មី មាត្រា១១៧ថ្មី ហើយក៏មានកំណត់យ៉ាងច្បាស់នៅក្នុងច្បាប់ស្តីអំពីការរៀបចំ និងការប្រព្រឹត្តទៅ នៃសមាជ រដ្ឋសភា-ព្រឹទ្ធសភា ដែលបានអនុម័តកាលពីឆ្នាំ២០១០ដែរ” ។
ឯកឧត្តមបានបន្តថា នៅក្នុងមាត្រា២ បានចែងយ៉ាងច្បាស់លាស់ថា សមាជរដ្ឋសភា និងព្រឹទ្ធសភា គឺជាការប្រជុំរួមគ្នា នៃសមាជិករដ្ឋសភា និងព្រឹទ្ធសភាដើម្បីដោះស្រាយបញ្ហាសំខាន់ៗរបស់ជាតិ ក្នុងករណីចាំបាច់ណាមួយ។ ដូច្នេះគម្រោង នៃការកំណត់ខ្លឹមសារ នៃអង្គសមាជនេះ ក៏ស្របទៅនឹងប្រសាសន៍របស់សម្តេចតេជោ ហ៊ុន សែន ប្រធានព្រឹទ្ធសភា ថា សមាជរបស់រដ្ឋសភា-ព្រឹទ្ធសភា ដើម្បីប្រមូលធាតុផ្សំក្នុងការចូលរួមចំណែកដោះស្រាយប ញ្ហាប្រឈមនានារបស់ប្រទេសជាតិ ។
បើតាមឯកឧត្តម ជា ធីរិទ្ធ ដោយយោងតាមរដ្ឋធម្មនុញ្ញ ត្រង់មាត្រា៤ គឺសម្តេចតេជោ ហ៊ុន សែនប្រធានព្រឹទ្ធសភា ជាប្រធាននៃអង្គសមាជ ។
អ្នកនាំពាក្យរដ្ឋសភាឯកឧត្តម កែវ ពិសិដ្ឋ ធ្លាប់ប្រាប់ក្រុមអ្នកយកព័ត៌មានថា ក្រុមការងារបច្ចេកទេស នៃសភាទាំងពីរ កំពុងរៀបចំនីតិវិធីទាក់ទងនឹងការរៀបចំហេដ្ឋារចនាសម្ព័ន្ធ និងការងារផ្សេងៗពាក់ព័ន្ធនឹងសមាជនេះស្របពេល ដែលការរៀបចំសមាជកាន់តែខិតជិតដល់ ។
សូមជម្រាបថា ច្បាប់ស្ដីពីការរៀបចំ និងប្រព្រឹត្តទៅ នៃសមាជរដ្ឋសភា និងព្រឹទ្ធសភា បានកំណត់ថា សមាជរដ្ឋសភា ព្រឹទ្ធសភា គឺជាការប្រជុំរួមគ្នានៃសមាជិករដ្ឋសភា និងព្រឹទ្ធ សភាដើម្បីដោះស្រាយបញ្ហាសំខាន់ៗរបស់ប្រទេសជាតិក្នុងករណីចាំបាច់។ បញ្ហាសំខាន់ៗទាំងនោះ រួមមាន ការគំរាមកំហែងយ៉ាងធ្ងន់ធ្ងរដល់ឯករាជ្យ អធិបតេយ្យ និងបូរណភាពទឹកដី។ ករណីមានប្រធានសក្តិ បណ្តាលឱ្យមានវិនាសកម្មយ៉ាងធ្ងន់ធ្ងរដល់ជាតិ និងប្រជាជន ឬករណីផ្សេងៗទៀត ដែលគណៈកម្មាធិការសមាជយល់ឃើញថា ជាបញ្ហាសំខាន់របស់ប្រទេសជាតិ ៕
ចែករំលែកព័តមាននេះ