ខេត្តព្រៃវែង ៖ ថ្មីៗនេះបងប្អូនមហាជនមួយចំនួនធំ ពិសេសអ្នកប្រើប្រាស់បណ្តាញសង្គមបានចាប់អារម្មណ៍យ៉ាងខ្លាំង លើរូបភាពជាច្រើនសន្លឹក ដែលបង្ហាញពីប្រព័ន្ធធារាសាស្ត្រ ឬប្រឡាញទឹកនៅតាមវាលស្រែដ៏ស្រស់ស្អាតទាក់ទាញភ្នែកមហាជន ដោយក្នុងនោះ មានមតិខ្លះលើកឡើងថា នោះមិនមែនជាប្រទេសជប៉ុនទេ…
ខេត្តព្រៃវែង ៖ ថ្មីៗនេះបងប្អូនមហាជនមួយចំនួនធំ ពិសេសអ្នកប្រើប្រាស់បណ្តាញសង្គមបានចាប់អារម្មណ៍យ៉ាងខ្លាំង លើរូបភាពជាច្រើនសន្លឹក ដែលបង្ហាញពីប្រព័ន្ធធារាសាស្ត្រ ឬប្រឡាញទឹកនៅតាមវាលស្រែដ៏ស្រស់ស្អាតទាក់ទាញភ្នែកមហាជន ដោយក្នុងនោះ មានមតិខ្លះលើកឡើងថា នោះមិនមែនជាប្រទេសជប៉ុនទេ គឺនៅខ្មែរយើង គឺខេត្តកំពង់ឆ្នាំង ។
រូបភាពជាង១០សន្លឹក បង្ហាញប្រឡាញបេតុងមានទឹកពេញបៀបរត់តាមវាលស្រែខៀវស្រងាត់របស់ប្រជាជន និងរូបខ្លះមានទាំងដើមត្នោតជាជួរអមនឹងប្រឡាញទឹកបេតុង ពិតជាស្រស់ស្អាតខ្លាងណាស់ ។
យ៉ាងណាមិញ មហាជនអ្នកប្រើប្រាស់បណ្តាញសង្គមហ្វេសប៊ុកជាច្រើននាក់ មានការយល់ច្រឡំ ដោយលើកឡើងថា ប្រឡាយទឹកបេតុងរត់កាត់វាលស្រែនោះ គឺមានទីតាំងនៅខេត្តកំពង់ឆ្នាំ តែតាមការពិតទីតាំងរូបភាពនោះ គឺនៅខេត្តព្រៃវែង ។ ដំបូងឡើយតាមរយៈរូបភាពកាលពីកន្លងទៅនៅក្នុងបណ្តាញសង្គមហ្វេកប៊ុក មានគណនីមួយឈ្មោះកសិកម្ម កសិឧស្សាហកម្ម និងសិប្បកម្ម បានធ្វើការចែកចាយដោយរូបភាព និងសំណេរក្បត់ខ្លឹមថា « ប្រឡាយទឹកបេតុង ដែលបូមពីទន្លេ ដាក់បញ្ចូលស្រែ! នៅខេត្តកំពង់ឆ្នាំង» ។
យ៉ាងណាមិញ ក្រោយមានការចែកចាយសំណេរ និងរូបភាពពុំស៊ីគ្នានោះគណនីឈ្មោះដដែល « កសិកម្ម កសិឧស្សាហកម្ម និងសិប្បកម្ម» ក៏បានធ្វើការកែតម្រូវសំណេរដែលបានសរសេរឡើងវិញថា « ប្រឡាយទឹកបេតុង ដែលបូមពីទឹកទន្លេ ដាក់បញ្ចូលស្រែ! នៅខេត្តកំពង់ឆ្នាំង! (រូបភាពពីព្រៃវែង តែកំពង់ឆ្នាំង ក៏មានបែបនេះដែរ ៧ខេត្តចាប់ផ្តើមមាន)!»។ ដូច្នេះសង្ឃឹមថា បងប្អូនប្រជាពលរដ្ឋឈប់មានការយល់ច្រឡំតទៅទៀត ក្រោយគណនីខាងលើ ក៏បានបញ្ជាក់មកកាន់សារព័ត៌មានកោះសន្តិភាពថា រូបភាពនេះនៅខេត្តព្រៃវែង ដោយសារនៅកំពង់ឆ្នាំងខែប្រាំងមិនទាន់បង្កបង្កើនផល គ្មានរូបភាពស្អាត ដូច្នេះលោកបានយករូបភាពនៅព្រៃវែងបង្ហោះទៅ ដោយលោកគ្រាន់តែចង់បង្ហាញថា នៅកំពង់ឆ្នាំងក៏មានប្រឡាយទឹកអញ្ចឹងដែរ ។
សូមរម្លឹកថា រដ្ឋាភិបាលអូស្ត្រាលីតាមរយៈកម្មវិធីខ្សែសង្វាក់តម្លៃកសិកម្មកម្ពុជា ហៅកាត់ថា កាវ៉ាក់(CAVAC) បានផ្តល់ជំនួយទឹកប្រាក់ ៧ លានដុល្លារអាមេរិក សម្រាប់ការសាងសង់ប្រព័ន្ធធារាសាស្ត្រស្តង់ដាអូស្ត្រាលីចំនួន៤ខ្សែ ក្នុងខេត្តព្រៃវែង ។ នេះបើយោងតាមសេចក្តីប្រកាសព័ត៌មាន កាលពីថ្ងៃទី២៨ ខែកុម្ភៈ ឆ្នាំ២០១៩ របស់ស្ថាតទូតអូស្ត្រាលីប្រចាំប្រទេសកម្ពុជា ។ ប្រព័ន្ធធារាសាស្ត្រទាំង៤ នឹងមានទីតាំងនៅក្នុង ស្រុកព្រះស្តេច ស្រុកពាមជរ ស្រុកពាមរក៍ និងស្រុកកំពង់ត្របែក ដែលនឹងជួយសម្រួលជីវភាពរស់នៅរបស់ប្រជាពលរដ្ឋក្នុងតំបន់ជាង ១៥០០គ្រួសារ ។ ប្រព័ន្ធធារាសាស្ត្រនេះនឹងសាងសង់ពីបេតុង ដែលនឹងរួមមានស្ថានីយ៍បូមទឹករួម ប្រព័ន្ធបង្ហូរទឹកដោយផ្ទាល់ ប្រឡាយមេ និងប្រឡាយរងជាច្រើន។
គម្រោងនេះនឹងមានសមត្ថភាពផ្តល់ទឹកជូនដល់ប្រជាពលរដ្ឋអាចប្រើប្រាស់បង្កបង្កើនផល និងធ្វើស្រែបានពីរទៅបីដងក្នុងមួយឆ្នាំ ។ ប្រព័ន្ធធារាស្ត្រមួយនេះជាគំរូល្អជាងគេមួយក្នុងចំណោមប្រព័ន្ធធារាសាស្ត្រដែលមានស្រាប់ហើយ។ ក្រៅពីការជួយបង្កើតប្រព័ន្ធធារាសាស្ត្រ កាវ៉ាក់ ក៏បានបង្កើតជាវគ្គបណ្តុះបណ្តាលដល់សហគមន៍កសិករ ឱ្យចេះប្រើប្រាស់ទឹក ដើម្បីប្រតិបត្តិ និងថែទាំប្រព័ន្ធធារាសាស្ត្រឱ្យបានល្អប្រសើរ។
ប្រាកដណាស់សម្រាប់ប្រជាកសិករខ្មែរយើងវិញ ក្រោយពីបានឃើញនូវរូបភាពប្រព័ន្ធធារាសាស្ត្រទំនើបបែបនេះ ក៏បានបង្ហាញចំណាប់អារម្មណ៍ចង់បាននូវប្រឡាយទឹកបែបនេះ មាននៅទូទាំងប្រទេសកម្ពុជាផងដែរ ព្រោះមិនខ្វះខាតទឹកដើម្បីធ្វើស្រែនោះទេ ។
ជាការពិតណាស់ ក្រោយមានការបង្ហោះចែកចាយជាហូរហែរ មានបងប្អូនប្រជាពលរដ្ឋជាច្រើនបានសម្តែងក្តីរីករាយ ដោយមហាជនខ្លះបានលើកឡើងថា« នេះបានហៅថាផែនការយូរអង្វែង និងមានប្រសិទ្ធភាព ។ សូមសរសើរ។ »។ និងមហាជនខ្លះទៀតលើកឡើងថា « នៅព្រៃវែង បើធ្វើបានគ្រប់ខេត្តកាន់តែល្អ »។ ហើយមហាជនខ្លះទៀតក៏សុំទីតាំងជាដើម ព្រោះចង់ទៅទស្សនានៅតំបន់មួយនេះផងដែរ ៕ ដោយ ៖ លីហួរ គឹម ឆាយ
ចែករំលែកព័តមាននេះ