ខេត្តកំពង់ចាម ៖ មនុស្សចំនួន៤នាក់បានរងរបួសធ្ងន់ធ្ងរនៅក្នុងឧប្បត្តិហេតុគ្រោះថ្នាក់ចរាចរណ៍ដ៏រន្ធត់២កន្លែងផ្សេងគ្នា នៅយប់ថ្ងៃទី២២ ឧសភា និងរសៀលថ្ងៃទី២៣ ឧសភា ២០១១ លើកំណាត់ផ្លូវជាតិលេខ៧ ក្នុងក្រុងកំពង់ចាម និងស្រុកត្បូងឃ្មុំ អ្នករងគ្រោះត្រូវបានគេនាំទៅសង្គ្រោះជាបន្ទាន់នៅមន្ទីរពេទ្យភ្លាមៗផងដែរ
ខេត្តកំពង់ចាម ៖ មនុស្សចំនួន៤នាក់បានរងរបួសធ្ងន់ធ្ងរនៅក្នុងឧប្បត្តិហេតុគ្រោះថ្នាក់ចរាចរណ៍ដ៏រន្ធត់២កន្លែងផ្សេងគ្នា នៅយប់ថ្ងៃទី២២ ឧសភា និងរសៀលថ្ងៃទី២៣ ឧសភា ២០១១ លើកំណាត់ផ្លូវជាតិលេខ៧ ក្នុងក្រុងកំពង់ចាម និងស្រុកត្បូងឃ្មុំ អ្នករងគ្រោះត្រូវបានគេនាំទៅសង្គ្រោះជាបន្ទាន់នៅមន្ទីរពេទ្យភ្លាមៗផងដែរ ។
តាមសេចក្តីរាយការណ៍ពីលោកអនុសេនីយ៍ឯក សូ សារ៉ាត អធិការរងនគរបាលស្រុកត្បូងឃ្មុំ ទទួលផែនសណ្តាប់ធ្នាប់បានឲ្យកោះសន្តិភាពដឹងថា កាលពីវេលាម៉ោង១និង១៥នាទីរសៀល ថ្ងៃទី២៣ ឧសភា នៅត្រង់ចំណុចភូមិយាយ.ស ឃុំទន្លេបិទ ស្រុកត្បូងឃ្មុំ មានរថយន្ត១គ្រឿងម៉ាកហ៊ីយ៉ានដាយ ដឹកអ្នកដំណើរជិត២០នាក់ ក្នុងនោះមានក្មេងចាស់ប្រុសស្រីបានក្រឡាប់បះជើងនៅលើទ្រូងថ្នល់ ដោយសំណាងល្អក្នុង១ម៉ឺនគ្រោះថ្នាក់គ្រាន់តែរងរបួសអ្នកដំណើរ តែ២នាក់ប៉ុណ្ណោះក្នុងនោះមាន១-ឈ្មោះអ៊ីន ចិន្តា ភេទស្រី អាយុ៣៨ឆ្នាំ រស់នៅភូមិទួលជ័យ ឃុំកណ្តោលជ្រុំ ស្រុកពញាក្រែក ២-ឈ្មោះអេង ស៊ីថា ភេទប្រុស អាយុ៣២ឆ្នាំ រស់នៅរាជធានីភ្នំពេញ ។
ប្រភពដដែលបានបន្តថា អ្នកបើកបររថយន្តឈ្មោះជា ភេទប្រុស រស់នៅក្រុងសួង បានដឹកអ្នកដំណើរចេញពីរាជធានីភ្នំពេញ ឆ្ពោះមកកាន់ក្រុងសួង ស្របពេលដែលមកដល់ត្រង់ភូមិយាយ.ស អ្នកបើកបរបានងងុយដេកជាហេតុបណ្តាលឲ្យរេចង្កូតរកកល់នឹងធ្លាក់ចេញពីថ្នល់ជាតិ។ រំពេចនោះត្រូវបានអ្នកដំណើរជាច្រើនបានស្រែក ហើយធ្វើឲ្យអ្នកបើកបរភ្ញាក់ ទើបខំបួងចង្កូតមកខាងឆ្វេងដៃវិញ ទាំងប្រថុចញ៉ុចជាហេតុធ្វើឲ្យរថយន្តក្រឡាប់បះកង់នៅលើថ្នល់។ ក្នុងឧប្បត្តិហេតុនេះអ្នកដំណើរ២នាក់ដែលជិះលើរថយន្តរងរបួសធ្ងន់ហើយត្រូវបានដឹកតាមរថយន្តសាមុយមកកាន់មន្ទីរពេទ្យខេត្ត ។ រីឯអ្នកឯទៀត គ្រាន់តែរបួសបន្តិចបន្តួច អ្នកបើកបរបានរត់គេចខ្លួនបាត់ស្រមោល។ រថយន្តត្រូវបាននាំមករក្សាទុកនៅអធិការដ្ឋាននគរបាលស្រុកត្បូងឃ្មុំ ដោះស្រាយតាមច្បាប់ ។
ចំពោះករណីទី២ ត្រូវបានលោកស៊ាម យូសេង ប្រធានចរាចរណ៍នៃអធិការដ្ឋាននគរបាល ក្រុងកំពង់ចាម ប្រាប់ឲ្យដឹងដែរថា នៅវេលាម៉ោង៩និង៣០នាទីយប់ថ្ងៃទី២២ ឧសភា មានម៉ូតូម៉ាក C125 មួយគ្រឿងពណ៌ខ្មៅស៊េរី២០០៧ ដែលជិះគ្នាចំនួន២នាក់ បើកបរដោយឈ្មោះនាង សារឿន ភេទប្រុស អាយុ៣០ឆ្នាំ រស់នៅភូមិដំណាក់ទ្រព្យ ឃុំក្រាំងស្នាយ ស្រុកឈូក ខេត្តកំពត។ ចំណែកឈ្មោះម៉ាប់ សុខម៉េង ភេទប្រុស អាយុ២៥ឆ្នាំ រស់នៅភូមិសំពៅផុសថ្មី ឃុំជីរោទិ៍ទី២ ស្រុកត្បូងឃ្មុំ ជាអ្នកជិះពីក្រោយ។
ឈ្មោះសារឿន បានបើកចុះពីលើស្ពានគីហ្ស៊ុណា ឆ្ពោះមកត្រើយខាងលិច ដោយល្បឿនយ៉ាងលឿនកុងទ័ររហូតដល់ទៅ១៣០ និងមិនពាក់មួកសុវត្ថិភាពនោះទេ បានជ្រុលទៅបុករង្វង់មូលក្បាលស្ពានលាន់ដូចរន្ទះ ជាហេតុបណ្តាលឲ្យម៉ូតូផ្លោងកំពស់ជិត២ម៉ែត្រ។ រីឯអ្នកជិះម៉ូតូទាំង២នាក់ផ្លោងចម្ងាយ៥ម៉ែត្រ បោកនឹងថ្នល់សន្លប់ស្តូក បន្ទាប់មកត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យជាបន្ទាន់។ ចំពោះម៉ូតូត្រូវបានយកមករក្សាទុកនៅអធិការដ្ឋាននគរបាលស្រុក៕
ចែករំលែកព័តមាននេះ