នាវាចិន និងហ្វីលីពីនប៉ះទង្គិចគ្នាជាថ្មីនៅសមុទ្រចិនខាងត្បូង
ប្រទេសចិន-ហ្វីលីពីន ៖ នាវាហ្វ៊ីលីពីនមួយគ្រឿងនិងនាវាកងឆ្មាំឆ្នេរសមុទ្រចិន១គ្រឿង បានបុ.កគ្នា
ប្រទេសចិន-ហ្វីលីពីន ៖ នាវាហ្វ៊ីលីពីនមួយគ្រឿងនិងនាវាកងឆ្មាំឆ្នេរសមុទ្រចិន១គ្រឿង បានបុ.កគ្នាកាលពីថ្ងៃទី១០ ធ្នូ ក្នុងដែនទឹកនៃប្រជុំកោះស្ប្រាតលី ដោយប្រទេសទាំង២ បានចោទដាក់គ្នាទៅវិញទៅមក ចំពោះឧប្បត្តិហេតុនោះ ដែលកើតមាន បន្ទាប់ពីការប៉ះទង្គិចគ្នាមួយទៀត នៅសមុទ្រចិនខាងត្បូង។
ហ្វីលីពីនអះអាងនាថ្ងៃទី១០ធ្នូថា បណ្ដានាវានៃកងឆ្មាំឆ្នេរសមុទ្រចិន និងកងជីវពលសមុទ្រចិន បានធ្វើសកម្មភាពរាំងខ្ទប់បណ្ដានាវាផ្គត់ផ្កង់ស៊ីវិលហ្វីលីពីន និងធ្វើសកម្មភាពប្រកបដោយគ្រោះថ្នាក់នានា។ នាវា១គ្រឿងក្នុងចំណោមនាវាផ្កត់ផ្គង់ហ្វីលីពីន ត្រូវបានបុកដោយនាវា១គ្រឿងរបស់កងឆ្មាំឆ្នេរសមុទ្រចិន។
នេះជាការគូសបញ្ជាក់របស់កងឯកភាពប្រតិបត្តិការជាតិសម្រាប់សមុទ្រហ្វីលីពីនខាងលិច ក្នុងសេចក្ដីប្រកាសមួយ។ នាវាចិនក៏ប្រើកាណុងបាញ់ទឹកមកលើនាវាផ្គត់ផ្គង់២គ្រឿងនិងនាវារបស់កងឆ្មាំឆ្នេរសមុទ្រហ្វ៊ីលីពីន១គ្រឿង ដែលអមការពារបណ្ដានាវាផ្គត់ផ្គង់។ សកម្មភាពទាំងនោះបណ្ដាលឲ្យខូចម៉ាសីុននាវា១គ្រឿង ក្នុងចំណោមនាវាផ្គត់ផ្គង់និងធ្វើឲ្យខូចក្ដោងនាវាកងឆ្មាំឆ្នេរសមុទ្រ។
ចំណែកចិនវិញធ្វើការបកស្រាយផ្ទុយពីនោះ ដោយចោទប្រកាន់នាវាហ្វ៊ីលីពីន១គ្រឿងថា បុកត្រង់ៗនាវាកងឆ្មាំឆ្នេរសមុទ្រចិន។ ក្នុងសេចក្ដីប្រកាសមួយកងឆ្មាំឆ្នេរសមុទ្រចិន គូសបញ្ជាក់ថា នាព្រឹកថ្ងៃទី១០ធ្នូនាវាហ្វ៊ីលីពីន៤គ្រឿង បានចូលដោយខុសច្បាប់ក្នុងដែនទឹកនៃប្រជុំកោះស្ប្រាតលី ដែលចិនថាជារបស់ខ្លួនហើយនាវាហ្វ៊ិលីពីន១គ្រឿង មិនស្ដាប់ការព្រមានជាច្រើនលើករបស់យើង។ នាវាហ្វ៊ិលីពីននោះបានផ្លាស់ប្ដូរទិសដៅភ្លាមៗប្រកបដោយគ្រោះថ្នាក់និងដោយគ្មានវិជ្ជាជីវៈទើបបុកនាវាកងឆ្មាំឆ្នេរសមុទ្ររបស់យើង។ ការទទួលខុសត្រូវធ្លាក់លើភាគីហ្វ៊ិលីពីនទាំងស្រុង៕
ចែករំលែកព័តមាននេះ