រាជធានីភ្នំពេញ ៖ តាមសេចក្តីរាយការណ៍បានឱ្យដឹងថា ជនបង្កជាអ្នកបើកបររថយន្ដទំនើបម៉ាក Jeep ដែលបុកមនុស្សស្លាប់នៅនឹងកន្លែង ត្រូវបានចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនដាក់ពន្ធនាគារPJជាបណ្តោះអាសន្នហើយ កាលពីល្ងាចថ្ងៃទី២៤ ខែធ្នូ ឆ្នាំ២០២៣ ។
អត្ថបទពាក់ព័ន្ធ ៖
-អនុប្រធានការិយាល័យនៃគណៈកម្មការគ្រប់គ្រងល្បែ.ងពាណិជ្ជកម្មកម្ពុជា១រូប ជួបគ្រោះអកុសលតាមផ្លូវ
-ថ្ងៃនេះ ជនសង្ស័យដែលបើករថយន្ត Jeep បុកមនុស្សស្លា.ប់ ចូលខ្លួនសារភាពហើយ
ការសម្រេចឃុំខ្លួនជនបង្កនោះ ត្រូវបានលោក ប៉េង ម៉េងគ័ង អ្នកនាំពាក្យអយ្យការអមសាលាដំបូងរាជធានីភ្នំពេញបានថ្លែងឲ្យដឹងថា តំណាងអយ្យការបានសម្រេចបើកការស៊ើបសួរលើឈ្មោះ ព្រហ្ម វិចិត្រសុសក្តា ពីបទ.បើកបរដោយធ្វេសប្រហែស ខ្ជីខ្ជារ មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិស្តីពីចរាចរណ៍ផ្លូវគោក បណ្តាលឲ្យស្លាប់អ្នកដទៃ និងបទរត់គេចខ្លួនតាមមាត្រា៨៥នៃច្បាប់ស្តីពីចរាចរណ៍ផ្លូវគោក និងមាត្រា៥៤៣ នៃក្រមព្រហ្មទណ្ឌ ។
សូមជម្រាបថា ជនបង្កដែលជាអ្នកបើកបររថយន្ដទំនើបម៉ាកJeep បណ្តាលឲ្យបុកស្លាប់អ្នកដទៃនៅកន្លែងកើតហេតុ ដែលស្ថិតក្នុងខណ្ឌទួលគោក រាជធានីភ្នំពេញ កាលពីថ្ងៃទី១៤ ខែធ្នូ ឆ្នាំ២០២៣ បានចូលសារភាព និងទទួលស្គាល់កំហុសរបស់ខ្លួន នៅការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញ នារសៀលថ្ងៃទី២៣ ខែធ្នូ ឆ្នាំ២០២៣ ដើម្បីទទួលខុសត្រូវចំពោះមុខច្បាប់នូវរាល់កំហុសដែលខ្លួនបានប្រព្រឹត្ត ។
នៅចំពោះមុខលោកឧត្តមសេនី យ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជ ធានីភ្នំពេញបានបញ្ជាក់ថា អ្នកបើករថយន្ដឈ្មោះ ព្រហ្ម វិចិត្រសុសក្ដា បានចូលខ្លួនមកកាន់ស្នងការដ្ឋាននគរបាលរាជធានីភ្នំពេញហើយ ដើម្បីទទួលស្គាល់កំហុសរបស់ខ្លួនតាមផ្លូវច្បាប់ ។
លោកឧត្តមសេនីយ៍ឯក ជួន ណារិន្ទ បានថ្លែងបែបនេះថា «ក្រុមគ្រួសារ និងសាមីខ្លួន បានមកប្រគល់ខ្លួននៅស្នងការនគរបាលរាជធានីភ្នំពេញ នៅវេលាម៉ោង ១១ព្រឹកនាថ្ងៃទី២៣ ខែធ្នូ ឆ្នាំ២០ ២៣នេះ» ។ បន្ទាប់ពីជនបង្កបានចូលខ្លួនទទួលស្គាល់កំហុសនោះ សមត្តកិច្ចនគរបាលជំនាញការិយាល័យចរាចរផ្លូវគោក បានកសាងសំណុំរឿង បញ្ជូនទៅសាលាដំបូងរាជធានីភ្នំពេញ ដើម្បីចាត់ការទៅតាមផ្លូវច្បាប់ ។
សូមបញ្ជាក់ទៀតថា កាលពីថ្ងៃទី១៩ ខែធ្នូ ឆ្នាំ២០២៣ លោក ប្លង់ សុផល ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចេញដីកាបញ្ជាឲ្យអ្នកបើករថយន្ដ Jeep ដែលបុកជនរងគ្រោះម្នាក់ស្លាប់ នៅខណ្ឌទួលគោកនោះ ឲ្យចូលខ្លួនទៅ កាន់សាលាដំបូងរាជធានីភ្នំពេញ បន្ទាប់ពីគេចវេសមិនទទួល ខុសត្រូវ ក្រោយបង្កគ្រោះថ្នាក់ចរាចរណ៍បណ្តាលឲ្យអ្នកដទៃស្លាប់បាត់បង់អាយុជីវិត ។
ហើយជនបង្កឈ្មោះ ព្រហ្ម វិចិត្រសុសក្ដា ភេទប្រុស អាយុ២៣ឆ្នាំ ត្រូវបង្ហាញខ្លួននៅតុលាការឲ្យបានមុនថ្ងៃទី០៩ ខែមករា ឆ្នាំ២០២៤ នៅរៀងរាល់ម៉ោងធ្វើការ ។ ក្នុងដីកានោះក៏បានកត់សម្គាល់ថា អនុញ្ញាតឲ្យមន្ដ្រីនគរបាលយុត្តិធម៌ ប្រើប្រាស់កម្លាំងសាធារណៈ ដើម្បីបង្ខំឲ្យបុគ្គលឈ្មោះ ព្រហ្ម វិចិត្រសុសក្ដា ចូលបង្ហាញខ្លួនឲ្យបានមុនថ្ងៃកំណត់ ។
ទាក់ទិន និងករណីគ្រោះថ្នាក់ចរាចរណ៍ខាងលើនេះដែរ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានណែនាំឲ្យព្រះរាជ អាជ្ញារាជធានីភ្នំពេញ ធ្វើការពិនិត្យស្រាវជ្រាវ និងដោះស្រាយឲ្យបានត្រឹមត្រូវ និងម៉ឹងម៉ាត់បំផុតទៅតាមផ្លូវច្បាប់ ។ ករណីគ្រោះ ថ្នាក់ចរាចរណ៍នេះ បានបង្កឲ្យមានការបញ្ចេញមតិយោបល់ផ្សេងៗគ្នា នៅតាមបណ្ដាញសង្គមគ្រាដែលអ្នកបើកបររថយន្ដបង្ក បានព្យាយាមគេចខ្លួនក្រោយកើតហេតុ ហើយគំរាមក្រុមគ្រួសាររបស់ជនរងគ្រោះមិនឲ្យដាក់ពាក្យបណ្ដឹង ជាថ្នូរ និងប្រាក់១០០០ ដុល្លារអាមេរិក ដើម្បីបញ្ចប់រឿង ដែលធ្វើឲ្យមានការរិះគន់ផ្ទុះលើបណ្តាញសង្គម ។
សូមបញ្ជាក់ថា កាលពីថ្ងៃទី១៤ ខែធ្នូ ឆ្នាំ២០២៣ មានករណីគ្រោះថ្នាក់ចរាចរណ៍មួយកើតឡើង រវាងរថយន្ត Jeep ពណ៌ខ្មៅ ពាក់ផ្លាកលេខភ្នំពេញ2CB-9963 និងម៉ូតូ បុកគ្នានៅត្រង់ចំណុចផ្លូវប្រសព្វ លើផ្លូវលេខ៣១៧ ប្រសព្វផ្លូវលេខ៥៦៦ ភូមិ៦ សង្កាត់បឹងកក់២ ខណ្ឌទួលគោក រាជធានីភ្នំពេញ ។ ហេតុការណ៍នោះបណ្ដាលឲ្យអ្នកបើកបរម៉ូតូស្លាប់ភ្លាមៗនៅនឹងកន្លែង ហើយអ្នកបើករថយន្ដបានគេចខ្លួនបាត់ ។ ជនរងគ្រោះត្រូវបានក្រុមគ្រួសារ និងសាច់ញាតិនាំយកទៅធ្វើបុណ្យបូជាតាមប្រពៃណី ។
ចំណែករថយន្ត និងម៉ូតូត្រូវបានសមត្តកិច្ចនាំយកទៅរក្សាទុកនៅការិយាល័យនគរបាលចរាចរផ្លូវគោក ដើម្បីរង់ចាំធ្វើការដោះស្រា យ ។ ជោគវាសនាចុងក្រោយជនបង្កដែលបើករថយន្តបុកមនុស្សស្លាប់ បោះលុយ១០០០ ដុល្លារអាមេរិកគំរាមមិនឲ្យភាគីជនរង គ្រោះប្តឹងនោះ ត្រូវបានចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ