ខេត្តសៀមរាប ៖ ស្ត្រីម្នាក់បានទិញសាំងយកមកចាក់ដុតផ្ទះ បណ្ដាលឱ្យរាលដាលឆេះផ្ទះអស់៣ល្វែង ដោយសារតែខឹងរឿងប្តីមិនទៅយកនាងពីផ្ទះឪពុកម្តាយរបស់ខ្លួន ក្រោយកើតហេតុ ស្ត្រីរូបនេះក៏រត់គេចខ្លួនបាត់ ។ ប៉ុន្តែស្ត្រីរូបនេះ ត្រូវបានសមត្ថកិច្ចឃាត់ខ្លួនកាលពីថ្ងៃទី៣០ ខែធ្នូ ឆ្នាំ២០២៣កន្លងទៅ នៅផ្ទះឪពុកម្តាយរបស់ខ្លួន ស្ថិតក្នុងភូមិរុន ឃុំរុនតាឯក ស្រុកបន្ទាយស្រី និងបញ្ជូនទៅឃុំខ្លួនជាបណ្ដោះអាសន្ន តាមអំណាចនៃដីកាបង្គាប់ឱ្យឃុំខ្លួនរបស់ចៅក្រមស៊ើបសួរសាលាដំបូងខេត្ត ចុះថ្ងៃទី៣១ ខែធ្នូ ឆ្នាំ២០២៣។
ស្ត្រីរូបនេះមានឈ្មោះ ជន់ សុភី អាយុ២៧ឆ្នាំ មានផ្ទៃពោះ៦ខែហើយ ប្រកបរបរលក់ដូរ និងជួសជុលម៉ូតូ ជាប់ចោទពីបទធ្វើឱ្យខូចខាតដោយចេតនា មានស្ថានទម្ងន់ទោស គឺដុតផ្ទះខ្លួនឯង កាលពីវេលាម៉ោងប្រមាណ៩និង៥០នាទីយប់ ថ្ងៃទី២៩ ខែធ្នូ ឆ្នាំ២០២៣ កន្លងទៅ នៅចំណុចផ្ទះល្វែង ស្ថិតក្នុងភូមិបន្ទាយស្រី ឃុំខ្នារសណ្តាយ ស្រុកបន្ទាយស្រី ។
បើតាមសមត្ថកិច្ចបន្តថា មានករណីអគ្គិភ័យមួយកើតឡើង ផ្តើមចេញពីផ្ទះល្វែងជួលដែលមានឈ្មោះ មើរ ខ្មៅ អាយុ៣២ឆ្នាំ និងប្រពន្ធឈ្មោះ ជន់ សុភី អាយុ២៧ឆ្នាំ ជួលបើកជួសជុល និងលក់គ្រឿងបន្លាស់ម៉ូតូ ។
សមត្ថកិច្ចបន្តថា ករណីគ្រោះអគ្គិភ័យនេះ បណ្តាលឱ្យខូចខាតផ្ទះអស់ចំនួន៣ល្វែង ដែលម្ចាស់ផ្ទះឈ្មោះ ផាយ សុខុម ភេទប្រុស អាយុ៤៤ឆ្នាំ ជាអាជីវករ សរុបជាទឹកប្រាក់ប្រមាណ ៤០.០០០ដុល្លារ ព្រមទាំងសម្ភារៈកសិកម្មរបស់អ្នកជួលផ្ទះល្វែងដូចគ្នា ដែលមានឈ្មោះ អ៊ិត ដាវីត អាយុ៣៣ឆ្នាំ ប្រពន្ធឈ្មោះ សេង វ៉ាន់ឌី អាយុ២៨ឆ្នាំ ស្ទើរទាំងស្រុងសរុបជាទឹកប្រាក់ប្រមាណ១០.០០០ដុល្លារ ។
សមត្ថកិច្ចបន្តទៀតថា បន្ទាប់ពីកើតហេតុខាងលើ ស្ត្រីឈ្មោះ ជន់ សុភី បានរត់គេចខ្លួនបាត់ លុះនៅព្រឹកថ្ងៃទី៣០ ខែធ្នូ ឆ្នាំ២០២៣ កម្លាំងនគរបាលស្រុកបន្ទាយស្រី បានធ្វើការស្រាវជ្រាវ និងទៅនាំខ្លួនស្ត្រីឈ្មោះ ជន់ សុភី ចេញពីឃុំរុនតាឯក ស្រុកបន្ទាយស្រី នាំខ្លួនយកមកសាកសួរនៅអធិការដ្ឋាននគរបាលស្រុក ។
នៅចំពោះមុខសមត្ថកិច្ច ស្ត្រីឈ្មោះ ជន់ សុភី ឆ្លើយថា «នៅវេលាម៉ោងប្រមាណ៩និង៥០នាទីយប់ថ្ងៃទី២៩ ខែធ្នូ ឆ្នាំ២០២៣ ដោយសារតែខឹងប្តីមិនទៅយកខ្លួនចេញពីផ្ទះឪពុកម្តាយនៅម្តុំភ្នំបូក ស្ថិតក្នុងភូមិរុន ឃុំរុនតាឯក នាងក៏ធ្វើដំណើរទៅផ្ទះល្វែងដែលប្ដីជួលបើកជួសជុលម៉ូតូ ។ នៅពេលទៅដល់ ក៏បានយកចបជីកគាស់ទ្វារពីខាងក្រោយ រួចចូលទៅក្នុងផ្ទះ ហើយយកប្រេងសាំងចំនួន៣ដបចាក់លើសាបស៊ីម៉ង់ត៍ក្នុងផ្ទះ បន្ទាប់មកក៏កេះដែកកេះដុតតែម្ដង ក្នុងគោលបំណងធ្វើបញ្ច.ប់ជីវិ.ត»។
ស្ត្រីឈ្មោះ ជន់ សុភី ឆ្លើយសារភាពទៀតថា «ប៉ុន្តែដោយសារតែអាណិតកូនក្នុងផ្ទៃ ខ្លួនក៏គេចចេញទៅពួនសម្ងំនៅគុម្ពឫស្សីក្បែរនោះ រួចបន្តរត់គេចខ្លួនទៅសម្ងំនៅផ្ទះឪពុកម្ដាយ ស្ថិតក្នុងឃុំរុនតាឯក ស្រុកបន្ទាយស្រីតែម្ដង។ លុះរហូតដល់ព្រឹកថ្ងៃទី៣០ ខែធ្នូ ឆ្នាំ២០២៣ ខ្លួនក៏ត្រូវនគរបាលនាំទៅសាកសួរនៅអធិការដ្ឋានស្រុកបន្ទាយស្រីតែម្តងទៅ» ។
សមត្ថកិច្ចបញ្ជាក់ថា ជាមួយនឹងការចាប់ឃាត់ខ្លួននេះដែរ សមត្ថកិច្ចក៏បានចាប់យកវត្ថុតាងរួម
មាន ៖ អំបែងដបប្រេងសាំងផ្ទុះបែកចំនួន៤បំណែក, ស្បែកជើងមនុស្សស្រីពណ៌ខ្មៅ១គូ និងចបជីក១ផងដែរ ៕
ចែករំលែកព័តមាននេះ