រាជធានីភ្នំពេញ ៖ រថយន្តដឹកឥដ្ឋមួយគ្រឿង អ្នកបើកបរ បានអះអាងថា គាត់ងោកមួយភាំង បានរេចង្កូតឡើងសួនច្បារខណ្ឌចែកទ្រូងផ្លូវ បុករះកូនឈើ ប៉ាណូផ្សាយពាណិជ្ចកម្ម និងបង្គោលភ្លើងគោមបំភ្លឺផ្លូវ…
រាជធានីភ្នំពេញ ៖ រថយន្តដឹកឥដ្ឋមួយគ្រឿង អ្នកបើកបរ បានអះអាងថា គាត់ងោកមួយភាំង បានរេចង្កូតឡើងសួនច្បារខណ្ឌចែកទ្រូងផ្លូវ បុករះកូនឈើ ប៉ាណូផ្សាយពាណិជ្ចកម្ម និងបង្គោលភ្លើងគោមបំភ្លឺផ្លូវ បាក់រាបដល់ដី ។
ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោង០៦និង៣០នាទីព្រឹកថ្ងៃទី២៨ ខែមីនា ឆ្នាំ២០២៥ នៅតាមមហាវិថីឈ្នះឈ្នៈ នៅមុខវត្តអង្គប្រពើ ក្នុងភូមិត្រពាំងវែង សង្កាត់គោករការ ខណ្ឌព្រែកព្នៅ រាជធានីភ្នំពេញ ។
រថយន្តដែលមានគ្រោះថ្នាក់នោះ ម៉ាក់ហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3G-5147 បើកបរដោយឈ្មោះ ហាក់ គឹមហួរ ភេទប្រុស អាយុ២៤ឆ្នាំ ស្នាក់នៅឃុំព្រែកអញ្ចាញ ស្រុកមុខកំពូល ខេត្តកណ្ដាល ។
តាមសាក្សីបានឱ្យដឹងថា នៅមុនពេលកើតហេតុ គេឃើញរថយន្តដឹកឥដ្ឋមួយគ្រឿង ខាងលើ ធ្វើដំណើរតាមមហាវិថីឈ្នះឈ្នះ ក្នុងទិសដៅពីជើងមកត្បូង។ នៅពេលធ្វើដំណើរមកដល់ចំណុចកើតហេតុ ស្រាប់តែរថយន្តជ្រុលចង្កូតឡើងសួនច្បារខណ្ឌចែកទ្រូងផ្លូវ បុកកូនឈើរលើងទាំងឬស អស់៤ដើម បង្គោលផ្លាក់ប៉ាណូផ្សាយពាណិជ្ជកម្ម រលើង១ដើម និងបុកបង្គោលភ្លើងគោមបំភ្លឺផ្លូវបាក់រាបដល់ដី ហើយរថយន្តបានជាប់ទៅមុខលែងរួច ដោយឥដ្ឋធ្លាក់នៅរាយប៉ាយពេញផ្លូវ។ ទោះបីជាយ៉ាងណា ពុំបណ្ដាលឲ្យមានមនុស្សរងគ្រោះថ្នាក់ឡើយ ។
ទាក់ទិននឹងការកើតមានគ្រោះថ្នាក់នេះ អ្នកបើកបរបានឲ្យដឹងថា ដោយសារគាត់ងងុយដេកងោកមួយភាំង ក៏រ៉េចង្កូតឡើងសួនច្បារ។នៅមុនពេលកើតហេតុ គាត់បានរៀបឥដ្ឋចំនួន ១ម៉ឺនដុំ ដឹកពីព្រៃកអញ្ចាញ យកទៅដាក់ឲ្យម៉ូយ នៅរាជធានីភ្នំពេញ នៅពេលធ្វើដំណើរមកដល់ចំណុចកើតហេតុ ក៏បានជួបគ្រោះថ្នាក់តែម្ដង ។
បន្ទាប់ពីគ្រោះថ្នាក់ នគរបាលមូលដ្ឋាន ក៏បានចុះទៅកន្លែងកើតហេតុ និងទាក់ទងទៅនគរបាលចរាចរណ៍ ចុះមកវាស់វែង រួចនាំយករថយន្ត ទៅកាន់ការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញ ដើម្បីដោះស្រាយសងការខូចខាតទ្រព្យសម្បត្តិសាធារណៈ ៕
ចែករំលែកព័តមាននេះ