ឆេះឃ្លាំងស្តុកគ្រឿងសំណង់មួយកន្លែង ផ្អើលខណ្ឌសែនសុខ
- ភ្នំពេញ
រាជធានីភ្នំពេញ ៖ អគ្គិភ័យឆាបឆេះឃ្លាំងស្តុកគ្រឿងសំរាប់ធ្វើសំណង់មួយកន្លែងស្ថិតក្នុងខណ្ឌសែន
រាជធានីភ្នំពេញ ៖ អគ្គិភ័យឆាបឆេះឃ្លាំងស្តុកគ្រឿងសំរាប់ធ្វើសំណង់មួយកន្លែងស្ថិតក្នុងខណ្ឌសែនសុខ បង្កការភ្ញាក់ផ្អើលដល់ប្រជាពលរដ្ឋរាយការណ៍ទៅមន្ត្រីអគ្គិភ័យសុំជំនួយអន្តរាគមន៍ភ្លាមៗផងដែរ កាលពីវេលាម៉ោង៣និង២០នាទីទៀបភ្លឺថ្ងៃទី១២ ខែធ្នូ ឆ្នាំ២០២៣ នៅផ្លូវបេតុងលេខ៤៩៩ ភូមិរោងចក្រ១ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញអណ្តាតភ្លើងពណ៌ក្រហមឆ្អៅចេញពីចំណុចឃ្លាំងខាងលើ ភ្លាមៗនោះអ្នកភូមិបាននាំគ្នាស្រែកដើម្បីអោយម្ចាស់ឃ្លាំងបានឮ និងរាយការណ៍បន្ទាន់ទៅកាន់មន្ត្រីមូលដ្ឋាន ដើម្បីសុំរថយន្តពន្លត់អគ្គិភ័យ។
តាមប្រភពពីស្ត្រីវ័យ៣៥ឆ្នាំម្នាក់ ដែលជាអ្នកយាមឃ្លាំងកើតហេតុខាងលើបានឲ្យដឹងថា នៅមុនពេលកើតហេតុ គាត់កំពុងសម្រាន្តក្នុងបន្ទប់ក្រោយឃ្លាំងខាងលើ ស្រាប់តែឮសម្លេងគេស្រែកថាភ្លើងឆេះផ្ទះ ទើបភ្ញាក់ពីដំណេករត់ចេញមកខាងក្រៅឃើញអណ្តាតភ្លើងកំពុងឆាបឆេះឃ្លាំង ក៏នាំកូនៗទាំង៣នាក់ រត់ចេញទៅខាងមុខឃ្លាំង ដើម្បីសុំជំនួយផងដែរ ។ មុនពេលរថយន្តពន្លត់អគ្គិភ័យមកដល់ អ្នកភូមិបាននាំគ្នាជួយបាញ់ពន្លត់ដោយប្រើប្រាស់បំពង់ឧស្ម័នបាញ់ពន្លត់ជាច្រើនបំពង់ផងដែរ។
ក្រោយពីទទួលបានដំណឹងខាងលើនេះភ្លាម កម្លាំងសមត្ថកិច្ចជំនាញបង្ការពន្លត់អគ្គិភ័យនិង សង្គ្រោះនៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យទៅជួយអន្តរាគមន៍ផងដែរ។ អគ្គិភ័យខាងលើត្រូវបានរលត់ទាំងស្រុង ដោយគ្មានប៉ះពាល់ដល់ផ្ទះអ្នកជិតខាង ក្រោមការជួយអន្តាគមន៍យ៉ាងយកចិត្តទុកដាក់ របស់មន្ត្រីជំនាញអគ្គិភ័យ៕
ចែករំលែកព័តមាននេះ