- ភ្នំពេញ
មិនបន្លាច ប៉ុន្តែសូមលើកកម្ពស់ការប្រុងប្រយ័ត្ន ពីព្រោះប្រសិនបើយើងចេះតែឆ្ងាញ់ និងទទួលទានជារៀងរាល់ថ្ងៃ យើងអាចនឹងមានបញ្ហាសុខភាពដោយមិនដឹងខ្លួននៅពេលអនាគត ជាពិសេសគឺ
មិនបន្លាច ប៉ុន្តែសូមលើកកម្ពស់ការប្រុងប្រយ័ត្ន ពីព្រោះប្រសិនបើយើងចេះតែឆ្ងាញ់ និងទទួលទានជារៀងរាល់ថ្ងៃ យើងអាចនឹងមានបញ្ហាសុខភាពដោយមិនដឹងខ្លួននៅពេលអនាគត ជាពិសេសគឺជំងឺមហារីក ដែលជាឃា.ត.ក.រគ្មានស្រមោលមួយ ។
នរណាក៏ឆ្ងាញ់ដែរ ពពួកអាហារកែច្នៃដែលឆ្លងកាត់ផលិតកម្ម ដូចជា ៖ ពពួកហ៊តដក (hotdog) ប្រហិតគ្រប់ប្រភេទមិនថាសាច់គោ សាច់ជ្រូក ឬសាច់ត្រី ពួកសាច់ក្តាម ប៉ាតេ និងអាហារជាច្រើនមុខ ។ និយាយរួមទៅ គឺពពួកសាច់ និងអាហារកំប៉ុងដែលឆ្លងផលិតកម្ម និងប្រើប្រាស់ ពពួកសារធាតុគីមី ដែលអាចរក្សាទុកបានយូរ ។
នៅកម្ពុជាយើង អាហារទាំងនេះ សំបូរបែបណាស់នាពេលបច្ចុប្បន្ន ហើយប្រជាប្រិយភាពរបស់វាក៏សម្បើមដែរ ដោយនៅក្នុងមួយថ្ងៃៗ គ្រាន់តែអ្នកលក់ពពួកអាហារទាំងនេះចល័ត ម្នាក់ៗលក់មិនក្រោម៥គីឡូក្រាម។ ក្រៅពីនោះ នៅតាមហាង និងតាមផ្ទះជាច្រើន គឺសុទ្ធតែនិយមចូលចិត្តពពួកអាហារទាំងនេះ សឹងតែទាំងអស់គ្នា ។
ពពួកអាហារទាំងនេះ អ្នកខ្លះនិយមទទួលទានលេង នៅពេលសម្រាកពីការងារ ។ អ្នកខ្លះចម្អិនទទួលទានបាយព្រឹក អ្នកខ្លះទៀតប្រើប្រាស់វាជាគ្រឿងក្លែម ជាពិសេសពពួកក្រុមបុរសៗនៅពេលជួបជុំគ្នាទទួលទានគ្រឿងស្រវឹងនៅពេលល្ងាច ។ សម្រាប់ក្មេងៗវិញ គឺសឹងតែមិនមានអ្នកដែលនិយាយបដិសេធពពួកអាហារនេះតែម្តង ។ និយាយរួមទៅ ពពួកអាហារដែលកៃច្នៃទាំងនេះ គឺទទួលការគាំទ្រពីសំណាក់ប្រជាពលរដ្ឋយើងគ្រប់មជ្ឈដ្ឋាន សូម្បីតែអ្នកដែលមានការយល់ដឹងហើយខ្លះក៏ដោយ ក៏នៅតែទទួលទានពពួកអាហារទាំងនេះម្តងម្កាលផងដែរ ។
មូលហេតុដែលពពួកអាហារកែច្នៃទាំងនេះ ទទួលការពេញនិយមបែបនេះ គឺថា វាមានរសជាតិឆ្ងាញ់ ស្រួលចម្អិន ស្រួលហូប ហើយពេលខ្លះសឹងតែហែកពីកញ្ចប់វេចខ្ចប់ ឬក៏គាស់ពីកំប៉ុងទទួលទានបានតែម្តង ។ សម្រាប់អ្នកដែលឧស្សាហ៍បន្តិច អាចដាក់វាស្ងោរ ឬក៏ប្រើប្រាស់ខ្លាញ់ ឫប្រេងឆា ចៀនបំពងតាមការចូលចិត្ត ពោលគឺមិនលើសពី១៥នាទីទេ គឺរួចរាល់ជាការស្រេច ប៉ុន្តែសូមជ្រាបពីផលប៉ះពាល់របស់វា ។
ដើម្បីកែច្នៃ និងរក្សាទុកវាបានយូរ ពពួកអាហារទាំងនេះ គឺដាច់ខាតត្រូវតែលាយផ្សំដោយសារធាតុគីមី ដែលទោះបីជាវាកំណត់តាមស្តង់ដា និងមាត្រដ្ឋានសុខភាពសាធារណៈកំណត់ក៏ដោយ ក៏វានៅតែជាសារធាតុគីមី ដែលគ្រោះថ្នាក់ ជាពិសេសនៅពេលដែលយើងនិយមទទួលទានវាច្រើន ឫក៏រាល់ថ្ងៃ ។
តាមរបាយការណ៍របស់អង្គការសុខភាពពិភពលោកមួយ បានឲ្យដឹងថា ការទទួលទានអាហារដែលឆ្លងកាត់តាមសង្វាក់ឧស្សាហកម្ម ជាពិសេសគឺពពួកសាច់កែច្នៃនេះ ៥០ក្រាមនៅក្នុងមួយថ្ងៃ ហើយរាល់ថ្ងៃនោះ បុគ្គលដែលទទួលទានងាយនឹងរងគ្រោះកើតជំងឺមហារីក រហូតដល់ទៅ ១៨ភាគរយឯណោះ។
រាល់សាច់ដែលឆ្លងកាត់សង្វាក់ផលិតកម្ម ហើយមានកាលបរិច្ឆេទប្រើប្រាស់កាន់តែយូរនោះ ហានិភ័យចំពោះសុខភាព គឺអាចកាន់តែខ្ពស់ ដូច្នេះសូមប្រុងប្រយ័ត្ន! ។ ក្រៅពីនោះ នៅក្នុង ស្រុកយើងមានក្រុមអ្នកខិ.លខូ.ចនាំចូលផលិតផលហួសកាលបរិច្ឆេទប្រើប្រាស់ មកច្នៃលួ.ចដាក់កាលបរិច្ឆេទថ្មី គឺវារឹតតែគ្រោះថ្នាក់ថែមទៀត។
ក្រៅពីជំងឺមហារីកហើយនោះ ពពួកអាហារទាំងនេះ ក៏អាចនឹងធ្វើឲ្យសរីរាង្គខាងក្នុង មានតាំង ពីក្រពះ ពោះវៀន ថ្លើម លំពែង ប្រមាត់ បេះដូង តម្រង់នោម ក៏ប្រឈមមុខនឹងបញ្ហាចុះខ្សោយ និងងាយប្រឈមមុខនឹងហានិភ័យផ្សេងៗទៀតជាច្រើនផងដែរ ។
ដើម្បីបញ្ជៀសពីផលប៉ះពាល់ដល់សុខភាពរបស់យើងទាំងអស់គ្នានៅពេលអនាគត ប្រសិនបើអាចបញ្ជៀស ឬក៏កាត់បន្ថយបាន គួរតែកាត់បន្ថយ ហើយងាកមករកពពួកអាហារណាដែលមានផលប្រយោជន៍ដល់រាងកាយ ។ ទោះបីជាការចម្អិនវាត្រូវលំបាកជាងបន្តិច ហើយរសជាតិអាចមិនឆ្ងាញ់ពិសារដូចជាពពួកអាហារកៃច្នៃស្រាប់ ប៉ុន្តែដើម្បីសុខភាពរបស់យើងទាំងអស់គ្នាគួរតែព្យាយាម និងអនុវត្តឲ្យបាន ។ យើងហត់ពេលនេះ ថ្ងៃស្អែក ថ្ងៃខានស្អែក និងថ្ងៃជាបន្តបន្ទាប់ ប៉ុន្តែសុខភាពយើងល្អ យើងអាចរស់នៅបានយូរ មិនមានជំងឺធ្ងន់ធ្ងរ គួរតែពលីកម្មពេលវេលាបន្តិចបន្តួច ដើម្បីខ្លួនយើង និងគ្រួសារយើង ។
អត្ថបទដោយ ៖ ហេង ចេស្តារ
ចែករំលែកព័តមាននេះ