កូរ៉េខាងជើងជ្រើសយករមណីយដ្ឋានស្គីទឹកកក ដើម្បីទាក់ទាញភ្ញៀវទេសចររុស្ស៊ី
កូរ៉េខាងជើង ៖ ប្រទេសកូរ៉េខាងជើង កំពុងព្យាយាមទាក់ទាញភ្ញៀវទេសចររុស្ស៊ីដោយគេចពីទណ្ឌកម្ម
កូរ៉េខាងជើង ៖ ប្រទេសកូរ៉េខាងជើង កំពុងព្យាយាមទាក់ទាញភ្ញៀវទេសចររុស្ស៊ីដោយគេចពីទណ្ឌកម្មលោកខាងលិច សម្រាប់រមណីយដ្ឋានស្គីទឹកកកដ៏ធំបំផុតរបស់ខ្លួន ដែលមានតម្លៃប្រមាណ២៦លានដុល្លារអាមេរិក។ នេះបើយោងតាមប្រភពពី The Sun ចេញផ្សាយកាលពីថ្ងៃទី១៨ ខែធ្នូ ឆ្នាំ២០២៣។
យោងតាមទូរទស្សន៍រដ្ឋកូរ៉េខាងជើង កាលពីថ្មីៗនេះ បានបង្ហាញវីដេអូនៃការស្វាគមន៍គណៈប្រតិភូមកពីតំបន់ចុងបូព៌ា Primorsky Krai ប្រទេសរុស្ស៊ីទៅកាន់រមណីយដ្ឋានស្គីទឹកកក Masikryong ក្បែរទីក្រុង Wonsan ខេត្ត Kangwon ។ តាមរយៈដំណើរទស្សនកិច្ចនេះ អាជ្ញាធរចុងបូព៌ារុស្ស៊ីអះអាងថា ប្រទេសកូរ៉េខាងជើងចង់បង្កើតផ្លូវធ្វើដំណើរថ្មីជាមួយប្រទេសជិតខាង ហើយពួកគេកំពុងធ្វើការលើគម្រោងផ្សព្វផ្សាយទេសចរណ៍សម្រាប់កុមារ និងមនុស្សពេញវ័យផងដែរ។
ប្រទេសកូរ៉េខាងជើងបានស្នើផ្លូវរថភ្លើង ផ្លូវសមុទ្រ និងផ្លូវអាកាសថ្មីរវាងប្រទេសនានាក្នុងការព្យាយាមដើម្បីជំរុញវិស័យទេសចរណ៍។ កូរ៉េខាងជើងបានបង្ហាញពីចំណាប់អារម្មណ៍ក្នុងការបង្កើតសេវារថភ្លើងប្រចាំពីទីក្រុង Ussuriysk ចុងបូព៌ារបស់រុស្ស៊ីទៅកាន់ទីក្រុង Tumangang និង Rajin របស់កូរ៉េខាងជើងនៅជិតព្រំដែន។ ក្រុមហ៊ុនអាកាសចរណ៍រដ្ឋកូរ៉េខាងជើង Air Koryo បានរៀបចំជើងហោះហើរបន្ថែម នៅពេលដែលចំនួនអ្នកទស្សនាកើនឡើង ខណៈដែលបច្ចុប្បន្នក្រុមហ៊ុនធ្វើការហោះហើរទៀងទាត់ទៅកាន់ប្រទេសរុស្ស៊ី២ដងក្នុងមួយសប្តាហ៍ បន្ទាប់ពីបានបន្តការធ្វើដំណើរកាលពីខែសីហាកន្លងទៅ។
អ្នកជំនាញមួយចំនួនបានប្រាប់សារព័ត៌មាន NK News ថា ផែនការនេះ អាចដំណើរការទៅបាន ដ្បិតបច្ចុប្បន្នលិខិតឆ្លងដែនរុស្ស៊ីត្រូវបានរឹតបន្តឹងកាន់តែខ្លាំងឡើងនៅក្នុងតំបន់ផ្សេងទៀតនៃពិភពលោក ស្របពេលរុស្ស៊ី និងកូរ៉េខាងជើងមានយន្តការរួចហើយ ដែលអនុញ្ញាតឱ្យមានការផ្លាស់ប្តូររូបិយប័ណ្ណកាន់តែងាយ និងរលូន។
យ៉ាងណាមិញ លោក Simon Cockerell អ្នកគ្រប់គ្រងទូទៅក្រុមហ៊ុន Koryo Tours ដែលជាក្រុមហ៊ុនទេសចរណ៍ឯករាជ្យរបស់លោកខាងលិច ដែលមានមូលដ្ឋាននៅទីក្រុងប៉េកាំង ឯកទេសទេសចរណ៍ជាក្រុម និងឯករាជ្យទៅកាន់ប្រទេសកូរ៉េខាងជើង ហាក់មានមន្ទិលអំពីភាពជោគជ័យនៃកិច្ចខិតខំប្រឹងប្រែងនេះ ដោយលោកបានប្រាប់ NK News ថា ចំនួនប្រជាជនរុស្ស៊ីនៅចុងបូព៌ាមានតិចតួច បើប្រៀបធៀបទៅនឹងប្រទេសចិន។ មន្ត្រី Primorsky Krai ទាំងនេះអាចសន្យាអ្វីទាំងអស់ ហើយអាចផ្តល់ជូនដើម្បីលើកកម្ពស់វិស័យទេសចរណ៍។ ប៉ុន្តែនៅទីបំផុត អ្នកធ្វើដំណើរគឺជាអ្នកជ្រើសរើសគោលដៅថ្ងៃឈប់សម្រាករបស់ពួកគរផ្ទាល់។
សូមជម្រាបថា រមណីយដ្ឋានកីឡារដូវរងាស្ទើរតែបោះបង់ចោលរបស់លោក គីម ជុងអ៊ុន បានបរាជ័យនៅក្នុងការទាក់ទាញភ្ញៀវទេសចរអន្តរជាតិយ៉ាងច្រើន ចាប់តាំងពីការបើកដំណើរការនៅឆ្នាំ ២០១៣។ រមណីយដ្ឋានដ៏ធំដែលលាតសន្ធឹងលើផ្ទៃដីជាង ១,៤០០ហិកតាមួយនេះ ត្រូវបានសាងសង់ឡើងដោយកងទ័ព និងត្រូវការអ្នកជិះស្គីចំនួន៥ពាន់នាក់ក្នុងមួយថ្ងៃ ប៉ុន្តែដោយហេតុថា ប្រជាជនកូរ៉េខាងជើងភាគច្រើនស្ថិតក្នុងភាពក្រីក្រ និងគ្មានលទ្ធភាពទិញសំបុត្រតម្លៃ៣៨ដុល្លារក្នុងម្នាក់ សម្រាប់ការចូលកម្សាន្តក្នុងរមណីយដ្ឋាននេះឡើយ។
ក្រៅពីជាកន្លែងជិះស្គី Masikryong Ski Resort ក៏មានបម្រើសណ្ឋាគារស្នាក់នៅ ដែលមានបន្ទប់សូណា ខារ៉ាអូខេ អាងហែលទឹក និងមានបារនៅជាន់ទី៩ ដែលមានទេសភាពដ៏ស្រស់ស្អាត រួមជាមួយនឹងភោជនីយដ្ឋានមួយនៅកំពូលភ្នំផ្តល់នូវទិដ្ឋភាពស្រស់ត្រកាលបែប Panoramic ៕
ចែករំលែកព័តមាននេះ