សាំបាប្រេស៊ីលប្រឈមអត់បានលេង World Cup 2026 ជុំវិញការលូកដៃពីភាគីទី៣
ស្វីស ៖ សហព័ន្ធកីឡាបាល់ទាត់ពិភពលោក FIFA បានចេញការព្រមានធ្ងន់ៗដល់សហព័ន្ធកីឡាបាល់
ស្វីស ៖ សហព័ន្ធកីឡាបាល់ទាត់ពិភពលោក FIFA បានចេញការព្រមានធ្ងន់ៗដល់សហព័ន្ធកីឡាបាល់
ស្វីស ៖ សហព័ន្ធកីឡាបាល់ទាត់ពិភពលោក FIFA បានចេញការព្រមានធ្ងន់ៗដល់សហព័ន្ធកីឡាបាល់ទាត់ប្រេស៊ីល ដែលហៅកាត់ថា CBF ជាមួយនឹងការហាមឃាត់ក្រុមជម្រើសជាតិ និងក្លិបអាជីពរបស់ប្រទេសនេះមិនឱ្យចូលរួមការប្រកួតអន្តរជាតិ ជាពិសេសការប្រកួតព្រឹត្តិការណ៍ FIFA World Cup 2026 ដែលប្រទេសកាណាដា សហរដ្ឋអាមេរិក និងម៉ិកស៊ិកធ្វើម្ចាស់ផ្ទះរួមគ្នា។
យោងតាមប្រភពពីសារព័ត៌មានអង់គ្លេស The Mirror កាលពីថ្ងៃទី២៧ ខែធ្នូ កន្លងទៅ បានរាយការណ៍ថា ការព្រមានរបស់ FIFA ផ្តោតលើចេតនាជាក់ស្តែងរបស់ CBF ដើម្បីចូលធ្វើអន្តរាគមន៍ និងបញ្ជាឱ្យមានការបោះឆ្នោតជ្រើសរើសប្រធានាសហព័ន្ធថ្មី ដើម្បីជំនួសតំណែងលោក Ednaldo Rodrigues ។
កាលពីដើមខែនេះ លោក Ednaldo Rodrigues អាយុ៦៩ឆ្នាំ និងអ្នកដែលត្រូវបានតែងតាំងទាំងអស់របស់គាត់ត្រូវបានដកចេញពីតំណែង បន្ទាប់ពីសេចក្តីសម្រេចរបស់តុលាការទីក្រុងរីយ៉ូដឺចេណេរ៉ូ (Rio de Janeiro) ។ ចៅក្រមបានលើកឡើងពីភាពមិនប្រក្រតីក្នុងការបោះឆ្នោតកាលឆ្នាំ ២០២២ ដោយតុលាការកំពូលប្រេស៊ីលបានតម្កល់សេចក្តីសម្រេចនោះយ៉ាងត្រឹមត្រូវកាលពីសប្តាហ៍មុន។
សេចក្តីសម្រេចរបស់តុលាការទីក្រុងរីយ៉ូ ក៏បានចាត់ទុកលោក Jose Perdiz ដែលជាប្រធានតុលាការកីឡាកំពូលប្រេស៊ីល គួរតែជាអ្នកធ្វើអន្តរាគមន៍ក្នុងការរៀបចំការបោះឆ្នោតសម្រាប់តំណែងប្រធានសហព័ន្ធថ្មីក្នុងរយៈពេល៣០ថ្ងៃ។ ប៉ុន្តែទោះយ៉ាងណា FIFA បានហាមឃាត់ការជ្រៀតជ្រែករបស់រដ្ឋាភិបាល និងភាគីទី៣ នៅក្នុងសមាគមនៃសមាជិករបស់ខ្លួន។
ឥឡូវនេះ FIFA ថែមទាំងបានផ្ញើលិខិតទៅនាយកប្រតិបត្តិបាល់ទាត់ប្រេស៊ីល ដើម្បីព្រមានថា CBF ប្រឈមនឹងការព្យួរសកម្មភាពទាំងស្រុង ប្រសិនបើពួកគេមិនអើពើនឹងការណែនាំរបស់ FIFA ដើម្បីរង់ចាំមុនពេលរៀបចំការបោះឆ្នោតប្រធានសហព័ន្ធថ្មី។ ឯកសារនេះ ត្រូវបានទទួលដោយសារព័ត៌មាន ESPN និង AP ដោយមានអាជ្ញាធរបាល់ទាត់អាមេរិកខាងត្បូង ដែលហៅកាត់ថា CONMEBOL ជាអ្នកគាំទ្រ FIFA ផងដែរ។
ឥឡូវនេះ អាជ្ញាធររបស់ CONMEBOL និង FIFA មានបំណងបង្កើតគណៈកម្មការពិសេសមួយនៅក្នុងប្រទេសប្រេស៊ីល ដើម្បីពិភាក្សាអំពីបញ្ហានេះបន្ថែមទៀត នៅថ្ងៃទី៨ ខែមករា ឆ្នាំ២០២៤។ ការវិវឌ្ឍន៍នេះ អាចបំផ្លាញការដេញថ្លៃរបស់ប្រេស៊ីល ដើម្បីធ្វើជាម្ចាស់ផ្ទះការប្រកួតបាល់ទាត់ពិភពលោកនារីឆ្នាំ ២០២៧ ផងដែរ៕
ចែករំលែកព័តមាននេះ