ប្រកាសកាលបរិច្ឆេទ ការប្រកួតកក្រើកប្រវត្តិសាស្ត្រប្រដាល់ថៃរវាង ប៉ាក់គីអៅ-ប៊ូខាវ
ប្រទេសថៃ ៖ ការប្រកួតកក្រើកប្រវត្តិសាស្ត្រប្រដាល់ប្រទេសថៃ រវាងស្តេចប្រដាល់សកលហ្វីលីពីន ម៉ានី
ប្រទេសថៃ ៖ ការប្រកួតកក្រើកប្រវត្តិសាស្ត្រប្រដាល់ប្រទេសថៃ រវាងស្តេចប្រដាល់សកលហ្វីលីពីន ម៉ានី ប៉ាក់គីអៅ (Manny Pacquiao) និងកំពូលអ្នកលេងគុនថៃ ឬ មួយថៃ ប៊ូខាវ បេនឆាមេក (Buakaw Banchamek) ត្រូវបានប្រកាសកាលបរិច្ឆេទជាផ្លូវការ ដែលនឹងធ្វើឡើងនៅថ្ងៃទី ២០ ខែ មេសា ឆ្នាំ ២០២៤។ នេះបើយោងតាមការបង្ហោះពីទំព័រហ្វេសប៊ុកផ្លូវការរបស់ប៊ូខាវ «Banchamek Gym» និងត្រូវបានចេញផ្សាយដោយសារព័ត៌មានថៃ Nation នៅថ្ងៃទី២៧ ខែធ្នូ ឆ្នាំ២០២៣។
ទោះបីជាយ៉ាងណាក៏ដោយ មិនទាន់មានការបញ្ជាក់ជាផ្លូវការណាមួយថា ជំនួបដែលត្រូវប្រសិទ្ធនាមថា «The Match of Legends: Manny Pacquiao vs Buakaw Banchamek» នឹងធ្វើឡើងនៅឯណានោះទេ។ ការប្រកួតក្រៅផ្លូវការ ឬ Exhibition Match មួយនេះ ត្រូវបានរៀបចំឡើងដោយក្រុមហ៊ុន Fresh Air Festival Co Ltd របស់ប្រទេសថៃ និងប្រតិបត្តិករភាពយន្ត SF Corporation ជាមួយនឹងការរៀបចំដែលចំណាយថវិកាចំនួន ៨៧៥លានបាត ដែលស្មើនឹង ២៥លានដុល្លារអាមេរិក។
គូនេះនឹងឡើងសង្វៀនប្រកួតក្រោមទម្រង់សកលនៃច្បាប់ប្រដាល់អន្តរជាតិ ដែលមើលឃើញថា ប៉ាក់គីអៅ នឹងមានប្រៀបជាង ប៊ូខាវ។ យ៉ាងនេះក្តី ម្ចាស់ជើងឯកមួយថៃវ័យ៤១ឆ្នាំ នៅតែសកម្មក្នុងការប្រកួតប្រដាល់ជាច្រើនកន្លងមក ខណៈដែលម្ចាស់ខ្សែក្រវាត់ពិភពលោកចំនួន១២ លើ៨ប្រភេទទម្ងន់ផ្សេងគ្នា ប៉ាក់គីអៅ អាយុ៤៥ឆ្នាំ បានប្រកាសចូលនិវត្តន៍ពីអាជីពប្រដាល់កាលពីឆ្នាំ ២០២១ ។ កំពូលអ្នកប្រដាល់ទាំងពីរ នឹងប៉ះគ្នា៦ទឹក ១ទឹកមានរយៈពេល ៣នាទី។ អ្នកឈ្នះនឹងទទួលបានប្រាក់រង្វាន់យ៉ាងហោច ២៨៩,០០០ដុល្លារអាមេរិក។ នេះបើតាមបង្ហើបពីអ្នករៀបចំ។
លោក Vinij Lertratanachai នាយកប្រតិបត្តិក្រុមហ៊ុន Fresh Air Festival បានថ្លែងថា «យើងមានកិត្តិយសណាស់ដែលមាន ម៉ានី ប៉ាក់គីអៅ និង ប៊ូខាវ បេនឆាមេក សម្រាប់ព្រឹត្តិការណ៍ប្រវត្តិសាស្ត្រមួយនេះ ហើយក៏ជាឱកាសម្តងក្នុងមួយជីវិតដែលអ្នកមិនចង់រំលង»។
ម៉ានី ប៉ាក់គីអៅ គឺជាវីរៈបុរសជាតិរបស់ប្រទេសហ្វីលីពីន ដែលគាត់ធ្លាប់ជាសមាជិកព្រឹទ្ធសភាផងដែរ។ ភាពរហ័សរហួនរបស់ស្តេចប្រដាល់ហ្វីលីពីនរូបនេះ តែងតែផ្តួលគូប្រកួតជាច្រើនលើកច្រើនសារ ដើម្បីក្លាយជាអ្នកប្រដាល់តែម្នាក់គត់លើពិភពលោក ដែលឈ្នះខ្សែក្រវាត់ពិភពលោក៨ប្រភេទទម្ងន់ផ្សេងគ្នា។
ងាកមក ប៊ូខាវ បេនឆាមេក គឺជានិមិត្តរូបកីឡាប្រដាល់មួយថៃ ជាមួយនឹងបច្ចេកទេសវាយចេញដ៏ល្អឥតខ្ចោះ ដោយត្រូវប្រជាជនថៃចាត់ទុកថា អ្នកប្រដាល់មួយថៃដ៏អស្ចារ្យបំផុតគ្រប់ពេល និងទទួលបានការគោរពយ៉ាងខ្លាំងនៅក្នុងប្រទេសថៃ៕ (ប្រភព ៖ Nation Thailand)
ចែករំលែកព័តមាននេះ