ក្រុមអ្នករៀបចំការរត់អ៊ុលត្រាម៉ារ៉ាតុងចិនឆ្នាំ ២០២១ ត្រូវកាត់ទោសដាក់ពន្ធនាគារច្រើនឆ្នាំ
ចិន ៖ ប្រព័ន្ធផ្សព្វផ្សាយរដ្ឋចិនបានរាយការណ៍ថា អ្នករៀបចំកម្មវិធីរត់អ៊ុលត្រាម៉ារ៉ាតុងឆ្នាំ ២០២១
ចិន ៖ ប្រព័ន្ធផ្សព្វផ្សាយរដ្ឋចិនបានរាយការណ៍ថា អ្នករៀបចំកម្មវិធីរត់អ៊ុលត្រាម៉ារ៉ាតុងឆ្នាំ ២០២១ នៅភាគពាយព្យ ប្រទេសចិន ដែលកើតជាគ្រោះអកុសលបណ្តាលឱ្យអ្នករត់ចំនួន ២១នាក់បានស្លាប់ ត្រូវបានកាត់ទោសដាក់ពន្ធនាគារជាច្រើនឆ្នាំទៅតាមតួនាទីរបស់ពួកគេ។ នេះបើយោងតាមប្រភពពីទីភ្នាក់ងារព័ត៌មាន AFP ចេញផ្សាយកាលពីថ្ងៃទី ១៨ ខែ ធ្នូ ឆ្នាំ ២០២៣។
ទីភ្នាក់ងារព័ត៌មាន ស៊ីនហួ (Xinhua) បានរាយការណ៍ថា មនុស្សចំនួន៥នាក់ ដែលជាប់ពាក់ព័ន្ធនឹងការរៀបចំមិនបានល្អនៃព្រឹត្តិការណ៍រត់អ៊ុលត្រាម៉ារ៉ាតុងឆ្នាំ ២០២១ ត្រូវបានកាត់ទោសដាក់ពន្ធនាគារចាប់ពី៣ឆ្នាំ ទៅ៥ឆ្នាំកន្លះ ដោយតុលាការទីក្រុង Baiyin ក្នុងខេត្តហ្គានស៊ូ ដែលហេតុការណ៍រន្ធត់នេះ កើតឡើងកាលពីខែ ឧសភា ឆ្នាំ ២០២១ បន្ទាប់ពីការរត់ឧបសគ្គរយៈចម្ងាយឆ្ងាយលើភ្នំមានចម្ងាយ១០០គីឡូម៉ែត្រ បានបណ្តាលមនុស្ស២១នាក់ស្លាប់ ដោយសារតែភ្លៀងធ្លាក់ខ្លាំង ចុះត្រជាក់ ខ្យល់បក់ខ្លាំង និងមានដុំទឹកកកតូចៗធ្លាក់ថែមទៀតផង។
ទីភ្នាក់ងារព័ត៌មាន ស៊ីនហួ បានរាយការណ៍ថា ជនជាប់ចោទទាំង៥នាក់ ត្រូវបានកាត់ទោសពីបទរៀបចំព្រឹត្តិការណ៍ទ្រង់ទ្រាយធំ ដែលនាំឱ្យមានឧបទ្ទវហេតុសុវត្ថិភាព។ របាយការណ៍ដដែលបន្ថែមថា នៅក្នុងទីក្រុង Lanzhou នៃខេត្តហ្គានស៊ូ មន្ត្រីម្នាក់ត្រូវបានកាត់ទោសដាក់ពន្ធនាគារ ៥ឆ្នាំ និង ១០ខែ ពីបទបំពានកាតព្វកិច្ច និងការស៊ីសំណូក ហើយមួយផ្សេងទៀត ៣ឆ្នាំកន្លះ សម្រាប់ការបំពានកាតព្វកិច្ចខ្លួន។
ការរត់ចម្ងាយឆ្ងាយ ឬ អ៊ុលត្រាម៉ារ៉ាតុង និងកីឡាឧបសគ្គជាច្រើនផ្សេងទៀត បាននឹងកំពុងរីកដុះដាលយ៉ាងខ្លាំងនៅប្រទេសចិនក្នុងរយៈពេលប៉ុន្មានឆ្នាំចុងក្រោយនេះ ដោយសារតែរដ្ឋាភិបាលជំរុញការធ្វើលំហាត់ប្រាណសម្រាប់មនុស្សគ្រប់វ័យ បើទោះបីជាព្រឹត្តិការណ៍ខ្លះបានបង្កបញ្ហាម្តងហើយម្តងទៀតយ៉ាងណាក៏ដោយ។
ឧបទ្ទវហេតុឆ្នាំ ២០២១ បានចោទជាសំណួរអំពីមូលហេតុដែលក្រុមអ្នករៀបចំទំនងជាមិនអើពើនឹងបញ្ហាអាកាសធាតុ ហើយនាំឱ្យមានការអំពាវនាវជាថ្មីសម្រាប់ច្បាប់តឹងរ៉ឹងជុំវិញព្រឹត្តិការណ៍កីឡា។ បន្ទាប់ពីការស្លាប់នេះ រដ្ឋបាលទូទៅនៃកីឡារបស់ទីក្រុងប៉េកាំងបានប្រកាសថា ព្រឹត្តិការណ៍ដែលគ្មានស្តង់ដារសុវត្ថិភាពជាតិនឹងត្រូវផ្អាក រួមទាំងការរត់ផ្លូវឡើងភ្នំ កីឡាហោះហើរ Wingsuit Flying និងព្រឹត្តិការណ៍រត់ចម្ងាយឆ្ងាយបំផុត៕
ចែករំលែកព័តមាននេះ