អតីតជើងឯកប្រណាំងកង់ពិភពលោកម្នាក់ រងការចោទប្រកាន់ពាក់ព័ន្ធការស្លា.ប់ប្រពន្ធរបស់ខ្លួន
អូស្ត្រាលី ៖ អតីតកីឡាករប្រណាំងកង់ជើងឯកពិភពលោក Rohan Dennis ត្រូវបានប៉ូលិសចាប់ខ្លួន
អូស្ត្រាលី ៖ អតីតកីឡាករប្រណាំងកង់ជើងឯកពិភពលោក Rohan Dennis ត្រូវបានប៉ូលិសចាប់ខ្លួន
អូស្ត្រាលី ៖ អតីតកីឡាករប្រណាំងកង់ជើងឯកពិភពលោក Rohan Dennis ត្រូវបានប៉ូលិសចាប់ខ្លួនពាក់ព័ន្ធការស្លាប់ប្រពន្ធរបស់គាត់ គឺនាង Melissa Hoskins ដែលជាអតីតកីឡាការិនីប្រណាំងកង់ម្ចាស់ជើងឯកពិភពលោកមួយរូបផងដែរ កាលពីថ្ងៃទី៣១ ខែធ្នូ ឆ្នាំ ២០២៣ កន្លងទៅថ្មីៗនេះ។
ប៉ូលិសអូស្ត្រាលីភាគខាងត្បូង បានចាប់ខ្លួនលោក Rohan Dennis ដែលជាអ្នកបើកបររថយន្តបង្កហេតុ។ លោក Dennis ត្រូវបានចោទប្រកាន់ពីបទបង្កឱ្យមានមនុស្សស្លាប់តាមរយៈការបើកបរប្រកបដោយគ្រោះថ្នាក់ ការបើកបរដោយគ្មានការប្រុងប្រយ័ត្ន និងបង្កគ្រោះថ្នាក់ដល់អាយុជីវិតអ្នកដទៃ។ ទោះយ៉ាងណាក៏ដោយ បុរសជនជាតិអូស្ត្រាលីអាយុ៣៣ឆ្នាំរូបនេះ ត្រូវបានដោះលែងឱ្យនៅក្រៅឃុំ ប៉ុន្តែត្រូវបង្ហាញខ្លួននៅតុលាការទីក្រុងអាដឺឡេត (Adelaide) ម្តងទៀតនៅខែមីនា ឆ្នាំ២០២៤ ហើយសមត្ថកិច្ចជំនាញក៏បន្តការស៊ើបអង្កតរបស់ខ្លួនផងដែរ។
ប្រភពពីសារព័ត៌មាន News Corp បានឱ្យដឹងថា របាយការណ៍ជំហានដំបូងរបស់ប៉ូលិសបង្ហាញថា Hoskins ជនជាតិអូស្ត្រាលីអាយុ៣២ឆ្នាំ បានលោតទៅលើកាបូមុខ ឬ គម្របម៉ាស៊ីនរថយន្ត និងចាប់ដៃទ្វាររថយន្ត មុនពេលរថយន្តបើកចេញទៅ ហើយជនរងគ្រោះបានដួលទៅនឹងដី បន្ទាប់មកអាចអូសតាមរថយន្ត ដែលហេតុការណ៍នេះ កើតឡើងនៅផ្លូវក្បែរផ្ទះពួកគេនៅទីក្រុងអាដឺឡេត។
អ្នកជិតខាងវ័យជំទង់២នាក់បានព្យាយាមជួយសង្គ្រោះបឋម មុនពេលគ្រូពេទ្យមកដល់។ ជនរងគ្រោះត្រូវបានបញ្ជូនទៅមន្ទីរពេទ្យ Royal Adelaide ប៉ុន្តែជាអកុសលដោយសាររបួសធ្ងន់ធ្ងរពេក នាងបានស្លាប់បាត់បង់ជីវិតប៉ុន្មានម៉ោងក្រោយមក។
សូមជម្រាបជូនថា Melissa Hoskins គឺជាជើងឯកពិភពលោកការប្រកួតប្រណាំងកង់ក្នុងសាលក្នុងឆ្នាំ ២០២៥ ហើយបានចូលរួមប្រណាំងនៅព្រឹត្តិការណ៍កីឡាអូឡាំពិកទីក្រុងឡុងដ៍ ចក្រភពអង់គ្លេសឆ្នាំ ២០១២ និងទីក្រុងរីយ៉ូដឺចេណេរ៉ូ ប្រទេសប្រេស៊ីលឆ្នាំ ២០១៦។ Hoskins ដែលប្រកាសចូលនិវត្តន៍ពីអាជីពតាំងពីឆ្នាំ ២០១៧ បានរៀបការជាមួយ Dennis នៅឆ្នាំ ២០១៨ និងមានកូនចំនួនពីរនាក់។
កាលពីខែកុម្ភៈកន្លងទៅ Rohan Dennis បានប្រកាសចូលនិវត្តន៍នៅបញ្ចប់រដូវកាល ២០២៣ បន្ទាប់ពីអាជីពដែលបានឈ្នះដំណាក់កាលនៅ Tour de France, Giro d’Italia និង Vuelta a Espana ។ ម្ចាស់ជើងឯកពិភពលោកទាំងលើផ្លូវ និងនៅក្នុងសាលរូបនេះ បានឈ្នះមេដាយសំរឹទ្ធលើផ្លូវក្នុងព្រឹត្តិការណ៍កីឡាអូឡាំពិកទីក្រុងតូក្យូ ប្រទេសជប៉ុនឆ្នាំ ២០២០ និងបានឈ្នះមេដាយប្រាក់ការប្រកួតក្នុងសាលក្រុមនៅព្រឹត្តិការណ៍ទីក្រុងឡុងដ៍ឆ្នាំ ២០១២។
មរណៈភាពរបស់ Melissa Hoskins បានរំជើបរជួលនៅក្នុងពិភពកីឡាប្រណាំងកង់ ដោយស្ថាប័ន និងអត្តពលិកកីឡាប្រណាំងកង់នៅជុំវិញពិភពលោកបង្ហោះសាររំលែកទុក្ខដ៏ក្រៀមក្រំនេះ ស្របពេលដែល CPA Women សមាគមអ្នកជិះកង់ស្ត្រីទូទាំងពិភពលោក បានចេញសេចក្តីថ្លែងការណ៍មួយថា ជារឿងដ៏រន្ធត់ និងភ្ញាក់ផ្អើលយ៉ាងខ្លាំងចំពោះដំណឹងមរណភាពរបស់ Hoskins ដ៏ដូចផ្ញើការរំលែកទុក្ខដ៏ក្រៀមក្រំទៅកាន់គ្រូសារ និងអ្នកដែលស្រលាញ់នាង ដោយចាប់ផ្តើមពីកូនទាំងពីររបស់នាង៕ (ប្រភព ៖ BBC, AP និង Fox Sports)
ចែករំលែកព័តមាននេះ