រាជធានីភ្នំពេញ ៖ លោករ៉ុង ឈុន ប្រធានសហជីពកម្មករ និងជាប្រធានសមាគមគ្រូបង្រៀនកម្ពុជាឯករាជ្យ បានមកជួបជុំជាមួយកម្មកររាប់រយនាក់នៅមុខរោងចក្រមិថុនា កាលពីវេលាម៉ោង៨ព្រឹកថ្ងៃទី២៥ ឧសភា ២០១១ ដើម្បីដឹកនាំហ្វូងបាតុកម្មដង្ហែជាក្បួនទៅកាន់ទីលានសេរីភាព ឬប្រជាធិបតេយ្យ ដែលមានទីតាំងស្ថិតនៅក្នុងសង្កាត់វត្តភ្នំ
រាជធានីភ្នំពេញ ៖ លោករ៉ុង ឈុន ប្រធានសហជីពកម្មករ និងជាប្រធានសមាគមគ្រូបង្រៀនកម្ពុជាឯករាជ្យ បានមកជួបជុំជាមួយកម្មកររាប់រយនាក់នៅមុខរោងចក្រមិថុនា កាលពីវេលាម៉ោង៨ព្រឹកថ្ងៃទី២៥ ឧសភា ២០១១ ដើម្បីដឹកនាំហ្វូងបាតុកម្មដង្ហែជាក្បួនទៅកាន់ទីលានសេរីភាព ឬប្រជាធិបតេយ្យ ដែលមានទីតាំងស្ថិតនៅក្នុងសង្កាត់វត្តភ្នំ ប្រយោជន៍ទាមទារឱ្យថៅកែរោងចក្រមិថុនា បើកប្រាក់អតីតភាពការងារ និងប្រាក់បំណាច់ឆ្នាំ ប៉ុន្តែពុំអាចទៅរួចទេ ដោយសមត្ថកិច្ចមានប៉ូលិស ប៉េអឹម រារាំងនិងព្យាយាមបំបែកហ្វូង ។
សូមបញ្ជាក់ថា មុននេះកម្មកររោងចក្រមិថុនាជាង២ពាន់នាក់បានយល់ព្រមបើកប្រាក់ឧបត្ថម្ភ៣០ដុល្លារ ក្នុងម្នាក់ៗរួចហើយ ដើម្បីបញ្ចប់ការតវ៉ា នៅសល់ជាង១ពាន់នាក់ប៉ុណ្ណោះ មិនទាន់យល់ព្រមបើក ហើយពួកគេនៅតែធ្វើការតវ៉ាដូចជាពេលនេះជាដើម ។ សូមបញ្ជាក់ កាលពីព្រឹកថ្ងៃទី ២០ ខែឧសភា ឆ្នាំ២០១១ កម្មកររោងចក្រមិថុនាប្រមាណ២០០នាក់បានប្រមូលផ្តុំគ្នាស្តាប់ការប្រកាសរបស់លោករុ៉ង ឈុន ប្រធានសហភាពសហជីពដែលឱ្យកម្មករបន្តធ្វើបាតុកម្មដើម្បីប្រឆាំងតវ៉ាចំពោះនិយោជកដែលបានបើកប្រាក់បំណាច់ឆ្នាំ២០ដុល្លារ ដោយបំផុសថា និយោជកគួរបើកប្រាក់ដល់កម្មករ១០០ដុល្លារយ៉ាងតិចបំផុត។
នៅចំពោះមុខកម្មករ កម្មការិនីរោងចក្រមិថុនា លោករុ៉ង ឈុន បានប្រកាសឱ្យកម្មករ កម្មការិនីប្រមូលផ្តុំគ្នា ហើយគ្រោងធ្វើបាតុកម្មហែក្បួននៅថ្ងៃពុធសប្តាហ៍ក្រោយ ដោយនិយាយថាកម្មករ កម្មការិនីត្រូវបានប្រាក់បំណាច់ឆ្នាំ១០០ដុល្លារ មិនត្រូវទទួលប្រាក់២០ដុល្លារពីនិយោជកនោះទេ ។ ទោះបីជាយ៉ាងណាបើតាមប្រភពព័ត៌មានពីសមត្ថកិច្ចក៏ដូចជាខាងភាគីរោងចក្របានឱ្យដឹងមុននេះថា កម្មករ កម្មការិនីប្រមាណ៦០ភាគរយដែលធ្វើការនៅក្នុងរោងចក្រមិថុនាបានព្រមព្រៀងបើកប្រាក់បំណាច់ឆ្នាំចំនួន២០ដុល្លារពីនិយោជកហើយ ប៉ុន្តែនៅសល់កម្មករតែប៉ុន្មាននាក់ប៉ុណ្ណោះដែលបន្តធ្វើការតវ៉ាដោយស្តាប់តាមការឃោសនារបស់មនុស្សមួយចំនួនតូចដែលកំពុងកេងប្រវ័ញ្ចយកផលប្រយោជន៍ពីក្រុមកម្មករ កម្មការិនី។
រោងចក្រមិថុនា ស្ថិតនៅតាមដងមហាវិថីសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ បានត្រូវអគ្គីភ័យឆាបឆេះខ្ទេចខ្ទីជាង១ខែមកហើយ ហើយទាំងកម្មករនិងនិយោជកត្រូវគេនិយាយថា សុទ្ធតែជាជនរងគ្រោះដូចគ្នា ព្រោះកម្មករត្រូវបាត់បង់ការងារ ឯនិយោជកត្រូវខាតបង់យ៉ាងច្រើន។ គួររំឭកថា កាលពីវេលាម៉ោង១០ព្រឹកថ្ងៃទី២៣ ឧសភា ២០១១ កម្មកររោងចក្រមិថុនាជាច្រើនរយនាក់ និងតំណាងកម្មកររោងចក្រមិថុនាដឹកដោយលោកស៊ីថា ប្រធានសហជីពសិទ្ធិប្រយោជន៍កម្មករ បានធ្វើសន្និសីទកាសែតរយៈមួយម៉ោង ដើម្បីប្រាប់ពីគោលជំហរ និងការតវ៉ារបស់ពួកគេ ។
លោកស៊ីថា ប្រធានសហជីពសិទ្ធិប្រយោជន៍កម្មករបានប្រាប់មកកោះសន្តិភាពថា ព្រឹកនេះ យើងទាំងអស់គ្នាជាកម្មកររាប់រយនាក់ និងមានខ្ញុំជាតំណាងកម្មកររោងចក្រមិថុនា ធ្វើសន្និសីទកាសែត គឺដើម្បីទាមទារឱ្យថៅកែរោងចក្រ និងក្រសួងការងារ ស្ថាប័នពាក់ព័ន្ធផ្សេងៗ ជួយដោះស្រាយឱ្យពួកគេ ជាពិសេសគឺរោងចក្រមិថុនាមួយទៀតដែលមិនទាន់ឆេះ មានកម្មករធ្វើការ១.០០០នាក់ ហេតុអ្វីក៏បិទដំណើរការមិនព្រមឱ្យពួកគាត់ធ្វើការតទៅទៀត។ សូមបញ្ជាក់ថា រោងចក្រមិថុនាមានអាតូចមួយទៀតក្បែរអាធំដែលឆេះអស់មានកម្មករប្រមាណ១.០០០នាក់ ធ្វើការនៅទីនោះ លុះអាធំដែលមានកម្មករជាង៤.០០០នាក់ ឆេះអស់ទៅ ស្រាប់តែអាតូចនោះក៏ត្រូវថៅកែបិទដំណើរការផងដែរ អញ្ចឹងហើយទើបពេលនេះពួកគេធ្វើការឱ្យបើកវិញ ។ លោកស៊ីថា បានលើកឡើងថា សូមឱ្យថៅកែរោងចក្របើកប្រាក់បំណាច់ឆ្នាំឱ្យបានត្រឹមត្រូវដល់កម្មករ ។ ពួកគេទាមទារប្រាក់បំណាច់ឆ្នាំ ក្នុងម្នាក់ចំនួន១៥០ដុល្លារ បើមិនដូច្នេះទេ ពួកគេប្រមាណ២.០០០នាក់ នឹងធ្វើការទាមទាររហូត ។
សូមបញ្ជាក់ថា កន្លងមក កម្មកររោងចក្រមិថុនាជាង៤.០០០នាក់ បានប្រមូលផ្តុំគ្នាតវ៉ាទៅកាន់រោងចក្រវ៉ាយរ៉ូឡែត នៅក្នុងសង្កាត់អូរបែកក្អម ជាសាខារបស់រោងចក្រមិថុនា ដើម្បីបង្អាក់ចង្វាក់ផលិតកម្ម និងក្រោយមករោងចក្រដដែលនេះបានទៅតវ៉ាដល់រោងចក្រមួយទៀតជាសាខារបស់រោងចក្រមិថុនាផងដែរ ក្នុងសង្កាត់ចោមចៅ ដើម្បីបង្អាក់ចង្វាក់ផលិតកម្មដែរ ប៉ុន្តែមិនបានសម្រេច ៕
ចែករំលែកព័តមាននេះ