(អន្តរជាតិ)៖ នៅក្នុងសេចក្តីរាយការណ៍កាលពីព្រឹកថ្ងៃចន្ទ ក្រុមហ៊ុន NagaCorp បាននិយាយថា លោក Tan Sri Dr. Chen Lip Keong បានទទួលមរណភាព ក្នុងវ័យ៧៥ឆ្នាំ នៅថ្ងៃទី៨ ខែធ្នូ ឆ្នាំ ២០២៣ ដោយសារជំងឺរោគាពាធ។

ក្រុមហ៊ុនបាននិយាយនៅក្នុងសេចក្តីរាយការណ៍នោះថា «តាងនាមឱ្យបុគ្គលិកទាំងអស់នៃក្រុមប្រឹក្សាភិបាល សូមចូលរួមរំលែកទុក្ខយ៉ាងក្រៀមក្រំបំផុតចំពោះមរណភាពរបស់លោក Dr. Chen Lip Keong និងចូលរួមរំលែកទុក្ខដ៏ក្រៀមក្រំបំផុតទៅកាន់គ្រួសាររបស់គាត់”»។

«ក្រុមប្រឹក្សាភិបាលក៏សូមថ្លែងអំណរគុណយ៉ាងស្មោះស្ម័គ្រ និងដឹងគុណចំពោះលោកបណ្ឌិត Chen ចំពោះការដឹកនាំ ការណែនាំ និងការរួមចំណែកដ៏មានតម្លៃរបស់គាត់ចំពោះក្រុមក្នុងអំឡុងពេលកាន់តំណែងរបស់គាត់»។

ក្រោយពីមរណភាពរបស់ Dr. Chen Lip Keong ក្រុមប្រឹក្សាភិបាលនៃ NagaCorp បានតែងតាំងលោក Chen Yiy Fon ជាកូនប្រុស ឱ្យឡើងកាន់តំណែងជា CEO ជំនួស.

យោងតាមចំណាត់ថ្នាក់ចុងក្រោយដោយទស្សនាវដ្តីពាណិជ្ជកម្មអាមេរិក Forbes គិតត្រឹមខែឧសភា ឆ្នាំ២០២៣ លោក Tan Sri គឺជាអ្នកមានបំផុតទី០៧ នៅក្នុងប្រទេសម៉ាឡេស៊ី ដែលមានទ្រព្យសម្បត្តិសុទ្ធចំនួន ២.៨ ពាន់លានដុល្លារ៕