ឃាត់ខ្លួនប្រធានក្លិបបាល់ទាត់ម្នាក់ ដែលហ.ក់ដា.ល់មុខអាជ្ញាកណ្តាល ក្រោយចប់ការប្រកួត
តួកគី ៖ ការប្រកួតបាល់ទាត់លីគកំពូលប្រទេសតួកគី Super Lig រវាងក្រុមម្ចាស់ផ្ទះ MKE
តួកគី ៖ ការប្រកួតបាល់ទាត់លីគកំពូលប្រទេសតួកគី Super Lig រវាងក្រុមម្ចាស់ផ្ទះ MKE Ankaragucu និងក្រុមភ្ញៀវ Rizespor កាលពីថ្ងៃទី ១១ ខែ ធ្នូ កន្លងទៅ បានបញ្ចប់ទៅនៅក្នុងលទ្ធផលស្មើគ្នា ១-១ ស្ថិតក្រោមភាពវឹកវរជាទីបំផុត បន្ទាប់ពីប្រធានក្លិប MKE Ankaragucu បានហក់ទៅដាល់មុខមន្ត្រីអាជ្ញាកណ្តាល ដែលកាត់សេចក្តីលើទីលាន។
យោងតាមប្រភពពី Reuters និង ESPN បានរាយការណ៍ថា បន្ទាប់ពីសំឡេងកញ្ចែបន្លឺឡើងបញ្ចប់ការប្រកួតលទ្ធផល ១-១ ដោយក្រុមភ្ញៀវ Rizespor តាមស្មើនៅនាទី៩០+៧ ខណៈដែលពេលនោះលោក Faruk Koca ប្រធានក្លិប MKE Ankaragucu និងជាអ្នកនយោបាយមួយរូបផងនោះ បង្ហាញអារម្មណ៍ខឹងសម្បារយ៉ាងខ្លាំង និងរត់ចូលទីលាន ហើយហក់ដាល់មុខលោក Halil Umut Meler ដែលជាអាជ្ញាកណ្តាលរបស់សហព័ន្ធបាល់ទាត់ពិភពលោក FIFA តាំងពីឆ្នាំ ២០១៧ មកម្ល៉េះ ហើយវីដេអូនៃអំពើហិង្សាត្រូវបានបង្ហាញលើកញ្ចក់ទូរទស្សន៍រដ្ឋតួកគី TRT ផ្ទាល់តែម្តង។
បន្ទាប់ពីការប្រកួតបញ្ចប់ អ្នកគាំទ្រក្រុមម្ចាស់ផ្ទះ Ankaragucu បានរត់សម្រុកចូលទីលាននៅឯកីឡដ្ឋាន Eryaman ខណៈដែលលោកអាជ្ញាកណ្តាល Meler ក៏ត្រូវបានអ្នកវាយប្រហារមិនស្គាល់មុខទាត់ផងដែរ មុនពេលលោកត្រូវជម្លៀសទៅកាន់បន្ទប់ផ្លាស់សំលៀកបំពាក់ដោយមានជំនួយពីប៉ូលិស។
ប្រភពពីទូរទស្សន៍រដ្ឋតួកគី TRT បានរាយការណ៍ថា ប្រធានាធិបតីប្រទេសតួកគី ដាក់បញ្ជាឱ្យផ្អាកបាល់ទាត់លីគគ្រប់កម្រិតដោយគ្មានកំណត់ ។ ស្របពេលសហព័ន្ធកីឡាបាល់ទាត់តួកគី TFF នឹងរៀបចំកិច្ចប្រជុំវិសាមញ្ញមួយ បន្ទាប់ពីឧប្បត្តិហេតុកើតឡើង។ ស្របពេលដែលលោក លោក Mehmet Buyukeksi ប្រធានសហព័ន្ធបាល់ទាត់តួកគីបានថ្លែងថា «បាល់ទាត់តួកគីត្រូវបានដាល់យ៉ាងអាម៉ាស់បំផុតនៅយប់នេះ»។
លោក Ali Yerlikaya រដ្ឋមន្ត្រីមហាផ្ទៃ បានបញ្ជាក់ក្នុងការបង្ហោះលើបណ្តាញទំនាក់ទំនងសង្គម X ថា ដីកាឃុំខ្លួនត្រូវបានចេញសម្រាប់លោក Faruk Koca ប្រធានក្លិប MKE Ankaragucu ហើយមនុស្សពីរនាក់ផ្សេងទៀត ត្រូវបានឃុំខ្លួនទាក់ទងនឹងការស៊ើបអង្កេតរបស់តុលាការអំពីស្ថានភាពនោះ។
សូមជម្រាបថា បន្ទាប់ពីការប្រកួតកាលពីថ្ងៃទី១១ ខែធ្នូ កន្លងទៅ ក្រុម Ankaragucu កំពុងឈរនៅចំណាត់ថ្នាក់លេខ១១ ក្នុងតារាងលីគកំពូលតួកគី ដោយមាន១៨ពិន្ទុ ចំណែក Rizespor មាន២២ពិន្ទុឈរនៅចំណាត់ថ្នាក់លេខ៨ បន្ទាប់ពីឆ្លងកាត់ការប្រកួត១៥សប្តាហ៍ កន្លងមក៕
ចែករំលែកព័តមាននេះ