អណ្ដាតភ្លើងឆាបឆេះរោងចក្រផលិតខ្សែភ្លើងយ៉ាងសន្ធោសន្ធៅ
- ភ្នំពេញ
រោងចក្រផលិតខ្សែភ្លើងមានឈ្មោះថា «ជ័រធីប្រាយធីង» មួយកន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅអស់មួយអគារ និងបណ្ដាលឱ្យរងការខូចខាត
រាជធានីភ្នំពេញ ៖ រោងចក្រផលិតខ្សែភ្លើងមានឈ្មោះថា «ជ័រធីប្រាយធីង» មួយកន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅអស់មួយអគារ និងបណ្ដាលឱ្យរងការខូចខាតសម្ភារៈនៅខាងក្នុងនោះអស់ទាំងស្រុង បង្កឲ្យមានការភ្ញាក់ផ្អើលកាលពីវេលាម៉ោង៦និង២០នាទីយប់ ថ្ងៃទី១៧ ខែធ្នូ ឆ្នាំ២០២៣ ស្ថិតនៅក្នុងភូមិកប់គង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
បើតាមការឲ្យដឹងពីបុរសជាសន្តិសុខប្រចាំការនៅទីតាំងរោងចក្រកើតហេតុខាងលើ បានប្រាប់ឲ្យដឹងថា នៅមុនកើតហេតុ រូបគាត់ឃើញអណ្តាតភ្លើងលាយឡំជាមួយនឹងផ្សែងយ៉ាងខ្មួលខ្មាញ់បានឆាបឆេះចេញពីអគារកើតហេតុយ៉ាងសន្ធោសន្ធៅ ដោយពុំដឹងថា តើមកពីបញ្ហាអ្វីនោះទេ?។
បុរសជាសន្តិសុខ បន្តថា ខណៈពេលនោះដែរ រូបគាត់ក៏ប្រញាប់ប្រញាល់ទាក់ទងទៅខាងម្ចាស់រោងចក្រ និងសមត្ថកិច្ចមូលដ្ឋាន ដើម្បីសុំរថយន្តពន្លត់អគ្គិភ័យមកជួយអន្តរាគមន៍បា.ញ់ទឹកពន្លត់ជាបន្ទាន់។ បន្ទាប់មក ក៏មានរថយន្តពន្លត់អគ្គិភ័យក្រុមសង្គោះ៧១១ មកដល់ជាច្រើនគ្រឿង ជួយបា.ញ់ទឹកពន្លត់ទប់ស្កាត់ និងមានរថយន្តខាងកម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ក៏បានចេញរថយន្តពន្លត់អគ្គិភ័យទៅជួយអន្តរាគមន៍ជាបន្តបន្ទាប់ផងដែរ។
ក្រោយពីរថយន្តពន្លត់អគ្គិភ័យខាងកម្លាំងសង្គ្រោះ៧១១ និងរថយន្តខាងកម្លាំងសមត្ថកិច្ចជំនាញបង្ការពន្លត់អគ្គិភ័យ ព្រមទាំងសង្គ្រោះនៃស្នងការដ្ឋាននគរបាលរាជធានីភ្នំពេញ បានចេញមកដល់ ក៏បា.ញ់ឲ្យរលត់ទៅវិញនៅវេលាម៉ោង៧និង៣០នាទីយប់ថ្ងៃដដែល។
គួរបញ្ជាក់ផងដែថា ពាក់ព័ន្ធក្នុងករណីអគ្គិភ័យឆាបឆេះរោងចក្រយីហោឈ្មោះ «ជរ័ធីប្រាយធីង» ខាងលើនេះ បណ្ដាលឱ្យឆេះខូចខាតអគាររោងចក្រចំនួន១អគារ ដែលមានទំហំ(20×30) តែមិនបង្កឲ្យមានអ្នករងរបួសនោះទេ។
ចំណែកសមត្ថកិច្ចនគរបាល បានបញ្ជាក់ប្រាប់ដែរថា រថយន្តជំនួយអន្តរាគមន៍ពន្លត់ រួមមាន រថយន្តការិយាល័យអគ្គិភ័យរបស់ស្នងការរាជធានីភ្នំពេញ ចំនួន១៩គ្រឿង, រថយន្តអគ្គិភ័យរបស់កម្លាំងកងពលតូចលេខ៧០ ចំនួន៤គ្រឿង ព្រមទាំងរថយន្តអគ្គិភ័យរបស់ទីក្រុងជ្រោយចង្វារចំនួន៥គ្រឿង និងរថយន្តអគ្គិភ័យកាណាឌីយ៉ា១គ្រឿងផងដែរ៕
ចែករំលែកព័តមាននេះ