ក្រុងប៉ោយប៉ែត ៖ បទល្មើស៣ករណីត្រូវបានកម្លាំងកងរាជអាវុធហត្ថក្រុងប៉ោយប៉ែត ចុះ បង្ក្រាបផ្ទួនៗ ហើយឃាត់ខ្លួនជនសង្ស័យ៥នាក់នៅវេលាល្ងាចថ្ងៃតែមួយកាលពីថ្ងៃទី២១ ឧសភា ឆ្នាំ២០១១។ ២ករណីកើតឡើងក្នុងភូមិក្បាលស្ពាន និងមួយករណីទៀតកើតឡើងក្នុងភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត
ក្រុងប៉ោយប៉ែត ៖ បទល្មើស៣ករណីត្រូវបានកម្លាំងកងរាជអាវុធហត្ថក្រុងប៉ោយប៉ែត ចុះ បង្ក្រាបផ្ទួនៗ ហើយឃាត់ខ្លួនជនសង្ស័យ៥នាក់នៅវេលាល្ងាចថ្ងៃតែមួយកាលពីថ្ងៃទី២១ ឧសភា ឆ្នាំ២០១១។ ២ករណីកើតឡើងក្នុងភូមិក្បាលស្ពាន និងមួយករណីទៀតកើតឡើងក្នុងភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត ។ ក្នុងចំណោមជនទាំង៥នាក់ ២នាក់ជាប់សង្ស័យ ពាក់ព័ន្ធចែកចាយថ្នាំញៀន ឯ២នាក់ទៀតជាប់ពាក់ព័ន្ធចោរកម្ម និងម្នាក់ទៀតជាជនប្រើហិង្សាកាប់ប្អូនថ្លៃ ។
ជនទាំង៥នាក់ខាងលើ ១-ឈ្មោះហៀង ហឿន ភេទប្រុស អាយុ៣២ឆ្នាំ ២-ឈ្មោះលុក រក្សា ភេទប្រុស អាយុ២០ឆ្នាំ ៣-ឈ្មោះព្រឹល គឹង ហៅម៉ូម ភេទប្រុស អាយុ២៩ឆ្នាំ ៤-ឈ្មោះយ៉ង់ ត្រេន ហៅតឿ ភេទប្រុស អាយុ២៣ឆ្នាំ និង៥-ឈ្មោះម៉េង ចាន់ណា ភេទប្រុស អាយុ៤៦ឆ្នាំ ។ ជនទាំង៥នាក់ខាងលើឈ្មោះហៀង ហឿន ឈ្មោះលុក រក្សា ឈ្មោះព្រឹល គឹង និងឈ្មោះយ៉ង់ ត្រេន រស់នៅក្នុងភូមិក្បាលស្ពាន ជាមួយគ្នា ឯឈ្មោះម៉េង ចាន់ណា រស់នៅភូមិបាលិលេយ្យ ។ ចំពោះឈ្មោះហៀង ហឿន និងឈ្មោះលុក រក្សា ត្រូវបានកម្លាំងប៉េអឹមឃាត់ខ្លួនពីបទចែកចាយថ្នាំញៀននៅចំណុចបរិវេណកាសីុណូហ្គោលដិនក្រោនក្នុងភូមិក្បាលស្ពាន កាលពីវេលាម៉ោង៧និង៣០នាទីយប់ ថ្ងៃទី២១ ឧសភា រឹបអូសបានថ្នាំញៀនប្រភេទ K ទឹកកកចំនួន១ថង់តូច ។
ចំណែកឯឈ្មោះព្រឹល គឹង ហៅម៉ូម និងឈ្មោះយ៉ង់ ត្រេន ហៅតឿ ត្រូវបានកម្លាំងប៉េអឹមឃាត់ខ្លួនពីបទចោរកម្ម ដោយអ្នកទាំង២បានចូលទៅលួចទ្រព្យសម្បត្តិបុគ្គលិកក្រុមហ៊ុនកាស៊ីណូ ត្រូពីកាណា ស្ថិតក្នុងភូមិក្បាលស្ពាន គឺលួចធុងហ្គាស់ស្រាបៀរចំនួន១ឈុត ពីចំណុចក្រុមហ៊ុនខាងលើ កាលពីវេលាម៉ោង៤រសៀល ថ្ងៃទី២១ ឧសភា ។ ចំណែកឈ្មោះម៉េង ចាន់ណា ត្រូវបានប៉េអឹមក្រុងឃាត់ខ្លួនពីបទប្រើអំពើហិង្សាដោយចេតនាកាប់ប្អូនថ្លៃខ្លួនឯងឈ្មោះសាន់ សុភាព ភេទប្រុស អាយុ៣៩ឆ្នាំ នឹងពូថៅចំក្បាលផ្នែកខាងក្រោយ បណ្តាលឱ្យរងរបួសធ្ងន់ធ្ងរត្រូវបានបញ្ជូនទៅព្យាបាលនៅឯមន្ទីរពេទ្យកាល់ម៉ែត្រ រាជធានីភ្នំពេញ ។ ឈ្មោះម៉េង ចាន់ណា ត្រូវបានកម្លាំងប៉េអឹមប្រាប់ថា បានធ្វើការឃាត់ខ្លួននៅវេលាម៉ោង៤រសៀល ថ្ងៃទី២១ ឧសភា ដូចគ្នា ហើយជម្លោះដែលផ្តើមចេញរហូតឈានដល់ការកាប់ឱ្យរបួសប្អូនថ្លៃនេះ ត្រូវបានឱ្យដឹងថា យោងតាមការសួរនាំដំបូងគឺជនរងគ្រោះបានមកសួរនាំជនសង្ស័យរឿងខ្សែកាបរបស់ខ្លួនដែលធ្លាក់កាត់មុខផ្ទះបងថ្លៃ តាមរបៀបខឹងសម្បា។ ក្រោយពីមេក្រុមបានប្រាប់ប្រពន្ធឱ្យលើកខ្សែកាបឱ្យស្រួលវិញនោះ ទំនងជាគិតថា ប្អូនថ្លៃជាអ្នករាយការណ៍ទើបជនសង្ស័យខឹងក៏ស្ទុះឡើងលើផ្ទះទាញពូថៅមកកាប់ប្អូនថ្លៃឱ្យរបួសដួលដេកនៅនឹងកន្លែងតែម្តង ។ ចំណែកឯជនសង្ស័យជាបងថ្លៃបានប្រាប់ថា ដោយសារប្អូនថ្លៃចូលទៅវាយខ្លួនដល់ក្នុងផ្ទះ ទើបទ្រាំមិនបានក៏កាប់វិញ ។
លោកហម ម៉ុត មេបញ្ជាការកងរាជអាវុធហត្ថក្រុងបានប្រាប់កោះសន្តិភាពថា ដោយអនុវត្តតាមបទបញ្ជា និងការចង្អុលបង្ហាញផ្ទាល់ពីលោកឧត្តមសេនីយ៍ត្រី រ័ត្ន ស៊្រាង មេបញ្ជាការកងរាជអាវុធហត្ថខេត្ត ក៏ដូចលោកម៉ែន ភិរម្យ មេបញ្ជាការរង និងជាប្រធានមន្ទីរស្រាវជ្រាវយុត្តិធម៌នៃកងរាជអាវុធហត្ថខេត្ត ឱ្យទប់ស្កាត់ និងបង្ក្រាបរាល់បទល្មើសដែលកើតមានឡើងដើម្បីភូមិ-ឃុំមានសុវត្ថិភាព និងដោយមានសេចក្តីរាយការណ៍ក៏ដូចជាការសហការផ្តល់ព័ត៌មានពីប្រជាពលរដ្ឋ និងអាជ្ញាធរដែនដី ទើបកម្លាំងសមត្ថកិច្ចចុះបង្ក្រាបបទល្មើសបានទាន់ពេលវេលា។ លោកហម ម៉ុត បន្តទៀតថា យោងតាមចម្លើយសារភាពរបស់ជនសង្ស័យទាំង៥នាក់ខាងលើ ថា ពួកគេពិតជាបានប្រព្រឹត្តនូវរាល់ករណីរបស់ពួកគេប្រាកដមែន ទើបលោកបញ្ជូនទាំងមនុស្ស ទាំងវត្ថុតាងទៅទីបញ្ជាការកងរាជអាវុធហត្ថខេត្ត ដើម្បីចាត់ការបន្តតាមនីតិវិធី នៅព្រឹកថ្ងៃទី២៣ ឧសភា៕
ចែករំលែកព័តមាននេះ