បារាំងអាចប្តូរទីតាំងពិធីបើកកីឡាអូឡាំពិកក្រុងប៉ារីសឆ្នាំក្រោយ ជុំវិញបញ្ហាសន្តិសុខ
បារាំង ៖ ប្រធានាធិបតីប្រទេសបារាំង លោក Emmanuel Macron កាលពីពេលថ្មីៗនេះ បានថ្លែងថា
បារាំង ៖ ប្រធានាធិបតីប្រទេសបារាំង លោក Emmanuel Macron កាលពីពេលថ្មីៗនេះ បានថ្លែងថា
បារាំង ៖ ប្រធានាធិបតីប្រទេសបារាំង លោក Emmanuel Macron កាលពីពេលថ្មីៗនេះ បានថ្លែងថា ប្រទេសបារាំងបានត្រៀមខ្លួនរួចជាស្រេច ដើម្បីផ្លាស់ប្តូរទីតាំងនៃពិធីបើកព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ ២០២៤ ប្រសិនបើមានបញ្ហាសន្តិសុខដោយប្រការណាមួយ។ នេះបើយោងតាមប្រភពពីទីភ្នាក់ងារសារព័ត៌មាន Reuters ចេញផ្សាយកាលពីថ្ងៃទី២២ ខែធ្នូ ឆ្នាំ២០២៣ កន្លងទៅ។
សង្គ្រាមអ៊ីស្រាអែល និងក្រុមហាម៉ាស់នៅហ្គាហ្សា និងភាពតានតឹងនៅតំបន់ផ្សេងទៀតនៅមជ្ឈិមបូព៌ា និងពិភពលោក បានបង្កើនការព្រួយបារម្ភអំពីសន្តិសុខសម្រាប់ព្រឹត្តិការណ៍កីឡាអូឡាំពិកនាឆ្នាំក្រោយ។ ពិធីបើកព្រឹត្តិការណ៍ជាប្រវត្តិសាស្ត្រមួយនេះ គ្រោងធ្វើឡើងនៅមាត់ទន្លេ Seine កណ្តាលទីក្រុងប៉ារីស នៅចុងខែកក្កដា។
ពាក់ព័ន្ធជាមួយនឹងពិធីបើកព្រឹត្តិការណ៍ទីក្រុងប៉ារីសឆ្នាំ ២០២៤ លោក Emmanuel Macron បានប្រាប់ប្រព័ន្ធផ្សព្វផ្សាយបារាំងថា «យើងនឹងរៀបចំពិធីបើកដ៏ពិសេសមួយដែលខ្ញុំសង្ឃឹមថា នឹងផ្តល់ជនជាតិបារាំងនូវមោទនភាពយ៉ាងខ្លាំង ហើយនឹងក្លាយជាពេលនៃភាពស្រស់ស្អាត សិល្បៈពិត ការប្រារព្ធពិធីនៃកីឡា និងតម្លៃរបស់យើង»។
ជាមួយគ្នានោះ លោកបានលើកឡើងអំពីបញ្ហាសន្តិសុខផងដែរ ដោយលើកយកការវាយប្រហារដោយក្រុមជ្រុលនិយមដ៏សាហាវ ដែលកើតឡើងនៅទីក្រុងប៉ារីសកាលពីឆ្នាំ ២០១៥ កន្លងទៅ ដែលជាឧទាហរណ៍នៃវិបត្តិធ្ងន់ធ្ងរអាចបង្ខំឱ្យមានការគិតឡើងវិញ ឬផ្លាស់ប្តូរផែនការសម្រាប់ពិធីបើកកីឡាអូឡាំពិកឆ្នាំ ២០២៤។ បុរសវ័យ៤៦ឆ្នាំរូបនេះ បានបញ្ជាក់ថា «ជាការពិតណាស់ ក្នុងនាមជាអ្នករៀបចំដ៏ជំនាញ ដូច្នេះច្បាស់ណាស់យើងមានផែនការ B ផែនការ C និងផ្សេងទៀត អ្នកត្រូវតែត្រៀមខ្លួនសម្រាប់អ្វីទាំងអស់ ប្រសិនបើមានការកើនឡើងភាពតានតឹងសកល ឬនៅក្នុងតំបន់ ឬក៏មានការវាយប្រហារភា្លមៗជាបន្តបន្ទាប់ ហើយនេះគឺជាផែនការ»។
បន្ថែមពីលើសនេះទៀត លោក Macron បានទទូចថា ការសម្រេចចិត្តណាមួយដើម្បីផ្លាស់ទីតាំងពិធីបើកនឹងមិនត្រូវបានធ្វើឡើងភ្លាមៗនោះទេ ដោយផែនការបម្រុងទុកនឹងត្រូវបានប្រើប្រាស់លុះត្រាតែកម្រិតនៃភាពអសន្តិសុខតម្រូវឱ្យពិនិត្យមើលឡើងវិញនូវគ្រោងការណ៍ដំបូង។
គណៈកម្មាធិការអូឡាំពិកបានប្តេជ្ញាចិត្តរួចហើយ ក្នុងការបង្កើនសន្តិសុខសម្រាប់ព្រឹត្តិការណ៍នានាជុំវិញទីក្រុងប៉ារីស ស្របពេលដែលយោធាបារាំងបានអះអាងអំពីការដាក់ពង្រាយទាហាន១៥,០០០នាក់ អបជាមួយកម្លាំងប៉ូលិស សម្រាប់ការរៀបចំសន្តិសុខដែលមិនធ្លាប់មានពីមុនមក។ ការដាក់ពង្រាយទាហានប្រហែល១ម៉ឺននាក់នៅក្នុង និងជុំវិញទីក្រុងប៉ារីស និង ៥ពាន់នាក់ទៀត ត្រូវដាក់ពង្រាយនៅទីតាំងផ្សេងទៀតនៃប្រទេសបារាំង ដោយខ្លះនៅឆ្ងាយរហូតដល់កោះប៉ាស៊ីហ្វិក តាហ៊ីទី (Tahiti) ដែលនឹងរៀបចំការប្រកួតវិញ្ញាសាកីឡាជិះស្គីអូឡាំពិក។ ភ្ញៀវទេសចរណ៍ប្រហែល ៦០ម៉ឺននាក់ត្រូវបានរំពឹងទុកសម្រាប់ការចូលរួមអបអរសាទរពិធីបើកព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤ នៅថ្ងៃទី ២៦ ខែ កក្កដា ឆ្នាំ ២០២៤។
គួរបញ្ជាក់ថា ព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤ នឹងដំណើរការចាប់ពីថ្ងៃទី២៦ ខែកក្កដា រហូតដល់ថ្ងៃទី១១ ខែសីហា មុនពេលដែលព្រឹត្តិការណ៍កីឡាប៉ារ៉ាឡាំពិកចូលមកដល់ ដែលនឹងដំណើរការចាប់ពីថ្ងៃទី២៨ ខែសីហា រហូតដល់ថ្ងៃទី៨ ខែកញ្ញា៕ (ប្រភព ៖ Reuters និង Inside The Games)
ចែករំលែកព័តមាននេះ