ក្រុងប៉ោយប៉ែត ៖ ប្រជាពលរដ្ឋរាប់រយគ្រួសាររស់នៅចំណុចទីស្នាក់ការភូមិក្បាលកោះ ស្ថិតក្នុងសង្កាត់ប៉ោយប៉ែត ក្រុងប៉ោយប៉ែត បានបង្ហាញនូវការមិនសប្បាយចិត្តយ៉ាងខ្លាំង ដោយសារតែលោកប្រធានទីស្នាក់ការភូមិចំណុចក្បាលកោះនោះបើកល្បែងស៊ីសងគគ្រឹកគគ្រេងធ្វើឱ្យរំខានដល់ការរស់នៅរបស់ពួកគាត់
ក្រុងប៉ោយប៉ែត ៖ ប្រជាពលរដ្ឋរាប់រយគ្រួសាររស់នៅចំណុចទីស្នាក់ការភូមិក្បាលកោះ ស្ថិតក្នុងសង្កាត់ប៉ោយប៉ែត ក្រុងប៉ោយប៉ែត បានបង្ហាញនូវការមិនសប្បាយចិត្តយ៉ាងខ្លាំង ដោយសារតែលោកប្រធានទីស្នាក់ការភូមិចំណុចក្បាលកោះនោះបើកល្បែងស៊ីសងគគ្រឹកគគ្រេងធ្វើឱ្យរំខានដល់ការរស់នៅរបស់ពួកគាត់ ។
ប្រជាពលរដ្ឋនិយាយថា ការបើកលេងល្បែងស៊ីសងនៅជាប់ទីស្នាក់ការភូមិចំណុចក្បាលកោះនោះ គឺគេបើកលេងទាំងថ្ងៃទាំងយប់ដោយពុំដែលឃើញមានសមត្ថកិច្ចណាបង្ក្រាបឡើយ ហើយការលេងល្បែងនោះ គឺគេលេងបៀចម្រុះគ្រប់ប្រភេទ តែពេលខ្លះគេបើកលេងអាប៉ោងនិងយូគីផងដែរ ។ ចំពោះការបើកលេងល្បែងនៅចំណុចនោះ គឺឈ្មោះសែម វីរៈ ជាប្រធាននៅចំណុចភូមិក្បាលកោះនោះ ជាអ្នកបើកដោយឱ្យប្រពន្ធរបស់គាត់ជាអ្នកចាំយកលុយតុង ។ ជាមួយនេះ គេសង្កេតឃើញមានការឈ្លោះប្រកែកគ្នា និងរហូតឈានដល់ប្រើអំពើហិង្សាក្នុងក្រុមគ្រួសាររបស់ក្រុមអ្នកញៀនល្បែងទាំងនោះទៀតផង ។
ជាក់ស្តែង កាលពីថ្ងៃទី២២ ឧសភា មានស្ត្រីម្នាក់បានយកផ្លែទុរេនវាយក្បាលប្តីឈ្មោះចាន់ អាយុប្រមាណជាង២០ឆ្នាំ បណ្តាលឱ្យបែកហូរ ឈាមស្រោចពេញខ្លួន ដោយសារតែខឹងប្តីរបស់ខ្លួនលេងល្បែងនៅចំណុចនោះហើយចាញ់អស់លុយ ស្រាប់តែយកម៉ូតូទៅបញ្ចាំយកលុយមកលេងបន្ត ។
ចំណែកលោកសែម វីរៈ ប្រធានទីស្នាក់ការភូមិចំណុចក្បាលកោះបានឱ្យដឹងតាមទូរស័ព្ទថា ចំពោះការបើកលេងល្បែងនោះមានពិតប្រាកដ មែន តែមិនមែនជាលក្ខណៈធំដុំទេ គឺគ្រាន់តែបបួលគ្នាលេង កុំឱ្យអផ្សុកប៉ុណ្ណោះ ។ ទោះជាបែបណាក្តី ក៏ប្រជាពលរដ្ឋបានសំណូមពរដល់ស្ថាប័នជំនាញ និងអាជ្ញាធរមានសមត្ថកិច្ចគួរតែចាត់វិធានការចំពោះការបើកល្បែងស៊ីសងនេះផង ។
លោកសាន ស៊ានហូ ចៅសង្កាត់ប៉ោយប៉ែត បានឱ្យដឹងថា បើមានរឿងបែបនេះពិតមែននោះ លោកមិនអនុញ្ញាតឱ្យប្រធាននៅចំណុចនោះធ្វើអ្វីស្រេចតែអំពើចិត្តនោះឡើយ ។ លោកចៅសង្កាត់បានលើកហេតុផលថា បើចង់ឱ្យភូមិ-ឃុំមានសុវត្ថិភាពត្រូវតែបិទល្បែងស៊ីសងទាំងឡាយ កុំឱ្យកើតមាន ចុះហេតុអ្វីបានជាលោកប្រធានចំណុចនោះបើកល្បែងខ្លួនឯងទៅវិញ ៕
ចែករំលែកព័តមាននេះ