ជំនួបមួយនៅ EPL ត្រូវរំសាយចោល ក្រោយមានកីឡាករគាំងបេះដូងលើទីលាន
អង់គ្លេស ៖ ការប្រកួតក្របខណ្ឌលីគកំពូលអង់គ្លេស Premier League រវាងក្រុមម្ចាស់ផ្ទះ Bournemouth
អង់គ្លេស ៖ ការប្រកួតក្របខណ្ឌលីគកំពូលអង់គ្លេស Premier League រវាងក្រុមម្ចាស់ផ្ទះ Bournemouth
អង់គ្លេស ៖ ការប្រកួតក្របខណ្ឌលីគកំពូលអង់គ្លេស Premier League រវាងក្រុមម្ចាស់ផ្ទះ Bournemouth និងក្រុមភ្ញៀវ Luton Town កាលពីថ្ងៃទី១៦ ខែធ្នូ កន្លងទៅ ត្រូវបានរំសាយចោល បន្ទាប់ពីខ្សែការពារ Tom Lockyer ប្រធានក្រុម Luton បានគាំងបេះដូង និងដួលសន្លប់បាត់បង់ស្មារតីលើទីលាន អំឡុងពេលកំពុងប្រកួត នៅឯកីឡដ្ឋាន Vitality ។
ការប្រកួតរវាងក្រុមទាំងពីរត្រូវបានផ្អាកនៅនាទី៦៥ ពាក់កណ្តាលតង់ទី២ អំឡុងពេលលទ្ធផលស្មើគ្នា ១-១ ខណៈដែលក្រុមគ្រូពេទ្យកំពុងតែសង្គ្រោះខ្សែការពារ Tom Lockyer ហើយជាសំណាងល្អ កីឡាករអន្តរជាតិវែលស៍វ័យ២៩ឆ្នាំរូបនេះបានដឹងខ្លួន ហើយត្រូវសែងចេញដោយប្រង់កាក្រោមសំឡេងអបអរសាទរពីអ្នកគាំទ្រ និងត្រូវបានបញ្ជូនបន្តទៅកាន់មន្ទីរពេទ្យ។
ក្លិប Luton Town បានចេញសេចក្តីថ្លែងការណ៍មួយថា «ឥឡូវនេះ ប្រធានក្រុម Tom Lockyer កំពុងស្ថិតនៅក្នុងមន្ទីរពេទ្យ និងស្ថិតក្នុងស្ថានភាពល្អប្រសើរមាន ហើយបច្ចុប្បន្នកំពុងទទួលការធ្វើតេស្តបន្ថែមពីសំណាក់ក្រុមគ្រូពេទ្យ ដែលមានក្រុមគ្រួសាររបស់គេនៅក្បែរជានិច្ច ហើយក្រុមគ្រួសាររបស់ Lockyer បានថ្លែងអំណរគុណដល់មនុស្សគ្រប់គ្នាសម្រាប់ការគាំទ្រ»។
ដំបូងឡើយ ការប្រកួតនេះត្រូវបានផ្អាក ប៉ុន្តែក្រោយមកក្របខណ្ឌ Premier League បានប្រកាសថា ការប្រកួតត្រូចរំសាយចោលតែម្តង ខណៈដែលកីឡាករ និងបុគ្គលិកមកពីក្រុមទាំងពីរបានត្រឡប់ទៅកាន់ទីលានវិញ ដើម្បីថ្លែងអំណរគុណអ្នកគាំទ្រ។ លោក Rob Edwards អ្នកចាត់ការក្រុម Luton Town មានអារម្មណ៍រំជួលចិត្តយ៉ាងខ្លាំង ដោយអ្នកចាត់ការជនជាតិអង់គ្លេសវ័យ៤០ឆ្នាំរូបនេះបានសម្រក់ទឹកភ្នែក អំឡុងពេលចេញមកពីថ្លែងអំណរគុណអ្នកគាំទ្រ៕ (ប្រភព ៖ BBC និង NBC Sports)
ចែករំលែកព័តមាននេះ