រាជធានីភ្នំពេញ៖ រថយន្តទ្រុងឃ្លុបបិទជិត១គ្រឿង បានបើកបរក្នុងល្បឿនលឿន ស្រាប់តែរេចង្កូតជ្រុលទៅបុកឡើងលើសួនពុះចែកទ្រូងផ្លូវ រួចជ្រុលទៅបង្គោលដែកស្លាកចរាចរណ៍១ដើម បណ្ដាលឲ្យបាក់រាបដល់ដី ទើបទៅមុខលែងរួច ។ ឧប្បត្តិហេតុនេះបានកើតឡើង កាលពីវេលាម៉ោង៦និង៣០នាទីព្រឹកថ្ងៃទី១៩…
រាជធានីភ្នំពេញ៖ រថយន្តទ្រុងឃ្លុបបិទជិត១គ្រឿង បានបើកបរក្នុងល្បឿនលឿន ស្រាប់តែរេចង្កូតជ្រុលទៅបុកឡើងលើសួនពុះចែកទ្រូងផ្លូវ រួចជ្រុលទៅបង្គោលដែកស្លាកចរាចរណ៍១ដើម បណ្ដាលឲ្យបាក់រាបដល់ដី ទើបទៅមុខលែងរួច ។
ឧប្បត្តិហេតុនេះបានកើតឡើង កាលពីវេលាម៉ោង៦និង៣០នាទីព្រឹកថ្ងៃទី១៩ ខែកក្កដា ឆ្នាំ២០២៥ នៅតាមផ្លូវជាតិលេខ៣ ត្រង់ចំណុចមុខវត្តទឹកថ្លា ជិតស្ពានទឹកថ្លា ស្ថិតនៅក្នុងភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។
រថយន្ត១គ្រឿងខាងលើនោះ ម៉ាកហុីយ៉ាន់ដាយ ពណ៍ស ពាក់ស្លាកលេខភ្នំពេញ3F-8541 ជាប្រភេទរថយន្តទ្រុងឃ្លុបបិទជិត បើកបរដោយបុរសមិនស្គាល់អត្តសញ្ញាណម្នាក់ ហើយគាត់មិនបានរត់គេចខ្លួននោះឡើយ ។
អ្នកបើកបររថយន្តរូបនោះ បាននិយាយប្រាប់សមត្ថកិច្ចថា នៅមុនពេលកើតហេតុគាត់បានបើករថយន្តខាងលើដឹកដុំរ៉ឡូក្រដាស់ចេញពីក្នុងភូមិសាស្ត្រខេត្តកណ្ដាល យកទៅដាក់នៅរោងចក្រផលិតក្រដាស់កាតុងមួយកន្លែង ស្ថិតនៅម្ដុំជិតផ្សារព្រៃទា ភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ គាត់បានបើកបរតាមផ្លូវជាតិលេខ៣ ក្នុងទិសដៅពីត្បូងទៅជើង ហើយក៏មានរថយន្តវ៉េអង១គ្រឿងបើកបរខាងមុខ ក្នុងទិសដៅស្រាបគ្នាផងដែរ (ប៉ុន្តែគាត់ពុំបានបញ្ជាក់ប្រាប់ថា ដឹកដុំរ៉ូឡូក្រដាស់នេះចេញពីភូមិ ឃុំ ស្រុកណាមួយ នៅក្នុងខេត្តកណ្ដាលនោះទេ)។
គាត់និយាយបន្ថែមទៀតថា នៅពេលកំពុងបើកបរលឿន ទៅដល់ត្រង់ចំណុចកើតហេតុ ស្រាប់តែរថយន្តវ៉េអង១គ្រឿងដែលបើកខាងមុខរថយន្តគាត់នោះបានបន្ថយល្បឿនឈប់ ដើម្បីទុកអាទិ៍ភាពឲ្យរថយន្ត១គ្រឿងទៀតម៉ាកតូយ៉ូតាព្រូស ដែលបើកបរបញ្ច្រាស់ទិសគ្នា ហើយបត់ឆ្វេងឆ្លងផ្លូវនៅខាងមុខ ។ ពេលនោះបានធ្វើឲ្យគាត់វាក់ ហើយខំជាន់ហ្វ្រាំងឈប់ដែរ ប៉ុន្តែហ្វ្រាំងរថយន្តអត់សុីជាន់មិនជាប់ គាត់ក៏បង្ខំចិត្តកាច់ចង្កូតគេចចេញ ទើបរេចង្កូតបុកឡើងសួនសួនពុះចែកទ្រូងផ្លូវ និងបុកបង្គោលស្លាកចរាចរណ៍បែបនេះតែម្ដង ។
សមត្ថកិច្ចបានប្រាប់ថា ឧប្បត្តិហេតុនេះសំណាងណាស់ដែលមិនបានបណ្ដាលឲ្យមានមនុស្សណាម្នាក់រងគ្រោះឡើយ ហើយក្រោយពេលកើតហេតុនគរបាលប៉ុស្តិ៍ក្រាំងពង្របានចុះទៅនាំយករថយន្តខាងលើដាក់អែបខាង ។ បន្ទាប់មករាយការណ៍ជូននគរបាលការិយាល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញ នាំយករថយន្តនោះទៅរក្សាទុករង់ចាំការដោះស្រាយនៅពេលក្រោយ ៕
ចែករំលែកព័តមាននេះ