អាមេរិកបា.ញ់ទម្លាក់ដ្រូននិងមីស៊ីលជាច្រើនដែលក្រុមហ៊ូធីបា.ញ់សំដៅនាវានិងអ៊ីស្រាអែល
សហរដ្ឋអាមេរិក-យេម៉ែន ៖ កងទ័ពអាមេរិកប្រកាសកាលពីថ្ងៃទី២៦ធ្នូថា បានស្ទាក់បា.ញ់ទម្លាក់នា
សហរដ្ឋអាមេរិក-យេម៉ែន ៖ កងទ័ពអាមេរិកប្រកាសកាលពីថ្ងៃទី២៦ធ្នូថា បានស្ទាក់បាញ់ទម្លាក់នាភាគខាងត្បូងសមុទ្រក្រហម ដ្រូននិងមីសីុលជាច្រើនគ្រឿងដែលពួកឧទ្ទាមហ៊ូធីយេម៉ែន ប្រើវាយប្រហារសំដៅអីុស្រាអែល។ នេះបើតាមសេចក្ដីរាយការណ៍នាថ្ងៃទី២៧ធ្នូរបស់AFP។
ក្រុមឧទ្ទាមហ៊ូធីគាំទ្រដោយអីុរ៉ង់និយាយថា ពួកគេវាយប្រហារដោយដ្រូននិងមីសីុលសំដៅលើនាវាមួយគ្រឿងនិងអីុស្រាអែល។ កងនាវាចម្បាំងអាមេរិកបានល្បាតរួមជាមួយបណ្ដានាវានៃក្រុមចម្រុះអន្តរជាតិដើម្បីការពារការធ្វើនាវាចរណ៍កាត់សមុទ្រយុទ្ធសាស្ត្រនេះ។ ពួកឧទ្ទាមនោះនិយាយថា ការវាយប្រហាររបស់ពួកគេគឺជាការរួមសាមគ្គីភាពជាមួយក្រុមហាម៉ាស់ប៉ាឡេស្ទីនដែលកំពុងធ្វើសង្គ្រាមជាមួយអីុស្រាអែលនៅជ្រោយហ្គាហ្សា។
ទីបញ្ជាការដ្ឋានយោធាអាមេរិកនៅមជ្ឈឹមបូព៌ាថ្លែងថា កាលពីថ្ងៃទី២៦ធ្នូកងទ័ពអាមេរិកដែលដាក់ពង្រាយក្នុងតំបន់នេះ បានបាញ់ទម្លាក់ដ្រូនវាយប្រហារ១២គ្រឿងនិងមីសីុលបាលីស្ទិកប្រឆាំងនាវា៣គ្រាប់ ព្រមទាំងមីសីុលបណ្ដែត២គ្រាប់នៅភាគខាងត្បូងសមុទ្រក្រហមដែលបាញ់ចេញដោយពួកហ៊ូធី អំឡុងពេលប្រមាណជា១០ម៉ោង។ ការបាញ់ស្ទាក់មួយចំនួនធ្វើឡើងដោយកងយន្តហោះប្រយុទ្ធដែលធ្វើប្រតិបត្តិការចេញពីនាវាផ្ទុកយន្តហោះអាមេរិកUSS EISENHOWERដែលមានវត្តមានក្នុងសមុទ្រនោះ។ ពុំមានការខូចខាតណាមួយ ក្នុងចំណោមនាវាដែលមានវត្តមានក្នុងតំបន់និងពុំមានអ្នករបួសណាម្នាក់ត្រូវបានរាយការណ៍ឡើយ។
មុននេះពួកឧទ្ទាមហ៊ូធីអះអាងក្នុងសេចក្ដីប្រកាសមួយថា បានធ្វើប្រតិបត្តិការវាយប្រហារសំដៅនាវាពាណិជ្ជកម្មមួយគ្រឿងមានឈ្មោះថា MSC UNITED និងបញ្ចេញដ្រូនវាយប្រហារប្រឆាំងបណ្ដាគោលដៅយោធានាភាគខាងត្បូងអីុស្រាអែល។ កងទ័ពអីុស្រាអែលនិយាយថា បានស្ទាក់កម្ទេចគោលដៅអាកាសប្រទូស្តរ៉ាយមួយដែលកំពុងហោះសំដៅដែនដីខ្លួន។
តាំងពីចាប់ផ្ដើមសង្គ្រាមប្រឆាំងពួកហាម៉ាស់ពីថ្ងៃទី៧តុលាមក ពួកឧទ្ទាមហ៊ូធីបានបង្កើនការវាយប្រហារលើបណ្ដានាវា ដែលមានទំនាក់ទំនងជាមួយអីុស្រាអែលក្នុងដែនទឹកនៃឆ្នេរសមុទ្រយេម៉ែន។ រយៈពេលប៉ុន្មានសប្ដាហ៍ចុងក្រោយនេះមីសីុលនិងដ្រូនជាច្រើន ត្រូវបាញ់ទម្លាក់ដោយនាវាចម្បាំងអាមេរិក បារាំងនិងអង់គ្លេសដែលល្បាតរួមគ្នាក្នុងតំបន់សមុទ្រក្រហម៕
ចែករំលែកព័តមាននេះ