រាជធានីភ្នំពេញ ៖ គណបក្សនយោបាយ ចំនួន៤ ត្រូវបានគណៈកម្មាធិការជាតិ រៀបចំការបោះឆ្នោត (គ.ជ.ប) សម្រេចទទួលស្គាល់ ក្នុងការចូលរួមប្រកួតប្រជែង សម្រាប់បោះឆ្នោតជ្រើសរើសសមាជិកព្រឹទ្ធសភា…
រាជធានីភ្នំពេញ ៖ គណបក្សនយោបាយ ចំនួន៤ ត្រូវបានគណៈកម្មាធិការជាតិ រៀបចំការបោះឆ្នោត (គ.ជ.ប) សម្រេចទទួលស្គាល់ ក្នុងការចូលរួមប្រកួតប្រជែង សម្រាប់បោះឆ្នោតជ្រើសរើសសមាជិកព្រឹទ្ធសភា អាណត្តិទី៥ ឆ្នាំ២០២៤ នេះបើតាមអ្នកនាំពាក្យ គ.ជ.ប ។
លោក សោម សូរីដា អ្នកនាំពាក្យ គ.ជ.ប បានឲ្យកោះសន្តិភាពដឹងនៅថ្ងៃទី១១ ខែធ្នូ ឆ្នាំ២០២៣នេះថា គិតត្រឹមថ្ងៃទី១១ ខែធ្នូ ដែលជាថ្ងៃចុងក្រោយ នៃការទទួលចុះឈ្មោះគណបក្សនយោបាយ សម្រាប់ការបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ មានគណបក្សនយោបាយ ចំនួន៤ ក្នុងនោះ រួមមាន ៖ គណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ និងគណបក្ស ហ្វ៊ុន ស៊ិនប៉ិច ។
លោកបានបញ្ជាក់ថា ៖ «ក្នុងចំណោម គណបក្សនយោបាយ ទាំង៤នេះ គណៈកម្មាធិការជាតិ រៀបចំការបោះឆ្នោត បានទទួលការចុះបញ្ជីគណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិរួចហើយ ដោយឡែកគណបក្ស ហ្វ៊ុន ស៊ិនប៉ិច នៅខ្វះឯកសារ ចំនួន២ អ៊ីចឹងគណបក្ស ហ្វ៊ុន ស៊ិនប៉ិច ត្រូវផ្តល់បង្កាន់ដៃ បញ្ជាក់ការតម្កល់ប្រាក់នៅរតនាគារជាតិ ចំនួន១៥លាន រៀល និងបង្កាន់ដៃ បញ្ជាក់គណនេយ្យរបស់គណបក្ស នៅធនាគារណាមួយ» ។
បើតាមអ្នកនាំពាក្យ បានអះអាងថា មកដល់ពេលនេះ អ្វីដែលគណបក្ស ហ្វ៊ុន ស៊ិនប៉ិច នៅខ្វះនោះ ត្រូវបានសាម៉ីខ្លួន បានបំពេញរួចរាល់អស់ហើយ ប៉ុន្តែនៅកិច្ចប្រជុំព្រឹកមិញ (ថ្ងៃទី១១ធ្នូ) គ.ជ.ប បានសម្រេចទទួលការចុះបញ្ជី ជាផ្លូវការ ចំនួន៣ គណបក្សនយោបាយ ដូច្នេះការរំពឹងទុក ប្រហែលជាមានតែគណបក្សនយោបាយ ចំនួន៤ប៉ុណ្ណោះ ដែលចូលរួមប្រកួតប្រជែងក្នុងការបោះឆ្នោតជ្រើសតាំងសមាជិកព្រឹទ្ធសភា ឆ្នាំ២០២៤ ខាងមុខនេះ ។
លោក សោម សូរីដា បានឲ្យដឹងទៀតថា គណបក្សនយោបាយទាំង៤ បានសុំចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោត ដើម្បីប្រកួតប្រជែងនៅក្នុងមណ្ឌលបោះឆ្នោត ចំនួន ៨ភូមិភាគ ។
ពាក់ព័ន្ធនឹងគណបក្ស ហ្វ៊ុន ស៊ិនប៉ិច នេះដែរ អ្នកនាំពាក្យបានឲ្យដឹងថា គិតមកដល់ពេលនេះ គណបក្សបានយកឯកសារមកបំពេញបន្ថែមនៅ គ.ជ.ប រួចហើយ ដូច្នេះតាមស្មារតីអង្គប្រជុំរបស់ គ.ជ.ប នៅពេល ដែលគណបក្សបំពេញបែបបទរួចហើយ គ.ជ.ប និងចេញសេចក្តីសម្រេចទទួលស្គាល់ជាផ្លូវការ ។
សូមជម្រាបថា គណបក្សឆន្ទៈខ្មែរ ត្រូវបានដឹងជាគណបក្សប្រឆាំងមួយផងដែរ ។ សម្រាប់ការបោះឆ្នោតជ្រើសតាំងសមាជិកព្រឹទ្ធសភានេះ គណបក្សឆន្ទៈខ្មែរនេះ មានការចូលរួមពីគណបក្សយោបាយមួយចំនួនផងដែរ។ គណបក្សនេះ មានការរួមគ្នារវាងគណបក្សនយោបាយ ចំនួន៤ គឺ គណបក្សភ្លើងទៀន គណបក្សប្រជាធិប្បតេយ្យមូលដ្ឋាន គណបក្សកែទម្រង់កម្ពុជា និងគណបក្សឆន្ទៈខ្មែរ ដោយហៅថា «សម្ព័ន្ធភាពឆ្ពោះទៅអនាគត» ។
គួរបញ្ជាក់ថា ការចុះឈ្មោះបញ្ជីគណបក្សនយោបាយ ឈរឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ មានរយៈពេល១៥ថ្ងៃ គឺចាប់ពីថ្ងៃទី២៧ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០២៣ ៕
ចែករំលែកព័តមាននេះ