កក្រើកទៀតហើយ! ប៉ាក់គីអៅ ប្រកាសព្រមប៉ះសត្រូវចាស់ ផ្លយ ម្តងទៀតក្នុងឆ្នាំនេះ
អន្តរជាតិ ៖ ស្តេចប្រដាល់សកលហ្វីលីពីន ម៉ានី ប៉ាក់គីអៅ (Manny Pacquiao) បានបង្ហើបថា ខ្លួន
អន្តរជាតិ ៖ ស្តេចប្រដាល់សកលហ្វីលីពីន ម៉ានី ប៉ាក់គីអៅ (Manny Pacquiao) បានបង្ហើបថា ខ្លួនបានយល់ព្រមការផ្គូផ្គងដើម្បីប៉ះគូប្រកួតចាស់កំពូលអ្នកប្រដាល់សកលអាមេរិក ផ្លយ មេយវេដឺ (Floyd Mayweather) សារជាថ្មីម្តងទៀត សម្រាប់ការប្រកួតក្រៅផ្លូវការ ឬ Exhibition Match ដែលកំណត់រួចហើយនៅឆ្នាំ ២០២៤ នេះ ប៉ុន្តែពុំទាន់បញ្ជាក់អំពីកាលបរិច្ឆេទច្បាស់លាស់នៅឡើយទេ។
បន្ទាប់បរាជ័យក្រោមស្នាដៃអ្នកប្រដាល់គុយបា Yordenis Ugas កាលពីឆ្នាំ ២០២១ កន្លងទៅ ប៉ាក់គីអៅ បានប្រកាសចូលនិវត្តន៍ពីអាជីពកីឡាប្រដាល់របស់ខ្លួន ដើម្បីផ្តោតលើមហិច្ឆតាក្នុងការឈរឈ្មោះប្រជែងតំណែងប្រធានាធិបតីប្រទេសហ្វីលីពីន។ ប៉ុន្តែទោះបីជាព្យួរស្រោមដៃអាជីពដ៏អស្ចារ្យរបស់ខ្លួនយ៉ាងណាក៏ដោយ ក៏ ប៉ាក់គីអៅនៅតែបន្តសកម្មប្រកួតលក្ខណៈក្រៅផ្លូវការ ដោយថែមទាំងបានឈ្នះអ្នកលេងក្បាច់គុនកូរ៉េខាងត្បូង DK Yoo កាលពីខែធ្នូ ឆ្នាំ ២០២២ កន្លងទៅ។
ស្តេចប្រដាល់សកលហ្វីលីពីនវ័យ៤៥ឆ្នាំរូបនេះ ក៏នៅមានការប្រកួតក្រៅផ្លូវការនាពេលខាងមុខនេះ ដោយត្រូវតទល់ជាមួយនឹងកំពូលអ្នកលេងក្បាច់គុនថៃ ឬ មួយថៃ ប៊ូខាវ បេនឆាមេក (Buakaw Banchamek) ក្រោមច្បាប់ប្រដាល់សកល ដែលគ្រោងនឹងធ្វើឡើងនៅថ្ងៃទី២០ ខែមេសា លើទឹកដីព្រះរាជាណាចក្រថៃ។
ទោះយ៉ាងណាក៏ដោយ ប៉ាក់គីអៅ ហាក់ដូចជាកំពុងសម្លឹងមើលការប្រកួតបន្ទាប់របស់ខ្លួនរួចហើយ ក្រោយបានបង្ហាញវត្តមានកត្តិយសក្នុងព្រឹត្តិការណ៍ RIZIN MMA New Year’s Eve នៅសង្វៀន Saitama Super Arena ប្រទេសជប៉ុន កាលពីថ្ងៃទី៣១ ខែធ្នូ ឆ្នាំ២០២៣។ ការលេចមុខលើសង្វៀនជាមួយអ្នកផ្សព្វផ្សាយរបស់ RIZIN ដែលជាការប្រកួតក្បាច់គុនចម្រុះជប៉ុន លោក Nobuyuki Sakakibara ភ្លាមៗនោះ ប៉ាក់គីអៅ បានបង្ហើបថា លោកនឹងប្រកួតជាមួយមេយវេដឺម្តងទៀត ដោយធ្វើឡើងនៅក្នុងប្រទេសជប៉ុន នៅឆ្នាំ ២០២៤។
ប៉ាក់គីអៅ បានថ្លែងយ៉ាងដូច្នេះថា «អរគុណច្រើនសម្រាប់ការអញ្ជើញខ្ញុំមកទីនេះម្តងទៀត។ ឆ្នាំក្រោយ ខ្ញុំសង្ឃឹមថានឹងបានជួបអ្នករាល់គ្នានៅប្រទេសជប៉ុនម្តងទៀតជាមួយនឹងការប្រកួតដ៏ធំជាមួយនឹង ផ្លយ មេយវេដឺ ។ ខ្ញុំរំភើបចំពោះការប្រកួតនោះ។ សូមអរគុណចំពោះការគាំទ្ររបស់អ្នកនៅក្នុងព្រឹត្តិការណ៍ RIZIN»។
សូមជម្រាបថា មេយវេដឺ ធ្លាប់បានចូលរួមប្រកួតប្រដាល់ចំនួនពីរលើក នៅក្រោមបដាព្រឹត្តិការណ៍ RIZIN។ ជាង១ឆ្នាំ បន្ទាប់ពីការប្រកាសចូលនិវត្តន៍ពីអាជីព ក្រោយយកឈ្នះលើកំពូលអ្នកលេងគុនចម្រុះជនជាតិអៀរឡង់ Conor McGregor កាលពីឆ្នាំ ២០១៧ រួចមក មេយវេដឺ បានត្រឡប់ឡើងសង្វៀនវិញម្តងទៀត ដើម្បីយកឈ្នះលើកីឡាករប្រដាល់សេរីជប៉ុន Tenshin Nasukawa ក្នុងការប្រកួតក្រៅផ្លូវការ ដោយផ្តួលត្រឹមទឹកទី១។ នៅឆ្នាំ ២០២២ មេយវេដឺ បានត្រឡប់ទៅសង្វៀន Saitama Super Arena ដើម្បីតទល់នឹងអ្នកលេងគុនចម្រុះជប៉ុន Mikuru Asakura ជាមួយជ័យជំនះម្តងទៀត។
គួររំលឹកថា ជំនួបលើកទី១ រវាង ប៉ាក់គីអៅ និង មេយវេដឺ បានកើតឡើងកាលពីថ្ងៃទី២ ខែឧសភា ឆ្នាំ២០១៥ ដោយគ្រានោះ មេយវេដឺ ជាអ្នកឈ្នះដោយការសម្រេចឯកច្ឆន្ទពីសំណាក់ចៅក្រម សម្រាប់ការប្រកួតរកប្រាក់បានច្រើនបំផុតនៅក្នុងប្រវត្តិសាស្ត្រកីឡាប្រដាល់សកលពោលគឺ ៦០០លានដុល្លារអាមេរិក៕ (ប្រភព ៖ Daily Mail និង ESPN)
ចែករំលែកព័តមាននេះ