១យប់១ថ្ងៃហើយ អគ្គិភ័យដែលឆេះក្បែររដ្ឋសភា នៅមិនទាន់រលត់នៅឡើយ
- ភ្នំពេញ
រាជធានីភ្នំពេញ ៖ អគ្គិភ័យដែលឆាបឆេះអគារ SKY CITY អូតែល និងស្ប៉ា កាលពីម្សិលមិញមកទល់នេះថ្ងៃទី២១ ធ្នូ សមត្ថកិច្ចនៅមិនទាន់អាចបាញ់រលត់អស់ទាំងស្រុងបាន…
រាជធានីភ្នំពេញ ៖ អគ្គិភ័យដែលឆាបឆេះអគារ SKY CITY អូតែល និងស្ប៉ា កាលពីម្សិលមិញមកទល់នេះថ្ងៃទី២១ ធ្នូ សមត្ថកិច្ចនៅមិនទាន់អាចបាញ់រលត់អស់ទាំងស្រុងបាន ។
សូមបញ្ជាក់ថា ហេតុការណ៏ឆេះបានបង្កការភ្ញាក់ផ្អើល កាលពីវេលាម៉ោង០៩ និង ៥០នាទីព្រឹកថ្ងៃទី២០ ខែធ្នូ ឆ្នាំ២០២៣ ស្ថិតនៅតាមបណ្តោយផ្លូវរដ្ឋសភា ក្នុងសង្កាត់ទន្លបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានបឋមពីបុគ្គលិកនៅខាងក្នុងបានអោយដឹងថា នៅមុនពេលកើតហេតុ គេមានឮសំឡេងផ្ទុះ រួចក៏កើតជាផ្សែងហុយខ្លាំងពេញក្នុងអគារ មួយសន្ទុះក្រោយមក ក៏កើតជាអណ្តាតភ្លើង រួមនិងផ្សែងខ្មៅយ៉ាងសន្ធោរសន្ធៅ ។ ស្រាប់តែផ្អើលបុគ្គលិកទាំងអស់បានរត់ចេញពីអគារខាងលើ រួចធ្វើការទាក់ទងទៅសមត្ថកិច្ចមូលដ្ឋានអោយជួយមកអន្តរាគមន៍ ។
បើតាមបញ្ជាក់ពីលោក វរសេនីយ៍ឯក ព្រហ្ម យ៉ន នាយការិយាល័យបង្ការ និងពន្លត់ នៃស្នងការដ្ឋាននគរបាលរាជធានីភ្នំពេញ ជាអ្នកដឹកនាំចុះពន្លត់ផ្ទាល់បានប្រាប់អោយដឹងថា ក្នុងប្រតិបត្តិ
ការណ៍ពន្លត់អគារខាងលើ គិតចាប់ពីម្សិលមិញមកទល់ថ្ងៃនេះ បានប្រើប្រាស់រថយន្តពន្លត់អស់ ២០០ជាងគ្រឿងមកហើយ ក្នុងនោះ មានរថយន្តស្នងកាដ្ឋាននគរបាលរាជធានីភ្នំពេញ , រថយន្តរបស់អគ្គស្នងការ , រថយន្ត OCIC , រថយន្តទីក្រុងអូឡាំព្យា , រថយន្តទីក្រុងរណបជ្រោយចង្វារ , រថយន្តទីក្រុងពេជ្រ , រថយន្តសាលាក្រុង និងរថយន្តទីក្រុងកោះនរា ។
លោកបានបន្តបន្ថែមទៀតថា « មកទល់និងពេលនេះ ប្រហែល២៧ម៉ោង ហើយអគ្គិភ័យនៅមិនទាន់រលត់នៅឡើយ ចំពោះប្រភពនៃការឆេះសមត្ថកិច្ចបានរកឃើញហើយ ប៉ុន្តែមិនអាចចូលទៅបាញ់បានដោយសារតែបន្ទប់ដែលបានឆេះនោះ គឺនៅលើខ្យល់ ហើយច្រកចូលទៅបាញ់ពន្លត់ភ្លើង នោះមានផ្សែងហុយខ្លាំង រួមនិងក្តៅថែមទៀតផង ទើបធ្វើអោយមានការលំបាកក្នុងការបាញ់ពន្លត់ចំពោះអគ្គិភ័យខាងលើនេះ ។
ប្រភពដដែលបន្តថា ខណៈពេលនេះ កងកម្លាំងបានទម្លុះតាមជញ្ជាំងខាងក្រោយ ដើម្បីធ្វើការពន្លត់ម្តង ក្រែងទទួលបានផលល្អនិងរលត់លឿនជាងនេះ ដោយកំឡុងពេលវាយទម្លុះនិងបាញ់ពន្លត់នោះ កងកម្លាំងម្នាក់ក៏បានរងរបួសដោយសារតែ កញ្ចក់បង្អួតបែកខ្ទៀតមកត្រូវ ដៃផងដែរ និងបានបញ្ជូនទៅមន្ទីរពេទ្យភ្លាមៗ ។
បច្ចុប្បន្ន សមត្ថកិច្ចកំពុងតែព្យាយាមបាញ់ពន្លត់ អគ្គិភ័យមួយនេះអោយរលត់ ។ ចំពោះមូលហេតុសមត្ថកិច្ចនូវមិនទាន់សន្និដ្ឋានបាននូវឡើយ ព្រោះថា អគ្គិភ័យខាងលើនេះនូវមិនទាន់ គ្រប់គ្រងបាននូវឡើយ ។
មានព័ត៌មានបន្ថែម កោះសន្តិភាពផ្សាយជូនបន្ត ។ ដោយ៖ រដ្ឋា
ចែករំលែកព័តមាននេះ